ވެނެޒުއެލާގެ ރިޔާސީ ގަނޑުވަރު ކައިރީގައި ހަމަލާ ދީފި

ވެނެޒުއެލާގެ ރިޔާސީ ގަނޑުވަރު ކައިރީގައި ހަމަލާ ތަކެއް ދީފައިވާ ކަމަށް ރިޕޯޓު ކޮށްފި އެވެ.

މީޑިއާ ތަކުގައި ރިޕޯޓު ކޮށްފައިވާ ގޮތުން، ވެނެޒުއެލާގެ ރިޔާސީ ގަނޑުވަރު ކައިރީގައި ހަމަލާ ދީފައި ވަނީ ހޯމަ ދުވަހުގެ ރޭގެ ވަގުތެއްގަ އެވެ. މި ހަމަލާ ދީފައި ވަނީ، އެމެރިކާގެ އަސްކަރިއްޔާ އިން ކުރިއަށް ގެންދިޔަ އޮޕަރޭޝަނެއްގައި އެ ޤައުމުގެ ރައީސް ނިކޮލަސް މަދޫރޯ ހައްޔަރު ކޮށްގެން ގެންދިޔަތާ ދެ ދުވަސް ފަހުންނެވެ. 

ވެނެޒުއެލާގެ ވަގުތީ ސަރުކާރުގެ ބައެއް މަސްދަރު ތަކާ ހަވާލާދީ ބުނެފައިވާ ގޮތުގައި، ޙާލަތު މިހާރު އޮތީ ސަރުކާރުގެ ފުރިހަމަ ކޮންޓްރޯލްގެ ދަށުގަ އެވެ. 

ވެރި ރަށް ކަރަކާސްގެ މެދު ތެރޭގައި ހުންނަ މިރަފްލޯރެސް ގަނޑުވަރުގެ މަތިން ޑްރޯން ތަކެއް ދުއްވާފައިވާ ކަމަށް މަންޒަރު ދުށް ފަރާތްތަކުން ވަނީ ބުނެފަ އެވެ. އަދި ގާތް ގަނޑަކަށް ރޭގަނޑު އަށެއް ޖެހިއިރު ހަމަލާ ތަކެއް ދީފައިވާ ކަމުގެ އަޑު ފަށް ގަނޑެއް އިވިފައިވާ ކަމަށް ވެސް ބުނެފައިވެ އެވެ. 

ރިޔާސީ ގަނޑުވަރާ ފަސް ބްލޮކު ދުރު ސަރަހައްދެއްގައި އުޅޭ މީހަކު ބުނެފައިވާ ގޮތުން، ބަޑިން ހަމަލާ ތަކެއް ދިން ނަމަވެސް، ހޮނިހިރު ދުވަހުގެ ރޭ މަދޫރޯ ހައްޔަރު ކުރި ވަގުތު ދިން ހަމަލާ ތަކަށް ވުރެ ބާރު ގަދަ ނޫން ކަމަށް ފާހަގަވެފައިވެ އެވެ. ހޯމަ ދުވަހުގެ ރޭ ދިން ބަޑީގެ ހަމަލާ ދެމިގެން ގޮސްފައި ވަނީ ގާތް ގަނޑަކަށް އެއް މިނެޓާއި ވަގުތު ކޮޅަކަށް ކަމަށް ވެސް އޭނާ ބުންޏެވެ.

މީގެ އިތުރުން ނަން ނުޖެހުމަށް ޝަރުތު ކުރުމަށް ފަހު، ގަނޑުވަރުގެ ކައިރީގައި އުޅޭ އެހެން މީހަކު ބުނެފައިވާ ގޮތުގައި، ހަމަލާއާ އެކު އޭނާ އެންމެ ފުރަތަމަ ވެސް ބެލީ ޖައްވުން ދަތުރު ކޮށްފައިވާ ދާ އެއްވެސް އުޅަނދެއް ފެނޭތޯ އެވެ. އެހެން ނަމަވެސް، އެ ފަދަ އެއްވެސް އުޅަނދެއް ފެންނަން ނެތް ކަމަށާއި، ރަތް ކުލައިގެ ލައިޓު ތަކެއް ދިއްލިފައި ހުއްޓާ ފެނުނު ކަމަށް އޭނާ ބުންޏެވެ. 

އެކަމާ ގުޅިގެން ވެނެޒުއެލާގެ ކޮމިއުނިކޭޝަން މިނިސްޓްރީގެ ބަހެއް ހޯދުމަށް މީޑިއާ ތަކުން މަސައްކަތް ކޮށްފައި ވީ ނަމަވެސް، އެ މިނިސްޓްރީ އިން ވަކި އެއްޗެއް ބުނެފައި ނުވެ އެވެ. 

ސޯޝަލް މީޑިއާގައި ދައުރު ވަމުން އަންނަ ވީޑިއޯ ތަކުގައި ހަމަލާ ދޭ މަންޒަރު ފެންނައިރު، ސަލާމަތީ ބާރު ތަކުގެ މެމްބަރުން ހަރަކާތްތެރިވާ މަންޒަރު ވެސް ގެނެ އެވެ. މި ހާދިސާއާ ގުޅިގެން ވެނެޒުއެލާގެ ސަރުކާރުން ރަސްމީ ބަޔާނެއް ނެރެފައި ނުވެ އެވެ.