ޔުނައިޓެޑު އަތުން މޮޅުވެ، އެސްޓަން ވިލާ އަށް ތާރީޚީ ކާމިޔާބެއް

އިނގިރޭސި ޕްރިމިއާ ލީގުގައި މެންޗެސްޓަރ ޔުނައިޓެޑާ ދެކޮޅަށް ކުޅުނު މެޗުން މޮޅުވެ، އެސްޓަން ވިލާ އިން ތާރީޚީ ކާމިޔާބެއް ހޯދައިފި އެވެ. 

އާދީއްތަ ދުވަހުގެ ރޭ އެސްޓަން ވިލާގެ އަމިއްލަ ދަނޑުގައި ކުޅުނު މެޗު އެ ޓީމުން ކާމިޔާބު ކުރީ 2-1 އިންނެވެ. މެޗުގެ ފުރަތަމަ ހާފުގައި އެސްޓަން ވިލާ އިން ލަނޑު ޖަހައި ކުރި ހޯދާފައި ވަނިކޮށް، ޔުނައިޓެޑުން ނަތީޖާ ހަމަހަމަ ވެސް ކުރި އެވެ. ނަމަވެސް، ދެ ވަނަ ހާފުގައި ލަނޑު ޖަހައިގެން އެސްޓަން ވިލާ ވަނީ މެޗުން މޮޅުވެފަ އެވެ.

މެޗުގެ ފުރަތަމަ ހާފުގެ 45 ވަނަ މިނެޓުގައި އެސްޓަން ވިލާ އިން ވަނީ ލަނޑު ޖަހައި ލީޑު ނަގައިފަ އެވެ. އެ ލަނޑު އެސްޓަން ވިލާ އަށް ޖަހައިދިނީ މޯގަން ރޮޖާސް އެވެ. އެ ލަނޑު ޖަހަން އޭނާ އަށް ފުރުސަތު ތަނަވަސްކޮށްދިނީ ޖޯން މެކްގިން އެވެ.

އޭގެ ފަހުން މެޗުގެ ފުރަތަމަ ހާފުގެ އިތުރު ވަގުތުގައި ޔުނައިޓެޑަށް ނަތީޖާ ހަމަހަމަ ކޮށްދިނީ މަތުއެސް ކުންހާ އެވެ. އެ ލަނޑު ޖަހަން ކުންހާ އަށް ފުރުސަތު ތަނަވަސްކޮށްދިނީ ޕެޓްރިކް ޑޯޖް އެވެ.

ނަމަވެސް، މެޗުގެ ދެ ވަނަ ހާފު ފަށައިގެން ކުރީ ކޮޅު އެސްޓަން ވިލާ އިން ވަނީ ދެ ވަނަ ލަނޑެއް ޖަަހައި މެޗުގެ ލީޑު ނަގައިފަ އެވެ. ދެ ވަނަ ހާފު ފަށައިގެން 12 ވަނަ މިނެޓުގައި އެސްޓަން ވިލާގެ ދެ ވަނަ ލަނޑު ވެސް ޖެހީ ރޮޖާސް އެވެ. އެއީ އޮލީ ވަޓްކިންސް ތަނަވަސްކޮށްދިން ފުރުސަތެއްގައި އޭނާ ޖެހި ލަނޑެކެވެ. 

މި މޮޅާއެކު، އެސްޓަން ވިލާ އިން މި ވަނީ ޖެހި ޖެހިގެން 10 މެޗުން މޮޅުވެފަ އެވެ. މިއީ ފާއިތުވި 111 އަހަރުގެ ތެރޭގައި ވެސް، ޖެހި ޖެހިގެން 10 މެޗުން އެސްޓަން ވިލާ މޮޅުވި ފުރަތަމަ ފަހަރެވެ. އެ މޮޅާއެކު އެސްޓަން ވިލާ އޮތީ ލީގު ތާވަލްގެ ތިން ވަނަ މަގާމުގަ އެވެ. އެއީ މިހާތަނަށް ލީގުގައި ކުޅެފައިވާ 17 މެޗުން 36 ޕޮއިންޓާ އެކު އެވެ. އެސްޓަން ވިލާ އަތުން ބަލިވެ ޔުނައިޓެޑު އޮތީ، 26 ޕޮއިންޓާ އެކު ހަތް ވަނައިގަ އެވެ.

އެސްޓަން ވިލާ އަށް އިރުޝާދު ދެމުން އަންނަ އުނާއި އެމެރީގެ އިރުޝާދުގެ ދަށުން އެ ޓީމު އަންނަނީ ރަނގަޅު ނަތީޖާ ތަކެއް ނެރެމުންނެވެ. ޔުނައިޓެޑު މެޗަށް ފަހު ނޫސްވެރިންނާ ވާހަކަ ދައްކަމުން އެމެރީ ބުނީ، އެ މެޗުން މޮޅުވުމުން އޭނާ ހުރީ ވަރަށް ހިތްހަމަ ޖެހިފައި ކަމަށެވެ. އެސްޓަން ވިލާގެ ކުޅުންތެރިން ކުރަމުން އަންނަ މަސައްކަތުން ހާސިލު ކުރާ ކަންކަމަކީ، އެ ޓީމުގެ ސަޕޯޓަރުން ފަޚުރުވެރިވާން ޖެހޭ ކަމެއް ކަމަށް އޭނާ ފާހަގަ ކުރި އެވެ.

މިވަގުތު އެސްޓަން ވިލާގައި އޮތީ ވަރަށް ރަނގަޅު ރޫޙެއް ކަަމަށް ފާހަގަކޮށް އެމެރީ ބުނީ، އެކަން ދަމަހައްޓަން ޖެހޭ ކަމަށެވެ. އިތުރަށް އެމެރީ ބުނީ ބައެއް ޙާލަތް ތަކުގައި އެންމެ އެކަށީގެންވާ މިންވަރަށް ނުކުޅެވޭ ޙާލަތު ވެސް ދިމާވާނެ ކަމަށެވެ. ބައެއް ފަހަރު މެޗު ޑޮމިނޭޓް ނުކުރެވޭނެ ކަމަށާއި، އެ ޙާލަތުގައި ޑިފެންސް އަށް އިސްކަން ދީގެން ކުޅެން ޖެހޭނެ ކަމަށް އޭނާ ބުންޏެވެ. އޭނާ ބުނީ ޔުނަައިޓެޑު މެޗުން ލިބުނު ތިން ޕޮއިންޓާ އެކު، އަދި ވެސް އެސްޓަން ވިލާ އިން ކުރަން ޖެހޭ މަސައްކަތް ވަރަށް ބޮޑު ކަމަށެވެ.

އިތުރަށް ވާހަކަ ދައްކަމުން އެމެރީ ބުނީ މަސައްކަތް ކުރަމުން އަންނަނީ ތަފާތު ޓީމެއް ބިނާ ކުރުމަށް ކަމަށެވެ. ޚާއްސަކޮށް އެސްޓަން ވިލާގެ ވިސްނުމާއި، އެ ޓީމުގެ ވައްޓަފާޅީގައި ކުޅޭނެ ކުޅުންތެރިން ބިނާ ކުރުމަށް މަސައްކަތް ކުރާ ކަމަށް އޭނާ ބުންޏެވެ. އޭނާ ބުނީ ކޮންމެ ޓީމަކާ ދެކޮޅަށް ނިކުންނައިރު ވެސް، ކުޅުންތެރިން ވިސްނުމުގައި އެ ޓީމާ ވާދަ ކުރެވޭނެ ކަމާއި، ކާމިޔާބު ހާސިލު ކުރެވޭނެކަން ހުންނަން ޖެހޭނެ ކަމަށެވެ.