ރައްޔިތުންނަށް ފޮރުވާނެ އެއްވެސް އެއްޗެއް ނޯންނާނެ، އެކަމަކު ރައްޔިތުންގެ ޓެކްސް ފައިސާ އިން ލިވަޕޫލް އަށް ކުރާ ޚަރަދު ސިއްރު!
ލިވަޕޫލް އާއެކު ރާއްޖެ އިން ސޮއި ކޮށްފައިވާ އެއްބަސްވުމުގެ މުއްދަތަކީ 2025 ވަނަ އަހަރުގެ މާޗު މަހުގެ 13 ވަނަ ދުވަހުން ފެށިގެން، 2028 ވަނަ އަހަރުގެ މެއި މަހުގެ 31 ވަނަ ދުވަހުގެ ނިޔަލަށް. އެ ކެމްޕެއިންގެ ދަށުން ލިވަޕޫލް އަށް ދެނީ ކޮން އަދަދެއްގެ ފައިސާއެއް ކަމެއް ހާމަ ކޮށްފައި ނުވި ނަމަވެސް، އެ ކެމްޕެއިން ކުރިއަށް ގެންދިޔުމަށް އެމްއެމްޕީއާރުސީ އިން ވަނީ 2025 ވަނަ އަހަރަށް 20.6 މިލިއަން ރުފިޔާ ޚަރަދު ކުރުމަށް ނިންމާފައި.
ރާއްޖެ އިޝްތިހާރު ކުރުމުގެ ކެމްޕެއިން ފެއްޓެވުމަށް ރައީސް މުޢިއްޒު، ލިވަޕޫލްގެ އެންފީލްޑަށް ވަޑައިގެންނެވުމުގެ ތެރެއިން
ރާއްޖެ އިޝްތިހާރު ކުރުމަށް ލިވަޕޫލް ފުޓުބޯޅަ ކުލަބާ އެކު ހަދާފައިވާ އެއްބަސްވުމުގެ ދަށުން، އެ ކުލަބަށް ކުރާ ޚަރަދު ބުނެ ދިނުމަށް މޯލްޑިވްސް މާކެޓިން އެންޑް ޕަބްލިކް ރިލޭޝަންސް ކޯޕަރޭޝަން (އެމްއެމްޕީއާރުސީ) އިން ދެކޮޅު ހަދައިފި އެވެ.
ރާއްޖެ އިޝްތިހާރު ކުރުމަށް ލިވަޕޫލާ އެކު އެއްބަސްވެފައިިވާ ކަމަށް އެމްއެމްޕީއާރުސީ އިން އިއުލާން ކޮށްފައި ވަނީ މިއަހަރުގެ މާޗު މަހުގެ 13 ވަނަ ދުވަހު އެވެ. ނަމަވެސް، އޭރު ވެސް އެކަމަށް ހިނގާނެ ޚަރަދެއް އެމްއެމްޕީއާރުސީ އިން ހާމަ ކޮށްފައި ނުވެ އެވެ. އޭގެ ފަހުން އޭޕްރީލް މަހުގެ ތެރޭގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވަނީ، އެ ކެމްޕެއިން ފައްޓަވައި ދެއްވުމަށް އިނގިރޭސިވިލާތަށް ވެސް ވަޑައިގެންފަ އެވެ.
އޭރު ވެސް އެކި އެކި ފަރާތްތަކުން ވަނީ އެކަމަށް ހިނގާ ޚަރަދުގެ ތަފްސީލު ހޯދުމަށް އެދިފަ އެވެ. އޭގެ ފަހުން އަންގާރަ ދުވަހު ރައީސުލްޖުމްހޫރިއްޔާގެ އޮފީހުގައި އޮތް ނޫސްވެރިންގެ ބައްދަލުވުމުގައި ރާއްޖެ ޓީވީ އިން ވަނީ އެ ސުވާލު ކޮށްފަ އެވެ. އެގޮތުން މިހާތަނަށް އައިއިރު، ރާއްޖެ އިޝްތިހާރު ކުރުމުގެ ކެމްޕެއިން އަށް ކިހާ ފައިސާއެއް ލިވަޕޫލް އަށް އަދާ ކޮށްފައިވޭތޯ ސުވާލު ކޮށްފައިވެ އެވެ.
އެ ސުވާލަށް ޖަވާބު ދެއްވަމުން އެމްއެމްޕީއާރުސީގެ މެނޭޖިން ޑިރެކްޓަރު އިބްރާހީމް ޝިއުރީ ވަނީ، ޚަރަދުގެ ތަފްސީލު ނުދެއްވައި ރާއްޖެ އަށް ލިބުނު ކާމިޔާބީ ހިއްސާ ކުރައްވައިފަ އެވެ. އެގޮތުން 397 މިލިއަން މީޑިއާ ރީޗް ލިބިފައިވާ ކަމަށާއި، 17 މިލިއަނަށް ވުރެ ގިނަ އެނުއަލް މީޑިއާ ވެލިއު ލިބިފައިވާ ކަމަށް ފާހަގަ ކުރެއްވި އެވެ. އަދި އިނގިރޭސިވިލާތުގެ ސަރަހައްދުގައި 1000 އިންސައްތަ އަށް ވުރެ ގިނައިން ރާއްޖެ ސާޗު ކޮށްފައިވާ ކަމަށް ފާހަގަ ކުރެއްވި އެވެ. އެއީ ރާއްޖެ އަށް ލިބުނު ވަރަށް ބޮޑު ކާމިޔާބެއް ކަމަށް ޝިއުރީ ވިދާޅުވި އެވެ.
އެހެން ނަމަވެސް، ލިވަޕޫލް އަށް މިހާތަނަށް ކޮށްފައިވާ ޚަރަދުގެ އަދަދެއް ހާމަ ކޮށްދިނުމަށް ތަކުރާރުކޮށް ސުވާލު ކުރުމުން ޝިއުރީ ވިދާޅުވީ، މިވަގުތު ސީދާ އަދަދެއް ދަންނަވަން ދަތި ކަމަށެވެ. އެހެން ނަމަވެސް، ލިވަޕޫލް އާއެކު ހަދާފައިވާ އެއްބަސްވުމާ އެއް ގޮތަށް، ހާމަ ކުރެވެން ހުރި މައުލޫމާތު ކޮންމެ ވެސް މިންވަރަށް ހާމަ ކޮށްފައި ވާނެ ކަމަށް ޝިއުރީ ވިދާޅުވި އެވެ. އަދި ސީދާ އަދަދެއް ޖެހޭނީ ބައްލަވާލައްވަން ކަމަށް ވެސް ވިދާޅުވި އެވެ.
ސީދާ މިވަގުތު އަޅުގަނޑަށް މިވަގުތު ނަންބަރު ދަންނަވާލަން ދަތި. އެހެން ނަމަވެސް އަޅުގަނޑުމެން އިން އެއްބަސްވުމާ އެއްކޮށް، އަޅުގަނޑުމެންނަށް ހާމަ ކުރެވެން ހުރި މައުލޫމާތު ތަކެއް އަޅުގަނޑުމެން މިހާރު ކޮންމެ ވެސް ވަރަކަށް ހާމަ ކޮށްފައި ވާނީ. އެހެންވީމާ އޭގެ ސީދާ އަދަދެއް އަޅުގަނޑު ބަލާލާފައި ހިއްސާކޮށްލާނަން.އިބްރާހީމް ޝިއުރީ / އެމްއެމްޕީއާރުސީގެ އެމްޑީ
ލިވަޕޫލް އާއެކު ރާއްޖެ އިން ސޮއި ކޮށްފައިވާ އެއްބަސްވުމުގެ މުއްދަތަކީ 2025 ވަނަ އަހަރުގެ މާޗު މަހުގެ 13 ވަނަ ދުވަހުން ފެށިގެން، 2028 ވަނަ އަހަރުގެ މެއި މަހުގެ 31 ވަނަ ދުވަހުގެ ނިޔަލަށެވެ. އެ ކެމްޕެއިންގެ ދަށުން ލިވަޕޫލް އަށް ދެނީ ކޮން އަދަދެއްގެ ފައިސާއެއް ކަމެއް ހާމަ ކޮށްފައި ނުވި ނަމަވެސް، އެ ކެމްޕެއިން ކުރިއަށް ގެންދިޔުމަށް އެމްއެމްޕީއާރުސީ އިން ވަނީ 2025 ވަނަ އަހަރަށް 20.6 މިލިއަން ރުފިޔާ ޚަރަދު ކުރުމަށް ނިންމައިފަ އެވެ.
އެމްއެމްޕީއާރުސީގެ މާލީ ޙާލަތު އިންތިހާ އަށް ދަށްވެފައިވާއިރު، އެ ކުންފުނި ބަނގުރޫޓު ވެދާނެ ކަމުގެ ބިރު އޮތް ކަމަށް ރައްޔިތުންގެ މަޖިލީހުގެ ސަރުކާރުގެ ކުންފުނިތަކާ ބެހޭ ކޮމެޓީ އިން ވެސް ވަނީ ބުނެފަ އެވެ.
ލިވަރޕޫލަށް ރައްޔިތުންގެ ޓެކްސް ފައިސާ އިން ކުރާ ހޭދަ ސަރުކާރުން ސިއްރު ކުރި ނަމަވެސް ރައީސް މުހައްމަދު މުއިއްޒު ވެރިކަމަށް ވަޑައިގަތީ އެމަނިކުފާނުގެ ވެރިކަމެއްގައި ރައްޔިތުންނަށް ފޮރުވާނެ އެއްވެސް އެއްޗެއް ނުބާއްވާނެ ކަމަށް ވިދާޅުވެފަ އެވެ.
