ވެނެޒުއޭލާ އަށް އެމެރިކާ އިން ބޮން އަޅައި، އެގައުމުގެ ރައީސް ނިކޮލަސް މަދޫރޯ "ހައްޔަރުކުރުމާ" ގުޅިގެން ދުނިޔޭގެ ގައުމުތަކުން ބުނީ ކީކޭ؟
އެމެރިކާ އިން ވެނެޒުއޭލާ އަށް ދިން އަސްކަރީ ހަމަލާ އާއި ރައީސް މަދޫރޯ ހައްޔަރުކުރުމާ ގުޅިގެން ދުނިޔޭގެ ގިނަ ގައުމުތަކުން ވަނީ އެކަން ކުށްވެރިކޮށްފަ އެވެ. ލެޓިން އެމެރިކާގެ ގައުމުތަކާއި ރަޝިޔާ އަދި އީރާން ފަދަ ގައުމުތަކުން މި އަމަލަކީ ބައިނަލްއަގުވާމީ ގާނޫނާ ޚިލާފު ކަމެއް ކަމަށް ބުނެފައިވޭ.
ޓްރަމްޕް ކަށަވަރުކޮށްދެއްވާ ގޮތުގައި 30 މިނެޓުގެ ވަގުތުކޮޅެއް ހޭދަވި އެމެރިކާގެ އަސްކަރީ އޮޕަރޭޝަނެއްގައިި ވެނެޒުއޭލާގެ ރައީސް ވަނީ އަތުލައިގަނެފައި
އެމެރިކާގެ ރައީސް ޑޮނަލްޑް ޓްރަމްޕް ވިދާޅުވި ގޮތުގައި، އެމެރިކާ ސިފައިން ވަނީ ވެނެޒުއޭލާ އާ ދެކޮޅަށް "ބޮޑު އަސްކަރީ ހަމަލާ އެއް" ދީ، އެ ގައުމުގެ ލީޑަރު ރައީސް ނިކޮލަސް މަދޫރޯ "އަތުލައިގަނެފަ" އެވެ.
ވޮޝިންޓަނުން ވެނެޒުއޭލާ އަށް މި ހަމަލާތައް ދީފައި ވަނީ ހޮނިހިރު ދުވަހުގެ ފަތިހުގެ ވަގުތެއްގަ އެވެ. މިއީ ވެނެޒުއޭލާގެ ރައްޔިތުން އެތައް ހަފުތާ އެއް ކުރިން ފެށިގެން ބިރުގަނެ، ކަންބޮޑުވަމުންދިޔަ ފަދަ ނުރައްކާތެރި ފިޔަވަޅެކެވެ.
އެމެރިކާގެ ޑެޕިއުޓީ ސެކްރެޓަރީ އޮފް ސްޓޭޓް ކްރިސްޓޮފާ ލަންޑައު އެކްސް ގައި ވިދާޅުވި ގޮތުގައި، ވެނެޒުއޭލާ މިހާރު މިވަނީ "އާ ފަތިހަކަށް" އަލިވިލިފައެވެ.
"އަނިޔާވެރި ވެރިޔާ ހިނގައްޖެ. އޭނާ ކުރި ކުށްތަކަށް، އެންމެ ފަހުން އޭނާ އާ އިންސާފު އަރާ ހަމަކުރާނެ،" ލަންޑައު ވިދާޅުވިއެވެ.
އެމެރިކާގެ ބޮން އެޅުމުގެ ހަމަލާތަކަށް ފަހު، މަދޫރޯގެ ސަރުކާރުން ނެރުނު ބަޔާނެއްގައި ވޮޝިންޓަނުން ހިންގީ "އިންތިހާ އަށް ސީރިއަސް އަސްކަރީ އުދުވާނެއް" ކަމަށް ބުނެފައިވެ އެވެ.
ވެނެޒުއޭލާ ސަރުކާރުން ބުނީ، އެމެރިކާގެ މިހާރުގެ ސަރުކާރުން ވެނެޒުއޭލާގެ ބިމަށާއި ރައްޔިތުންނަށް ދިން ނުރައްކާތެރި އަސްކަރީ ހަމަލާތައް ބައިނަލްއަގުވާމީ މުޖުތަމައުގެ ކުރިމަތީގައި ކުށްވެރިކޮށް، އެކަމާ ދެކޮޅު ހަދާ ކަމަށެވެ.
އެމެރިކާގެ މި ހަމަލާ އާއި މަދޫރޯ "ހައްޔަރުކުރުމާ" ގުޅިގެން ދުނިޔޭގެ އެކި ކަންކޮޅުތަކުގައިވާ ގައުމުތަކުން ވަނީ ޝުއޫރު ފާޅުކޮށްފަ އެވެ.
ކޮލަމްބިއާ
ވެނެޒުއޭލާ އަށް ހަމަލާދީފިކަން މުޅި ދުނިޔޭގެ ސަމާލުކަމަށް ގެންނަން،" ކޮލަމްބިއާގެ ރައީސް ގުސްތާވޯ ޕެޓްރޯ އެކްސްގައި ކުރެއްވި ޕޯސްޓުތަކެއްގައި ލިޔުއްވާފައިވެއެވެ.
އަދި އެހެން ޕޯސްޓެއްގައި އޭނާ ވިދާޅުވީ، ވެނެޒުއޭލާ އާއި މުޅި ލެޓިން އެމެރިކާގެ މިނިވަންކަމާއި އިސްތިގުލާލަށް އަރައިގަތުމަށް ދިން ހަމަލާ ކޮލަމްބިއާ އިން ބަލައި ނުގަންނަ ކަމަށެވެ.
މީގެ އިތުރުން، ޕެޓްރޯ ވަނީ ވެނެޒުއޭލާގެ ބޯޑަރު ސަރަހައްދަށް ސިފައިން ފޮނުވުމަށް ނިންމަވާފައެވެ.
ކިއުބާ
ކިއުބާގެ ރައީސް މިގޭލް ޑިއާޒް-ކާނެލް ވަނީ ވަރަށް ބޮޑަށް އެމެރިކާ ކުށްވެރިކުރައްވައި ބަޔާނެއް ނެރުއްވާފަ އެވެ. އޭނާ ތުހުމަތުކުރެއްވި ގޮތުގައި ވޮޝިންޓަނުން ވެނެޒުއޭލާ އާ ދެކޮޅަށް ހިންގީ "ޖިނާއީ އުދުވާނެއް" ކަމަށާއި، ބައިނަލްއަގުވާމީ މުޖުތަމައުން މީގެ ރައްދު އަވަހަށް ދޭންޖެހޭނެ ކަމަށެވެ.
އެކްސްގައި ކުރެއްވި ޕޯސްޓެއްގައި ޑިއާޒް-ކާނެލް ވިދާޅުވީ، ކިއުބާގެ "ސުލްހަވެރި ސަރަހައްދަށް" ވަރަށް އިހާނެތިކޮށް އަރައިގަނެފައިވާ ކަމަށެވެ. އަދި އެމެރިކާގެ މި އަމަލަކީ ހަމައެކަނި ވެނެޒުއޭލާގެ ރައްޔިތުންނަށް އަމާޒުކުރި ކަމެއް ނޫން ކަމަށާއި، މުޅި އެ ސަރަހައްދަށް އަމާޒުކޮށް ހިންގި "ދައުލަތުގެ ޓެރަރިޒަމް" ކަމަށް އޭނާ ސިފަކުރެއްވިއެވެ.
ޗިލީ
ޗިލީގެ ރައީސް ގޭބްރިއަލް ބޮރިކް ފޮންޓް އެކްސްގައި ނެރުއްވި ބަޔާނެއްގައި، ވެނެޒުއޭލާ ގައި އެމެރިކާ އިން ހިންގި އަސްކަރީ ހަރަކާތްތަކާ މެދު ކަންބޮޑުވުން ފާޅުކޮށް، އެކަން ކުށްވެރިކުރެއްވި އެވެ.
"އެ ގައުމަށް ކުރިމަތިވެފައިވާ ސީރިއަސް މައްސަލަތަކަށް ސުލްހަވެރި ހައްލެއް ހޯދުމަށް އަޅުގަނޑުމެން ގޮވާލަން،" އޭނާ ވިދާޅުވިއެވެ.
އޭނާ އިތުރަށް ވިދާޅުވީ، ބާރުގެ ބޭނުން ނުކުރުމާއި، އެހެން ގައުމުތަކުގެ ދާޚިލީ ކަންކަމާ ނުބެހުމާއި، އަދި ގައުމުތަކުގެ ސަރަހައްދީ ފުރިހަމަކަން ދެމެހެއްޓުން ފަދަ ބައިނަލްއަގުވާމީ ގާނޫނުގެ އަސާސީ އުސޫލުތަކަށް ޗިލީން އިހުތިރާމްކުރާ ކަމަށެވެ.
މެކްސިކޯ
ރައީސް ކްލައުޑިއާ ޝީންބޮމް އެކްސް ގައި ވިދާޅުވީ، ވެނެޒުއޭލާގެ ދާޚިލީ ކަންކަމުގެ ތެރެއަށް އަސްކަރީ ގޮތުން ވަނުން މެކްސިކޯ އިން ކުށްވެރިކުރާ ކަމަށެވެ.
އޭނާގެ ޕޯސްޓުގައި އދ. ގެ ޗާޓަރުގެ މާއްދާއެއް ހިމަނާފައިވެއެވެ. އެ މާއްދާގައި ބުނަނީ، އެއްވެސް ގައުމެއްގެ ސިޔާސީ މިނިވަންކަމަށް ބުރުލެއް އަރާފަދަ ގޮތަކަށް ބާރުގެ ބޭނުން ކުރުމުން ނުވަތަ ބިރުދެއްކުމުން އެންމެހާ ގައުމުތަކުން ދުރުހެލިވާން ޖެހޭނެ ކަމަށެވެ.
ބްރެޒިލް
ބްރެޒިލްގެ ރައީސް ލުއިޒް އިނާޝިއޯ ލޫލާ ޑަ ސިލްވާ ވިދާޅުވީ، އެމެރިކާގެ ބޮން އެޅުމާއި މަދޫރޯ ހައްޔަރުކުރުމަކީ "ބަލައިނުގަނެވޭނެ ފަދަ ރަތް ރޮނގެއް" ހުރަސްކުރުން ކަމަށެވެ.
"ބައިނަލްއަގުވާމީ ގާނޫނުތަކާ ކަނޑައެޅިގެން ޚިލާފަށް ގައުމުތަކަށް ހަމަލާ ދިނުމަކީ، އަނިޔާވެރިކަމާއި، ހަލަބޮލިކަމާއި، ނުތަނަވަސްކަމުގެ ތެރެއަށް ދުނިޔެ ވައްޓާލުމަށް އެޅޭ ފުރަތަމަ ފިޔަވަޅު،" ލޫލާ ލިޔުއްވާފައިވެ އެވެ.
ޓްރިނިޑާޑް އެންޑް ޓޮބޭގޯ
ބޮޑުވަޒީރު ކަމްލާ ޕާސާދު-ބިސޭސާ ނެރުއްވި ބަޔާނެއްގައި ވިދާޅުވީ، 3 ޖެނުއަރީ 2026 ގެ ފަތިހު އެމެރިކާ އިން ވެނެޒުއޭލާ ގައި އަސްކަރީ އޮޕަރޭޝަންތަކެއް ފަށާފައިވާ ކަމަށެވެ. ނަމަވެސް، ޓްރިނިޑާޑް އެންޑް ޓޮބޭގޯ އަކީ މި ހަރަކާތްތަކުގައި ބައިވެރިވާ ގައުމެއް ނޫން ކަމަށާއި، އެގައުމުން ވެނެޒުއޭލާގެ ރައްޔިތުންނާއެކު ސުލްހަވެރި ގުޅުމެއް ދަމަހައްޓާނެ ކަމަށް ވިދާޅުވިއެވެ.
އީރާން
އީރާނުގެ ޚާރިޖީ ވުޒާރާ އިން ނެރުނު ބަޔާނެއްގައި، އެމެރިކާގެ އަސްކަރީ ހަމަލާ ހަރުކަށި އިބާރާތުން ކުށްވެރިކޮށް، މިއީ ވެނެޒުއޭލާގެ އިސްތިގުލާލަށް އަރައިގަތުން ކަމަށް ބުނެފައިވެއެވެ.
ރަޝިޔާ
މޮސްކޯ އިން ވަނީ އެމެރިކާގެ މި "އަސްކަރީ އުދުވާނާ" މެދު ނުހަނު ކަންބޮޑުވާކަން ހާމަކޮށް އެކަން ކުށްވެރިކޮށްފަ އެވެ. ރަޝިޔާ ގެ ޚާރިޖީ ވުޒާރާ އިން ބުނީ، މި ހާލަތުގައި އިތުރު ހަމަނުޖެހުންތަކަށް ފުރުސަތު ނުދީ، ވާހަކަދައްކައިގެން ހައްލެއް ހޯދުމަށް އިސްކަންދޭން ޖެހޭ ކަމަށެވެ.
އަދި ބޭރުގެ އަސްކަރީ ނުފޫޒެއް ނެތި، އަމިއްލަ މުސްތަގުބަލު ކަނޑައެޅުމުގެ ހައްގު ވެނެޒުއޭލާ އަށް ލިބިދޭން ޖެހޭނެ ކަމަށް ވެސް ރަޝިޔާ އިން ބުންޏެވެ.
ޔުނައިޓެޑް ކިންގްޑަމް (އިނގިރޭސިވިލާތް)
އިނގިރޭސި ބޮޑުވަޒީރު ކިއަރ ސްޓާމަރ ވިދާޅުވީ، އެމެރިކާ އިން ވެނެޒުއޭލާ އަށް ދިން ހަމަލާތަކުގައި އިނގިރޭސިވިލާތުގެ އެއްވެސް ބައިވެރިވުމެއް ނެތް ކަމަށެވެ. އަދި މިކަމާ ގުޅޭގޮތުން ރައީސް ޓްރަމްޕާ ވާހަކަދައްކަވައި، ހަގީގަތް ސާފުކުރައްވަން ބޭނުންފުޅުވާ ކަމަށް ވިދާޅުވިއެވެ.
ޔޫރަޕިއަން ޔޫނިއަން (އީޔޫ)
އީޔޫގެ ޚާރިޖީ ސިޔާސަތާ ބެހޭ އެންމެ މަތީ ވެރިޔާ ކާޖާ ކަލަސް ވިދާޅުވީ، ވެނެޒުއޭލާގެ ހާލަތު އީޔޫ އިން ވަރަށް ގާތުން ބަލަމުންދާ ކަމަށެވެ. އޭނާ ވިދާޅުވީ، މަދޫރޯގެ ސަރުކާރުގެ ގާނޫނީ ސައްހަކަމެއް ނެތް ކަމަށް އީޔޫއިން ކުރިންވެސް ބުނަމުންދާ ކަމަށާއި، ނަމަވެސް ކޮންމެ ހާލަތެއްގައި ވެސް ބައިނަލްއަގުވާމީ ގާނޫނުތަކަށް އިހުތިރާމް ކުރަން ޖެހޭނެ ކަމަށެވެ.
އިންޑޮނޭޝިއާ
އިންޑޮނޭޝިއާގެ ޚާރިޖީ ވުޒާރާގެ ތަރުޖަމާނު އިވޯން މެވެންކަންގް ވިދާޅުވީ، ވެނެޒުއޭލާ ގައި ތިބި އެގައުމުގެ ރައްޔިތުންގެ ސަލާމަތްތެރިކަން ކަށަވަރުކުރުމަށް މަސައްކަތް ކުރަމުންދާ ކަމަށެވެ. އަދި ހުރިހާ ފަރާތްތަކަކުން ވެސް މަޝްވަރާގެ މަގު އިޚްތިޔާރުކޮށް، އާންމު ރައްޔިތުން ހިމާޔަތްކުރުމަށް އިންޑޮނޭޝިއާ އިން ގޮވާލިއެވެ.
