ވެނެޒުއޭލާ ގެ ވެރިކަން ހިންގާނީ އެމެރިކާ އިން ކަމަށް ޓްރަމްޕް ވިދާޅުވެއްޖެ

ވެނެޒުއޭލާގައި އަމާންކަމާއެކު ވެރިކަން ބަދަލުވަންދެން އެ ގައުމުގެ ކަންކަން ހިންގާނީ އެމެރިކާ އިން ކަމަށް ރައީސް ޑޮނަލްޑް ޓްރަމްޕް ވިދާޅުވެއްޖެއެވެ.

ޓްރަމްޕް މިހެން ވިދާޅުވީ، އެމެރިކާ އިން ވެނެޒުއޭލާ އަށް ހަމަލާތަކެއްދީ، އެ ގައުމުގެ ރައީސް ނިކޮލަސް މަދޫރޯ ހައްޔަރުކުރުމާ ގުޅިގެން، ނޫސްވެރިންގެ ބައްދަލުވުމެއްގައި ވާހަކަފުޅު ދައްކަވަމުންނެވެ.

ވެނެޒުއޭލާގެ ރައީސް ނިކޮލަސް މަދޫރޯ އާއި އޭނާގެ އަނބިކަނބަލުން ސީލިއާ ފްލޯރޭސް ހައްޔަރުކުރުމާ ގުޅިގެން، އެ ގައުމުގެ ތެލުގެ ސިނާއަތުގައި އެމެރިކާގެ ވަރުގަދަ ބައިވެރިވުމެއް އޮންނާނެ ކަމަށް ޓްރަމްޕް ވިދާޅުވިއެވެ. ހައްޔަރު ކުރި ދެމަފިރިން  ގެންނާނީ ނިއުޔޯކަށް ކަމަށާއި އެތަނުގައި އެމީހުންގެ މައްޗަށް ރަސްމީކޮށް ދައުވާ އުފުލުމަށް ހަމަ ޖެހިފައިވާ ކަމަށް ވެސް ޓްރަމްޕް ވިދާޅުވި އެވެ.

އެމެރިކާގެ ރައީސް ވިދާޅުވީ، އަމާން، އިންސާފުވެރި އަދި އެކަށީގެންވާ ގޮތެއްގައި ވެރިކަން ބަދަލުކުރެވެންދެން ވެނެޒުއޭލާ "ހިންގާނީ" އެމެރިކާއިން ކަމަށެވެ.

އެމެރިކާއިން ވެނެޒުއޭލާ ހިންގުމުގެ މާނައަކީ އެ ގައުމުގެ ބިމަށް އެމެރިކާގެ ސިފައިން ފޮނުވުންތޯ ސުވާލު ކުރުމުން ޖަވާބުގައި ޓްރަމްޕް ވިދާޅުވީ، އެ ގައުމަށް އެމެރިކާގެ ސިފައިން ފޮނުވަން އެމެރިކާ ޖެހިލުން ނުވާ ކަމަށާއި، ރޭގެ ވަގުތެއްގައި ވެސް އެމެރިކާގެ އަސްކަރިއްޔާ އިން ވަނީ ވަރަށް މަތީ ފެންވަރެއްގައި އެ ގައުމުގައި ހަރަކާތްތެރިވެފައި ކަމަށެވެ. 

ވެނެޒުއޭލާ ހިންގުމުގައި އަމަލުކުރާނީ ކޮން އުސޫލަކުންތޯ ސުވާލު ކުރުމުން ޓްރަމްޕް ވިދާޅުވީ، އެކަމަށް ބޭނުންވާ މީހުން މިހާރު ކަނޑައަޅަމުންދާ ކަމަށާއި، އެއީ ކޮން ބައެއްކަން ވަރަށް އަވަހަށް ހާމަކުރައްވާނެ ކަމަށެވެ.

ވެނެޒުއޭލާގެ ވެރިކަން ހިންގާނީ ސީދާ ކޮން ބައެއްތޯ ދެންނެވުމުން އެ ސުވާލުގެ ޖަވާބުގައި، ޓްރަމްޕްގެ ފަހަތްޕުޅުގައި ހުންނެވި އެމެރިކާގެ ސެކްރެޓަރީ އޮފް ސްޓޭޓް މާކޯ ރޫބިއޯ އަށް އިޝާރާތް ކުރައްވަމުން ވިދާޅުވީ، ކުރިއަށް އޮތް ދުވަސްތަކުގައި އެ ގައުމު ހިންގުމުގެ ޒިންމާ ބޮޑަށް އުފުލާނީ އޭނާގެ ފަހަތުގައި ތިއްބެވި ބޭފުޅުން ކަމަށެވެ.

އަނެއްކޮޅުން ވެނެޒުއޭލާގެ ޑިފެންސް މިނިސްޓަރު ލަޑިމިއާ ޕަޑްރީނޯ ލޮޕޭޒް ވިދާޅުވީ، އެ ގައުމުން ކާމިޔާބު ހޯދާނެ ކަމަށާއި، ދުޝްމަނުންނާ އެކު އެއްވެސް މަޝްވަރާއެއް ނުކުރާނެ ކަމަށާއި، އަދި އަމާން ނުދޭނެ ކަމަށެވެ. މީގެ ކުރިން ވެނެޒުއޭލާގެ ސަރުކާރުން ވަނީ، އެމެރިކާއިން އެ ގައުމުގެ އެކި ސްޓޭޓްތަކުގައި ހުރި އާންމުންގެ ތަންތަނަށާއި އަސްކަރީ މަރުކަޒުތަކަށް ހަމަލާދީފައިވާ ކަމަށް ބުނެ، ވޮޝިންޓަނުން ހިންގަމުންދާ "އަސްކަރީ އުދުވާންތައް" ކުށްވެރިކޮށްފައެވެ.

މި ހަމަލާތައް ދީފައިވަނީ މަދޫރޯގެ މައްޗަށް މަސްތުވާތަކެތީގެ ވިޔަފާރިކުރާ ކަމުގެ ތުހުމަތު އެމެރިކާއިން ކުރުމާ ގުޅިގެން ދެ ގައުމުގެ ދެމެދުގައި މަސްރަހު ގޯސްވެފައި އޮންނަތާ މަސްތަކެއް ވެފައިވަނިކޮށެވެ. ސެޕްޓެމްބަރު މަހުން ފެށިގެން އެމެރިކާ އިން ވަނީ ވެނެޒުއޭލާ ކައިރި ކަނޑުގެ ސަރަހައްދަށް 20 އަށް ވުރެ ގިނަ ވައިގެ ހަމަލާ ދީފައެވެ. ނަމަވެސް، މަދޫރޯ ވަނީ އޭނާގެ މައްޗަށް ކުރެވޭ ތުހުމަތުތަކަށް ތަކުރާރުކޮށް އިންކާރު ކުރައްވާފައެވެ.