އެމެރިކާ އިން ވެނެޒުއެލާ އަށް ހަމަލާ ދީފި، ޓްރަމްޕް ވިދާޅުވީ މަދޫރޯ އާއި އޭނާގެ އަނބިކަނބަލުން ހައްޔަރު ކޮށްފައިވާ ކަމަށް

ވެނެޒުއެލާ އަށް އަމާޒުކޮށް އެމެރިކާ އިން ހަމަލާ ތަކެއް ދީފައިވާއިރު، ވެނެޒުއެލާގެ ރައީސް ނިކޮލަސް މަދޫރޯ އާއި އޭނާ ގެ އަނބިކަނބަލުން ހައްޔަރު ކޮށްފައިވާ ކަމަށް އެމެރިކާގެ ރައީސް ޑޮނަލްޑް ޓްރަމްޕް ވިދާޅުވެއްޖެ އެވެ.

ޓްރަމްޕް އޭނާ ގެ ޓުރުތު ސޯޝަލް މީޑިއާގައި ކުރެއްވި ޕޯސްޓެއްގައި ވިދާޅުވީ، އެމެރިކާ އިން ވެނެޒުއެލާ އާއި އެ ޤައުމުގެ ރައީސް މަދޫރޯއާ ދެކޮޅަށް ބޮޑެތި ހަމަލާ ތަކެއް ކާމިޔާބު ކަމާ އެކު ދީފައިވާ ކަމަށެވެ. އެ ހަމަލާ ތަކުގައި މަދޫރޯ އާއި އޭނާ ގެ އަނބިކަނބަލުން ހައްޔަރުކޮށް، އެ ޤައުމުން ބޭރަށް ގެންގޮސްފައިވާ ކަމަށް ވެސް ޓްރަމްޕް ވިދާޅުވި އެވެ. 

އެމެރިކާގެ ރައީސް ޑޮނަލްޑް ޓްރަމްޕް ހޮނިހިރު ދުވަހު ވިދާޅުވީ އެމެރިކާއިން ވެނެޒުއެލާގެ ރައީސް ނިކޮލަސް މަދޫރޯ އަދި އެމަނިކުފާނުގެ އަނބިކަނބަލުން ހައްޔަރުކޮށް، އެ ގައުމުން ބޭރަށް ގެންގޮސްފައިވާ ކަމަށެވެ.

އެމެރިކާ އިން ވެނެޒުއެލާ އަށް އަމާޒުކޮށް ހަމަލާ ތަކެއް ދީފައިވާއިރު، އެ ޤައުމުގައި ވަނީ ކުއްލި ނުރައްކަލުގެ ޙާލަތު ވެސް އިއުލާން ކޮށްފަ އެވެ. އެ ހަމަލާގެ އިތުރު ތަފްސީލެއް އެމެރިކާ އަދި ޓްރަމްޕް ވެސް ހިއްސާ ކޮށްފައި ނުވެ އެވެ. މީގެ ކުރިން ވެސް އެމެރިކާ އިން ވަނީ ވެނެޒުއެލާގެ ބަނދަރަކަށް އަމާޒުކޮށް ހަމަލާ ދީފަ އެވެ. 

ވެނެޒުއެލާ އާއި އެމެރިކާއާ ދެމެދު އޮތް ގުޅުން ވަރަށް ބޮޑަށް ގޯސްވެފައިވާއިރު، އެމެރިކާ އިން މަދޫރޯގެ ސަރުކާރު ޤަބޫލެއް ނުކުރެ އެވެ. އެމެރިކާ އިން އަންނަނީ ވެނެޒުއެލާ އާއި އެ ޤައުމުގެ އިޤްތިޞާދަށް އަމާޒުކޮށް ދަތި ކުރުމުގެ ފިޔަވަޅުތައް ވެސް އަޅަމުންނެވެ. 

މަދޫރޯ ހައްޔަރު ކޮށްފައިވާ ކަމަށް ޓްރަމްޕް ވިދާޅުވެފައި ވީ ނަމަވެސް، ވެނެޒުއެލާގެ ރަސްމީ އިދާރާ އަކުން އެކަމާ ގުޅިގެން އެއްވެސް ބަޔާނެއް ނެރެފައި ނުވެ އެވެ. އަދި މަދޫރޯ ހައްޔަރު ކޮށްފައިވާކަން ކަށަވަރު ކޮށްދޭ އެއްވެސް މަސްދަރެއް ނެތެވެ.