އީރާނުގައި ކުރިއަށްދާ މުޒާހަރާތަކުގެ ތެރެއަށް އެމެރިކާއިން ވަދެގަންނަން މަސައްކަތްކޮށްފިނަމަ، މުޅި ސަރަހައްދު ހަލަބޮލިވެ، ބޮޑެތި ހަމަނުޖެހުންތަކަކާ ކުރިމަތިލާން ޖެހިދާނެ ކަމުގެ އިންޒާރު އީރާނުން ދީފި

އީރާނުގައި ކުރިއަށްދާ މުޒާހަރާތަކުގެ ތެރެއަށް އެމެރިކާއިން ވަދެގަންނަން މަސައްކަތްކޮށްފިނަމަ، މުޅި ސަރަހައްދު ހަލަބޮލިވެ، ބޮޑެތި ހަމަނުޖެހުންތަކަކާ ކުރިމަތިލާން ޖެހިދާނެ ކަމުގެ އިންޒާރު އީރާނުގެ ރޫހާނީ ލީޑަރުގެ އިސް މުޝީރު ޢަލީ ލަރިޖާނީ ދެއްވައިފިއެވެ.

ލަރިޖާނީ މި އިންޒާރު ދެއްވާފައިވަނީ، ސުލްހަވެރިކަމާއެކު މުޒާހަރާކުރާ މީހުންނާ ދެކޮޅަށް އީރާނުން ބާރުގެ ބޭނުންކޮށްފިނަމަ، އެމެރިކާއިން އެކަމުގެ ތެރެއަށް ވަންނާނެ ކަމަށް ބުނެ ރައީސް ޑޮނަލްޑް ޓްރަމްޕް އިންޒާރު ދެއްވުމާ ގުޅިގެން ހުކުރު ދުވަހުއެވެ.

ޓްރަމްޕް ވިދާޅުވީ، ސުލްހަވެރިކަމާއެކު މުޒާހަރާކުރާ މީހުން ގަޔަށް ބަޑިޖަހައި މަރާނަމަ، އެ މީހުންގެ ދިފާއުގައި އެމެރިކާއިން ނުކުންނާނެ ކަމަށެވެ. އަދި އޭނާގެ "ޓްރުތް ސޯޝަލް" މީޑިއާގައި ކުރެއްވި ޕޯސްޓެއްގައި، އެމެރިކާގެ ސިފައިން ތިބީ އެކަމަށް ފުރިހަމައަށް ތައްޔާރުވެގެން ކަމަށްވެސް ބުނެފައިވެއެވެ.

އީރާނުގައި ހަމަނުޖެހުންތައް އުފެދިފައިވަނީ، އިގްތިސާދީ ދަތިތަކާ ގުޅިގެން ދިރިއުޅުމުގެ އަގު ބޮޑުވުމާ ގުޅިގެންނެވެ. މިއީ އީރާނުގެ އެކި ސަރަހައްދުތަކުގައި ފާއިތުވި ތިން އަހަރުގެ ތެރޭގައި ހިނގަމުންދާ އެންމެ ބޮޑު މުޒާހަރާތައް ކަމަށް ރިޕޯޓުތަކުގައިވެ އެވެ. މި މުޒާހަރާތަކުގައި ބައެއް މީހުން ވަނީ މަރުވެފައެވެ.

މުޒާހަރާކުރާ މީހުންނާއި ސަލާމަތީ ބާރުތަކާ ދެމެދު ހިނގަމުންދާ ކުރިމަތިލުންތައް ވަނީ މުޅި ގައުމަށް ފެތުރި، ބޮޑު ހަމަނުޖެހުމަކަށް ބަދަލުވެފައެވެ. މިއީ އީރާނުގެ ފައިސާގެ އަގު ދަށްވެ، ތަކެތީގެ އަގު އިންތިހާއަށް އުފުލުމާ ގުޅިގެން، ސަރުކާރުގެ ސިޔާސަތުތަކާ ދެކޮޅަށް ވިޔަފާރިވެރިން ފެށި މުޒާހަރާތަކެކެވެ.

2018 ވަނަ އަހަރު ޓްރަމްޕްގެ ފުރަތަމަ ދައުރުގައި އަޅާފައިވާ ފިޔަވަޅުތައް އެމެރިކާއިން އަނެއްކާ ވެސް އިއާދަ ކުރި ފަހުން، އެ ގައުމުގެ އިގްތިސާދު ވަނީ ވަރަށް ބޮޑަށް އަޑިއަށް ގޮސްފައެވެ.