މަސްތުވާތަކެތީގެ މައްސަލަ އާ ގުޅޭ ގޮތުން އެމެރިކާ އާއެކު މަޝްވަރާކުރުމަށް ތައްޔާރަށް ހުންނެވި ކަމަށް ވެނެޒުއޭލާގެ ރައީސް ނިކޮލަސް މަދޫރޯ ވިދާޅުވެއްޖެ

ވެނެޒުއޭލާގެ ސަރުކާރަށް އެމެރިކާއިން ކުރިމަތިކުރަމުންދާ ފިއްތުންތައް އިތުރުވެފައިވާ ދަނޑިވަޅެއްގައި، މަސްތުވާތަކެތީގެ ވިޔަފާރިއާއި ތެލުގެ މުޢާމަލާތްތަކާ ގުޅޭގޮތުން އެމެރިކާ އާއެކު މަޝްވަރާކުރުމަށް ތައްޔާރަށް ހުންނެވި ކަމަށް އެޤައުމުގެ ރައީސް ނިކޮލަސް މަދޫރޯ ބުރާސްފަތި ދުވަހު ވިދާޅުވެއްޖެ އެވެ.

ވެނެޒުއޭލާގެ ދައުލަތުގެ ޓީވީއަށް ދެއްވި ބަސްދީގަތުމެއްގައި މަދޫރޯ ވިދާޅުވީ، އެމެރިކާއިން ބޭނުން ކޮންމެ ވަގުތެއްގައި އަދި ކޮންމެ ތަނެއްގައިވެސް މަޝްވަރާގެ މޭޒަށް ވަޑައިގަތުމަށް އޭނާ ހުންނެވީ ތައްޔާރަށް ކަމަށެވެ.

ވެނެޒުއޭލާގެ ބަނދަރަކަށް އެމެރިކާއިން ދިން ކަމަށް ބުނާ ޙަމަލާއަކާ ގުޅޭގޮތުން ރައީސް ޑޮނަލްޑް ޓްރަމްޕް ދެއްކެވި ވާހަކަފުޅާ ބެހޭގޮތުން ސުވާލުކުރުމުން، މަދޫރޯ ވަނީ އެ ސުވާލަށް ސީދާ ޖަވާބެއް ދެއްވުމަށް އުޒުރުވެރިވެވަޑައިގެންފައެވެ. ރިޕޯޓްތައް ބުނާގޮތުން މި ޙަމަލާއަކީ އެމެރިކާގެ ސީ.އައި.އޭ އިން ދީފައިވާ ޙަމަލާއެކެވެ. 

ފާއިތުވި ތިން މަސްދުވަހުގެ ތެރޭގައި، ކެރީބިއަން ކަނޑާއި އިރުމަތީ ޕެސިފިކް ސަރަޙައްދުން މަސްތުވާތަކެތި ހިފައިގެން ދަތުރުކުރާ ކަމަށް ޝައްކުކުރެވޭ އުޅަނދުތަކަށް އަމާޒުކޮށް އެމެރިކާގެ އަސްކަރިއްޔާއިން ދަނީ ޙަމަލާތައް ދެމުންނެވެ.

ޓްރަމްޕް ސަރުކާރުން "މަސްތުވާތަކެއްޗާ ދެކޮޅަށް ކުރާ ހަނގުރާމަ" އިގެ ދަށުން މިހާތަނަށް 30ށް ވުރެ ގިނަ އުޅަނދަށް ޙަމަލާދީފައިވާއިރު، ސެޕްޓެމްބަރު 2 ވަނަ ދުވަހުން ފެށިގެން މިހާތަނަށް 110ށް ވުރެ ގިނަ މީހުން ވަނީ މަރުވެފަ އެވެ.

އެންމެ ފަހުން ދިން ޙަމަލާގައި، މިދިޔަ ބުދަ ދުވަހު މަސްތުވާތަކެތި އުފުލާ ކަމަށް ތުހުމަތުކުރެވޭ ދެ އުޅަނދަކަށް ޙަމަލާދީ އޭގައި ތިބި ފަސް މީހަކު މަރުވެފައިވާ ކަމަށް އެމެރިކާގެ އަސްކަރިއްޔާއިން ބުނެ އެވެ.

ވެނެޒުއޭލާގެ މަސްތުވާތަކެތި އުފުލާ އުޅަނދުތަކާ ގުޅުންހުރި ބަނދަރު ސަރަޙައްދަކަށް އެމެރިކާއިން ޙަމަލާދީ ގޮއްވާލާފައިވާ ކަމަށް ޓްރަމްޕް ހޯމަ ދުވަހު ވަނީ ވިދާޅުވެފައެވެ. ސީ.އެން.އެން އާއި ނިއުޔޯކް ޓައިމްސް އިން ރިޕޯޓްކޮށްފައިވާ ގޮތުގައި މިއީ ސީ.އައި.އޭ އިން ޑްރޯން ބޭނުންކޮށްގެން ދީފައިވާ ޙަމަލާއެކެވެ. މިކަން ކަށަވަރުވެއްޖެނަމަ، މިއީ ވެނެޒުއޭލާގެ އެތެރޭގައި އެމެރިކާއިން ހިންގި މިފަދަ ފުރަތަމަ އޮޕަރޭޝަނަށް ވެގެންދާނެ އެވެ.

ނަމަވެސް، މި ޙަމަލާ ކަށަވަރުކޮށްދިނުމަށް ނުވަތަ ދޮގުކުރުމަށް މަދޫރޯއަށް ދެންނެވުމުން އޭނާ ވިދާޅުވީ، އެއީ ކުރިއަށް އޮތް ދުވަސްތަކުގައި ދެއްކިދާނެ ވާހަކައެއް ކަމަށެވެ.

މަސްތުވާތަކެތީގެ އިތުރުން، ތެލުގެ ވިޔަފާރިއާއި ހިޖުރަކުރުމުގެ މައްސަލަތަކާ ގުޅޭގޮތުންވެސް މަޝްވަރާކުރަން ތައްޔާރަށް ހުންނެވި ކަމަށް މަދޫރޯ ވިދާޅުވިއެވެ. ރައީސް ޓްރަމްޕް ވަނީ، އެއްވެސް ހެއްކެއް ނެތި، މަދޫރޯގެ ސަރުކާރުން ޖަލުތަކާއި ނަފްސާނީ ބަލިމީހުން ބައިތިއްބާ މަރުކަޒުތައް ހުސްކޮށް، އެތަންތަނުގައި ތިބި މީހުން އެމެރިކާއަށް ހިޖުރަކުރަން މަޖުބޫރުކުރާ ކަމަށް ތުހުމަތުކުރައްވާފަ އެވެ.

މީގެ އިތުރުން، ވެނެޒުއޭލާއަށް ވަންނަ އަދި އެޤައުމުން ބޭރުވާ ތެޔޮ އުފުލާ ބޯޓުފަހަރާ ދެކޮޅަށްވެސް އެމެރިކާއިން ދަނީ ފިޔަވަޅު އަޅަމުންނެވެ. ޑިސެމްބަރު 10 ވަނަ ދުވަހު ވެނެޒުއޭލާ ކައިރިން ތެޔޮ އުފުލާ ބޯޓެއް އެމެރިކާއިން ހިފަހައްޓާފައިވަނީ، އެއީ އީރާނާއި ވެނެޒުއޭލާގެ މައްޗަށް އަޅާފައިވާ ދަތިކުރުމުގެ ފިޔަވަޅުތަކާ ޚިލާފަށް ތެޔޮ އުފުލާ ބޯޓެއް ކަމަށް ބުނެ އެވެ. ވެނެޒުއޭލާ އިން މިކަން ސިފަކޮށްފައިވަނީ "ބައިނަލްއަޤްވާމީ ފޭރުމުގެ" އަމަލެއްގެ ގޮތުގައެވެ. އޭގެ ފަހުން އެމެރިކާއިން ވަނީ އިތުރު ބޯޓެއް ހިފަހައްޓައި، ތިންވަނަ ބޯޓެއް ހޯދުމުގެ މަސައްކަތް ފަށާފަ އެވެ.

ޓްރަމްޕް ސަރުކާރުން މަސްތުވާތަކެތި އުފުލާ ކަމަށް ބުނާ އުޅަނދުތަކާ ދެކޮޅަށް ހިންގާ އޮޕަރޭޝަންތަކަކީ ހަނގުރާމައެއްގެ ގޮތުގައި ސިފަކުރި ނަމަވެސް، ޤާނޫނީ މާހިރުން ބުނާގޮތުގައި މިއީ ބައިނަލްއަޤްވާމީ ޤާނޫނުތަކާ ޚިލާފު ކަމަކަށް ވުން އެކަށީގެންވެއެވެ. އެމެރިކާއިން މިހާތަނަށް އެ އުޅަނދުތަކުގައި މަސްތުވާތަކެތި ހުރި ކަމުގެ އެއްވެސް ހެއްކެއް ދައްކާފައެއް ނުވެއެވެ. ނަމަވެސް އެމެރިކާގެ ސަަދަން ކޮމާންޑުން މި ހަފްތާގައިވެސް ބުނެފައިވަނީ، އެ އުޅަނދުތަކަކީ މަސްތުވާތަކެތީގެ ވިޔަފާރިކުރާ މަގުތަކުން ދަތުރުކޮށް، އެ ވިޔަފާރީގައި ބައިވެރިވާ އުޅަނދުތަކެއްކަން ޖާސޫސީ މަޢުލޫމާތުން ކަށަވަރުވާ ކަމަށެވެ.