ރައީސް މުއިއްޒުގެ މަތިވެރިކަން ދެއްކުމަށް ބޭއްވި ޑްރޯން ޝޯ އަށް، ރައްޔިތުންގެ ފައިސާ އިން 1.5 މިލިއަން ރުފިޔާ އިސްރާފު ކޮށްފި
ހުޅުމާލޭގައި ބޭއްވި ޑްރޯން ޝޯއަށް ސަރުކާރުން އެއް ލައްކަ ޑޮލަރު ހަރަދުކޮށްފައިވާ އިރު، ޝޯގައި ރައީސް މުއިއްޒުގެ ސޫރަ ދައްކާލުމުން ރައްޔިތުން ވަނީ ފާޑުކިޔާފައި. އިގްތިސާދު ދަށްވެފައިވާ މި ދަނޑިވަޅުގައި ސަރުކާރުން މިފަދަ ބޭކާރު ހަރަދު ކުރުމުން ގިނަ އަދަދެއްގެ ރައްޔިތުން ވަނީ ކަންބޮޑުވުން ފާޅުކޮށްފަ
ހުޅުމާލޭގައި ބޭއްވި ޑްރޯން ޝޯ ގައި، ރައީސް މުއިއްޒު ގެ ސޫރަ ވަނީ ދައްކާލާފަ؛ ގައުމުގެ އިގްތިސާދީ ހާލަތަށް ބެލުމެއް ނެތި ވެރިންގެ މަތިވެރިކަން ދެއްކުމަށް މިފަދަ ކަންކަން ކުރުމަކީ ހުދުމުހުތާރު ވެރިންގެ އާދަ އެއް
އާ އަހަރު ފެށުން ފާހަގަކުރުމުގެ ނަމުގައި ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ މަތިވެރިކަން ދެއްކުމަށް، ބުދަ ދުވަހުގެ ރޭ ހުޅުމާލޭގައި ބޭއްވި ޑްރޯން ޝޯއަށް ރައްޔިތުންގެ ފައިސާއިން އެއް ލައްކަ ޑޮލަރު އިސްރާފު ކޮށްފައިވާ ކަމަށް މައުލޫމާތު ލިބިއްޖެ އެވެ.
މިއީ ބޭންކު ރޭޓުން ބެލިޔަސް 1.5 މިލިއަން ރުފިޔާއަށް ވުރެ ބޮޑު އަދަދެކެވެ.
ރާއްޖެ އެމްވީ އަށް މައުލޫމާތު ލިބިފައިވާ ގޮތުގައި ބުދަ ދުވަހުގެ ރޭ ބޭއްވި ފަނަރަ މިނިޓުގެ ޑްރޯން ޝޯއަށް ހަ ސަތޭކަ އެއްހާ ޑްރޯން ބޭނުންކޮށްފައިވެ އެވެ. އޭގެ ތެރޭގައި ޕައިރޯ ޑްރޯންގެ ގޮތުގައި ހަތްދިހަ ފަހެއް ޑްރޯން ބޭނުންކޮށްފައިވެ އެވެ. އާންމުކޮށް ބޭނުންކުރާ ޑްރޯން އާއި ޕައިރޯ ޑްރޯންގެ ތަފާތަކީ އެ ޑްރޯންތަކުން ހަވާގެ ކުޅިވަރުތައް ވެސް ފެންނަ ކަމެވެ.
ހުޅުމާލޭ ސެންޓްރަލް ޕާކުގައި ބޭއްވި ޑްރޯން ޝޯގައި ރައީސް މުއިއްޒުގެ ސަރުކާރުން ރައްޔިތުންނަށް ދައްކުވައިދޭން މަސައްކަތް ކުރީ ރައީސް މުއިއްޒު ވަރުގެ ހިދުމަތްތެރި ވެރިޔަކު ރާއްޖެ ނުދެކޭ ކަމެވެ. ނަމަވެސް ސަރުކާރަށް ދެ އަހަރު ވެގެން ގޮސްފައިވާ އިރު ރައީސް މުއިއްޒުގެ ސޫރަ އެތައް މިލިއަން ރުފިޔާ ހަރަދުކޮށްގެން ޖައްވުގައި ކުރަހާ ވަރު އަދި ނުވާ ކަމަށް ގިނަ ބަޔަކު ބުނެ އެވެ.
ޑްރޯން ޝޯގައި ރައީސް މުއިއްޒު ސިފަވާ ގޮތަށް ދެއްކުމުން ގިނަ ބަޔަކު ސޯޝަލް މީޑިއާގައި ބުނަމުންދަނީ އެއީ ހުދުމުހުތާރު ގައުމުތަކުގައި ވެރިންގެ ހައިބަތު ބޮޑުކަމަށް ދެއްކުމަށް ކުރާ ކަމެއް ކަމަށެވެ.
ބައެއް މީހުން ބުނާ ގޮތުގައި އިސްލާމީ ފަތުވާ ދޭ އެންމެ މަތީ މަޖިލީހުން ނެރުނު ފަތުވާގައި ބަޔާންކޮށްފައިވާ ގޮތުގައި ދިރޭ އެއްޗެއްގެ ސިފައިގައި ބުދު، މޮނިއުމެންޓް ނުވަތަ އެނޫންވެސް އެފަދަ އެއްޗެއް ހެދުމާއި ބެހެއްޓުމަކީ ދީނީ ގޮތުން ހުއްދަ ނޫން ކަމަށެވެ. އެހެންކަމުން ފަތުވާ މަޖިލީހުން ނެރެފައިވާ ފަތުވާގެ ދަށުން ރައީސް މުއިއްޒުގެ ސޫރަ ޑްރޯން ޝޯގެ ތެރެއިން ދެއްކިގެން ނުވާނެ ކަމަށް މީހުން ބުނަމުންދާއިރު އެ މައްސަލަ ފަތުވާ މަޖިލީހުން ބެލުމަށް ވެސް ބައެއް މީހުން ވަނީ ގޮވާލާފަ އެވެ.
މީގެ އިތުރުން ރާއްޖޭގެ އިގްތިސާދު މިއިން ޒަމާނަކު ދަށަށް ނުދާ ވަރަށް ދަށްވެފައިވާ މި ދަނޑިވަޅުގައި މިފަދަ ކަންކަމަށް ސަރުކާރުގެ ފަރާތުން ބޭކާރު ހަރަދު ކުރާތީ ގިނަ އަދަދެއްގެ ރައްޔިތުން ވަނީ ކަންބޮޑުވުން ފާޅުކޮށްފަ އެވެ. ރައްޔިތުންގެ މެދުގައި މި ކަންކަމާ ގުޅިގެން ސަރުކާރަށް ފާޑުކިޔުންތައް އަމާޒުވަމުންދާއިރު ސަރުކާރުން މި މައްސަލައާ ގުޅިގެން އަދި އެއްވެސް ވާހަކައެއް ދައްކާފައެއް ނުވެއެވެ.
