ރައީސް މުއިއްޒު ސިންގަޕޫރަށް ކުރައްވާ 6 ވަނަ ދަތުރުފުޅު ގައި ފުރާވަޑައިގެންފި
ރައީސް މުއިއްޒު އަނބިކަނބަލުންނާއެކު ހޮނިހިރު ދުވަހު ނުރަސްމީ ދަތުރެއްގައި ސިންގަޕޫރަށް ފުރާވަޑައިގެންފި. މިއީ ރައީސް މުއިއްޒު ވެރިކަމަށް ވަޑައިގެންނެވި ފަހުން ސިންގަޕޫރަށް ކުރައްވާ ހަވަނަ ދަތުރު ކަމަށްވާއިރު، ރައީސް އޮފީހުން ދަތުރުގެ ބޭނުމާ ގުޅޭ ގޮތުން އެއްޗެއް ބުނެފަ އެއް ނުވޭ.
ރައީސް މުއިއްޒު ގެ ދެ ކަނބަލުން
ރައީސުލްޖުމްހޫރިއްޔާ ޑރ މުހައްމަދު މުއިއްޒު އަނބިކަނބަލުން ސާޖިދާ މުހައްމަދާއެކު ނުރަސްމީ ދަތުރެއްގައި ސިންގަޕޫރަށް ފުރާވަޑައިގެންފައިވާ ކަމަށް ރައީސް އޮފީހުން ހާމަކޮށްފި އެވެ.
ރައީސް އޮފީހުން ބުނީ އެމަނިކުފާނާއި އަނބިކަނބަލުން ސިންގަޕޫރަށް ފުރާވަޑައިގެންނެވީ ހޮނިހިރު ދުވަހު ކަމަށެވެ.
މިއީ ރައީސް މުއިއްޒު ވެރިކަމަށް ވަޑައިގެންނެވި ފަހުން ސިންގަޕޫރަށް ކުރައްވާ ހަ ވަނަ ދަތުރެވެ. އެއީ ނުރަސްމީ ފަސް ދަތުރާއި ރަސްމީ އެއް ދަތުރެވެ. މީގެ ތެރެއިން ފަސް ދަތުރެއްގައި އަނބިކަނބަލުން ބައިވެރިވެވަޑައިގެންނެވި އެވެ.
ރައީސް މުއިއްޒު ސިންގަޕޫރަށް ވަޑައިގަންނަވަނީ ބޭސްފަރުވާ އަށް ކަމަށް މީގެ ކުރިން އަޑުފެތުރިފައިވެ އެވެ. ނަމަވެސް މިކަމާ ގުޅޭ ގޮތުން ރައީސް އޮފީހުން އަދި އެއްވެސް ރަސްމީ ބަޔާނެއް ނެރެފައެއް ނުވެ އެވެ. ރައީސުންގެ ސިއްހީ ހާލަތާ ބެހޭ ގޮތުން ބައެއް އެހެން ގައުމުތަކުގައި މައުލޫމާތު އާންމުކުރި ނަމަވެސް ރާއްޖޭގައި އެކަން ކުރަމުން ނުދާތީ މިކަމުގެ ހަގީގަތް ސާފު ކުރެވިފަ އެއް ނުވެ އެވެ.
ރައީސުލްޖުމްހޫރިއްޔާގެ ދަތުރުތަކާ ގުޅޭ ގޮތުން އާންމުންގެ ސުވާލުތައް އުފެދިފައިވާއިރު، ރައީސް އޮފީހުން މި ދަތުރުތަކާ ގުޅޭ ގޮތުން އިތުރު ތަފުސީލު ހާމަ އެއް ނުކުރެ އެވެ. ރައީސް ގެ ދަތުރުގެ މުއްދަތާއި އަނބުރާ ވަޑައިގަންނަވާނެ ތާރީހާ ބެހޭ ގޮތުން ރައީސް އޮފީހުން އެއްވެސް މައުލޫމާތެއް އަދި ހާމަކޮށްފައެއް ނުވެ އެވެ.
