އައު އަހަރު ފާހަގަ ކުރަން މުންކަރާތްތައް ހިންގުމުން މުއިއްޒުގެ މުނާފިގުކަން އިތުރަށް ހާމަވެއްޖެ: ޑރ. އިޔާޒް
ދީނަށް ވަރަށް ލޯބި ކުރައްވާ ކަމަށް މީސްތަކުންނަށް ދެއްކިގެން ވެރިކަން ހޯއްދެވި ބޭފުޅަކު އައު އަހަރު ފާހަގަ ކުރުންފަދަ މުންކަރާތްތައް ހިންގެވުމަކީ އެމަނިކުފާނުގެ މުނާފިޤުކަން އިތުރަށް ހާމަވާ ކަމެއް ކަން ޑރ. އިޔާޒް ފާހަގަ ކުރެއްވި.
2026 ވަނަ އަހަރަށް މަރުހަބާ ކިޔުމަށް ޑްރޯން ޝޯ އަށް ފަހު ބަޑިބޭހުގެ ކުޅިވަރުތަކާއި ސަގާފީ އައިޓަމްތައް ހުޅުމާލޭގައި އޮތް
އައު އަހަރު ފާހަގަ ކުރަން މުންކަރާތްތައް ހިންގުމުން ރައީސް ޑރ. މުހައްމަދު މުއިއްޒުގެ މުނާފިގުކަން އިތުރަށް ހާމަވެއްޖެ ކަމަށް މަޝްހޫރު ދީނީ އިލްމުވެރިޔާ ޑރ. މުހައްމަދު އިޔާޒް ވިދާޅުވެއްޖެ އެވެ.
އައު އަހަރުގެ ފެށުން ފާހަގަ ކުރުމަށް ސަރުކާރުން ހުޅުމާލޭ ގައި އިންތިޒާމު ކުރި ޑްރޯން ޝޯވ ގައި އިންސާނެއްގެ ސޫރަ ތަމްސީލު ކޮށްފައިވެއެވެ. ގިނަ ބަޔަކު ބުނަމުންދަނީ އެއީ ރައީސް ޑރ. މުއިއްޒު ދައްކުވައިދޭ ސޫރަ އެއް ކަމަށާއި އެކަމަކީ މުއިއްޒު ޕްރޮމޯޓު ކުރަން ކުރި ކަމެއް ކަމަށެވެ.
އިންސާނުންނާއި ދިރޭތަކެތީގެ ސޫރަ ސިފަވާ ރަމްޒް ތައް ބެހެއްޓުމަކީ ކޮށްގެންވާނެ ކަމެއް ނޫން ކަމަށް ބުނެ ފަތުވާ މަޖިލީހުން ފަތުވާ އެއް ނެރެފައިވަނިކޮށް ސަރުކާރުން މިކަން ކުރުމުން ގިނަ ބައެއްގެ ފާޑު ކިޔުން އަމާޒު ވެފައި ވަނިކޮށް، ޑރ. އިޔާޒް އެކްސް ގައި ކުރެެއްވި ޕޯސްޓެއްގައި ވިދާޅުވީ، "ދީނަށް ވަރަށް ލޯބި ކުރައްވާ ކަމަށް މީސްތަކުންނަށް ދެއްކިގެން ވެރިކަން ހޯއްދެވި ބޭފުޅަކު އައު އަހަރު ފާހަގަ ކުރުންފަދަ މުންކަރާތްތައް ހިންގެވުމަކީ އެމަނިކުފާނުގެ މުނާފިޤުކަން އިތުރަށް ހާމަވާ ކަމެއް،" ކަމަށެވެ.
މުއިއްޒު އަށް ސަނާ ކިޔާ ޕްރޮމޯޓު ކުރުމަށް ސަރުކާރުން ބާއްވާ ކޮންމެ ހަފްލާ އެއްގައި މިފަދަ ކަންކަން ކުރަމުންދާ ކަމަށް ބައެއް ފަރާތްތަކުން ބުނެފައިވާއިރު، އަނެއް ބަޔަކު ބުނެފައިވަނީ "މިއީ ދެން ފުކެއް ބޮޑުވަރު" ކަމަށެވެ. ޑްރޯން ޝޯވ ގައި ފެނުނު ކޯޓު ފަޓުލޫނު ގައި ހުރި މީހެއް ގެ ސޫރައިގެ ފޮޓޯ އެޓޭޗް ކުރުމަށް ފަހު ބައެއް މީހުން ބުނެފައިވަނީ "ހަމަ ކޮސްވެއްޖެ" ކަމަށެވެ. ގިނަ ބަޔަކު ވަނީ އެ މަންޒަރު ފެންނަ ވީޑިއޯ އެޑިޓް ކޮށް އެއަށް ހަޖޫވެސް ޖަހާފަ އެވެ.
އައު އަހަރު އައި އިރު ސިންގަޕޫރުގައި އަނބިކަނބަލުންނާ އެކު ހުންނެވި ރައީސް މުއިއްޒަށް އަމާޒު ކޮށް ޑރ. އިޔާޒް އިތުރަށް ވިދާޅުވެފައި ވަނީ، މިފަދަ ކަންކަމަށް އެތައް ފައިސާ އެއް ބޭކާރު ކުރެވޭ ކަމަށެވެ. އަދި 2026 ގައި ބޮޑު ދަރަންޏެއް ދައްކަންޖެހޭކަން އެމަނިކުފާނު ހަނދާން ހުރިތޯ ވެސް ޑރ. އިޔާޒް ވަނީ ސުވާލު ކުރައްވާފަ އެވެ.
2026 ވަނަ އަހަރަށް މަރުހަބާ ކިޔުމަށް ސަރުކާރުން ވަނީ އުޑުމަތީގައި އެކި މަންޒަރުތައް ސިފަކޮށްދެމުންދިޔަ ޑްރޯން ޝޯއަކާއި، ހަވާއެރުވުމާއި ސަގާފީ އެކި ހަރަކާތްތަކާއެކު ކުލަަގަދަ ފެސްޓިވަލެއް ހުޅުމާލޭގައި ބާއްވާފައެވެ.
