އައު އަހަރުގެ ތަހުނިޔާގެ ހިތާބުގައި ރައީސް ޑރ. މުއިއްޒު ވިދާޅުވީ މިއަހަރު ވާނީ ދިވެހި ރައްޔިތުން އެދޭ އަމާޒަށް ގައުމު ގެންގޮސްދިނުމުގައި ކާމިޔާބީ ހާސިލުކުރާނެ އަހަރަކަށް ކަމަށް. ސަރުކާރުގެ މުހިންމު ސިޔާސަތަކީ ގައުމު ބިނާކުރާ ފަދައިން ވަފާތެރި ގާބިލު ދިވެހި ދަރިންތަކެއް ބިނާކޮށްދިނުން ކަމަށާއި ތަރައްގީވެފައިވާ ގައުމުތަކުގެ ސަފަށް ނުކުމެ ހިނދެމިލުމަށް މަސައްކަތްކުރާނެ ކަމަށް ރައީސް ވިދާޅުވި.
ރައީސް ޑރ. މުޙައްމަދު މުޢިއްޒު
މިއަހަރު ވާނީ، ދިވެހި ރައްޔިތުން އެދޭ އަމާޒަށް ޤައުމު ގެންގޮސްދިނުމުގައި އިތުރު ކުރިއެރުމާއި ކާމިޔާބީ ހާސިލު ކުރާނޭ އަހަރަކަށް ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެ އެވެ.
އައު އަހަރުގެ ތަހުނިޔާގެ ހިތާބުގައި ރައީސް ވިދާޅުވީ ކޮންމެ އައު އަހަރެއްގެ ފެށުމަކީ، ފަރުދީގޮތުންނާއި އިޖުތިމާޢީ ގޮތުންވެސް ތިމާ އުފަންވި ޤައުމަށްޓަކައި ކޮށްދެވޭނީ ކޮން ޚިދުމަތްތަކެއްކަން ވިސްނައި، އެންމެންގެ ލާބަޔާއި މަންފާއަށްޓަކައި މަސައްކަތްކުރުމަށް ޢަޒުމު އައުކުރުމުގެ ވަގުތު ކަމަށެވެ.
އަދި މިއީ، ތާރީޚީގޮތުން ވަރަށް މުހިންމު މުނާސަބާއެއް ދިވެހީންނާ ބައްދަލުކުރާނޭ އަހަރެއް ކަމަށާއި، އެއީ ރާއްޖެ އިސްލާމްވިތާ ހިޖުރީގޮތުން 900 އަހަރު ފުރޭ އަހަރަށްވުން ކަމަށް ވިދާޅުވި އެވެ. އަދި މިއީ، މި ޖީލުގެ ދިވެހީންނާ ބައްދަލުވާނޭ އެންމެ ހައިބަތުހުރި އެއް ތާރީޚު ކަމަށް ވެސް ވިދާޅުވި އެވެ.
ރައީސް ވިދާޅުވީމާތްﷲގެ ވާގިފުޅާއެކު، މިއަހަރު ވާނީ، ދިވެހި ރައްޔިތުން އެދޭ އަމާޒަށް ޤައުމު ގެންގޮސްދިނުމުގައި އިތުރު ކުރިއެރުމާއި ކާމިޔާބީ ހާސިލު ކުރާނޭ އަހަރަކަށެވެ.
ރައީސްގެ ހިތާބުގައި ވިދާޅުވީ ދިވެހީންގެ އެންމެ އެވޭލާ ތާރީޚުއްސުރެ މިއަދާ ހަމަޔަށް ފެންނާން އޮތް އެއް ޙަޤީޤަތަކީ، އެއް އަހަރަށްވުރެ ގިނަ ކުރިއެރުން އަނެއް އަހަރު ހާސިލުވޭތޯ ކާބަފައިންގެ ޒަމާނުއްސުރެ ގަދައަޅައި މަސައްކަތްކުރަމުން ދިޔުމެވެ. ޤައުމުގެ ތަމައްދުނާއި ތަރައްޤީއަށްޓަކައި އަޅާ ކޮންމެ ބިންގަލެއްގެ މަތީ ކުރާ ބިނާތައް ފުރިހަމަކޮށް، ވަރުގަދަކުރެވޭތޯ ކޮންމެ އަހަރަކުމެ ދިވެހިން ހިންމަތްކުރަމުން ދިޔަކަމަށް ވިދާޅުވި އެވެ.
ރައީސް ވިދާޅުވީ، އިރާދަކުރެއްވިއްޔާ ދިވެހި ލޮބުވެތި ރައްޔިތުން އަބަދުމެ ދެމިތިބޭނީ، މި ރޫޙާއި މި ވިސްނުމުގަ އެވެ. ސަރުކާރުގެ އެންމެ މުހިންމު އެއް ސިޔާސަތަކީ، ޤައުމު ބިނާކުރަން މަސައްކަތްކުރާ ފަދައިން ވަފާތެރި، ޤާބިލް ދިވެހި ދަރީންތަކެއްވެސް ބިނާކޮށްދިނުން ކަމަށް ރައީސް ވިދާޅުވި އެވެ. އަދި ތަރައްޤީވެފައިވާ ޤައުމުތަކުގެ ސަފަށް ނުކުމެ ހިންދެމިލުމަށްޓަކައި ކަނޑައަޅައިފައިވާ އަމާޒަށް ދަތުރުކުރުމުގައި އިތުރު ކާމިޔާބުތަކެއް ހޯދާނެ ކަމަށް ރައީސް ވިދާޅުވި އެވެ.
ރައީސް މިފަދައިން ވިދާޅުވި އިރު 2025 ވަނަ އަހަރު ނިމިގެން ދިޔަ އިރު، ރާއްޖޭގެ އެކި ކަންކޮޅުތަކުގައި ފަށާފައި ހުރި ޕްރޮޖެކްޓްތައް ހުރީ ހުއްޓިފަ އެވެ. ތަކެތީގެ އަގުބޮޑުވުމާއި އިންފްލޭޝަން މަތިވުމުގެ ސަބަބުން ރައްޔިތުންގެ އެތައް ޝަކުވާއެއް އޮތީ ފުނިޖެހިފަ އެވެ. މީގެ އިތުރުން ކުދި ވިޔަފާރިތަކާއި އަމިއްލަ ވިޔަފާރިތައް ހުއްޓި ސަރުކާރުން ކުންފުނިތަކަށް ދޭންޖެހޭ ފައިސާ ދޭނެކަމަށް ވިދާޅުވި ނަމަވެސް އެކަން ވެސް ނުނިމެ އެވެ.
އަދި ސިވިލް ސަރވިސްގެ މުވައްޒަފުންގެ މުސާރައަށް ގެނައި ބަދަލާއެކު އެކި ފަންތިތަކުގެ މުވައްޒަފުންގެ މުސާރަ ކުޑަވެ އެކަމުގެ ޝަކުވާ ނިމިގެންދިޔަ އަހަރު ބޮޑުވި އެވެ. މީގެ އިތުރުން ރާއްޖެއިން ބޭރުގައި ކިޔަވާ ދަރިވަރުންނަށް ސަރުކާރުން ދޭންޖެހޭ ފައިސާ ނުލިބުމުގެ ޝަކުވާއާއި، ސަރުކާރުން ހިންގާ ޕްރޮޖެކްޓްތައް ވަކި ބަޔަކަށް ބަހާލުމާއި، މަސްވެރިންނަށްވި ވައުދު ނުފުދުނު މައްސަލަ އަދި ޖުމްލަ ގޮތެއްގައި އެންމެ ބޮޑު ޝަކުވާއަކަށް ވެފައިވާ ބޯހިޔާވަހިކަމުގެ މައްސަލައަށް ދާއިމީ އެއްވެސް ހައްލެއް ގެނެވިފައި ނުވެ އެވެ. މިދިޔަ 2 އަހަރު ތެރޭގައި ސަރުކާރުން ފަށާ ނިންމި މުހިންމު މަޝްރޫއެއް ވެސް ނެތެވެ.
