މިނިސްޓަރު މުއްތޮލިބަށް ޖެހިވަޑައިގެންނެވީ ރައީސް މުޢިއްޒުގެ ވައުދުފުޅު މާނަ ކޮށްދެއްވަން
ރިޔާސީ އިންތިޚާބުގެ ކެމްޕެއިންގެ ތެރޭގަައި ރައީސް މުޢިއްޒު ވައުދުވެ ވަޑައިގެންފައި ވަނީ، އެ މީހަކަށް ލިބިފައި އޮތް އެއްޗެއް، ލިބިފައި އޮތް ގޮތަކަށް، ލިބުނު ތަނަކުން ދެއްވާނެ ކަމަށް.. އެއްވެސް މީހަކަށް ދީފައި އޮތް ފްލެޓެއް ވިޔަސް ނުވަތަ ގޯއްޗެއް ވިޔަސް އަތު ނުލައްވާނެ ކަމަށާއި، އޭގެ ބަދަލުގައި އެ ތަންތަން ފުރިހަމަ ކޮށްދެއްވާނެ ކަމަށް ރައީސް މުޢިއްޒު ވައުދުވެ ވަޑައިގެންފައިވޭ.
ހައުސިން މިނިސްޓަރު ޑޮކްޓަރު ޢަބްދުﷲ މުއްތޮލިބު
އެ މީހަކަށް ލިބިފައި އޮތް އެއްޗެއް، ލިބިފައި އޮތް ތަނަކުން ދެއްވާނެ ކަމަށް ވިދާޅުވެ ރައީސުލްޖުމްހޫރިއްޔާ ޑޮކްޓަރު މުޙައްމަދު މުޢިއްޒު ވެވަޑައިގެންފައިވާ ވައުދު މާނަ ކޮށްދެއްވަން ހައުސިން މިނިސްޓަރު ޑޮކްޓަރު ޢަބްދުﷲ މުއްތޮލިބަށް ޖެހިވަޑައިގެންފި އެވެ.
ރިޔާސީ އިންތިޚާބުގެ ކެމްޕެއިންގެ ތެރޭގަައި ރައީސް މުޢިއްޒު ވައުދުވެ ވަޑައިގެންފައި ވަނީ، އެ މީހަކަށް ލިބިފައި އޮތް އެއްޗެއް، ލިބިފައި އޮތް ގޮތަކަށް، ލިބުނު ތަނަކުން ދެއްވާނެ ކަމަށެވެ. އެއްވެސް މީހަކަށް ދީފައި އޮތް ފްލެޓެއް ވިޔަސް ނުވަތަ ގޯއްޗެއް ވިޔަސް އަތު ނުލައްވާނެ ކަމަށާއި، އޭގެ ބަދަލުގައި އެ ތަންތަން ފުރިހަމަ ކޮށްދެއްވާނެ ކަމަށް ރައީސް މުޢިއްޒު ވައުދުވެ ވަޑައިގެންފައިވެ އެވެ.
އޭގެ ފަހުން މި ސަރުކާރުގެ ހިޔާވަހި ފައިނޭންސިން ޕްރޮގްރާމް އިފްތިތާހު ކުރުމަށް ބޭއްވި ރަސްމިއްޔާތުގައި ވެސް ރައީސް މުޢިއްޒު ވިދާޅުވެފައި ވަނީ، މިދިޔަ ސަރުކާރުން ދޫކޮށްފައިވާ ތަންތަން އެ ގޮތަށް ހަވާލު ކޮށްދެއްވާނެ ކަމަށެވެ. ލިސްޓުގައި ނަން އޮތް މީހެއް ވެއްޖިއްޔާ، އެ މީހަކަށް ގޯތިތައް ވެސް ހަވާލު ކުރާނެ ކަމަށް އެރޭ ރައީސް މުޢިއްޒު ވިދާޅުވެފައިވެ އެވެ.
އާދީއްތަ ދުވަހު ހައުސިން މިނިސްޓްރީގެ ފަރާތުން ބޭއްވި ނޫސްވެރިންގެ ބައްދަލުވުމުގައި ރާއްޖެ ޓީވީ އިން ވާނީ އެ ސުވާލު ކޮށްފަ އެވެ. އެގޮތުން ފްލެޓު ލިބޭނެ ކަމަށް ކަނޑައަޅާފައި އޮތް ލިސްޓުގައި ތިބި ބައެއް މީހުންގެ ޝަރުތު ހަމަ ނުވާ ކަމަށް އަންގާފައިވާއިރު، ރައީސްގެ ވައުދުފުޅު ފުއްދުނީ ކަމަށް ޤަބޫލު ކުރައްވަންތޯ ސުވާލު ކޮށްފައިވެ އެވެ. ހަމަ އެހެންމެ، ޝަރުތު ހަމަ ނުވާ ކަމަށް ނިންމައި، މިހާތަނަށް ލިޔުން ފޮނުވާފައި ވަނީ ކިތަން މީހުންނާތޯ ވެސް ސުވާލު ކޮށްފައިވެ އެވެ.
އެ ސުވާލަށް ޖަވާބު ދެއްވަމުން މިނިސްޓަރު މުއްތޮލިބު ވިދާޅުވީ، އެއީ ރައީސް މުޢިއްޒު އެ މާނައިގައި ދެއްކެވި ވާހަކައެއް ނޫން ކަމަށެވެ. އެގޮތުން އެ މީހަކަށް ލިބިފައި އޮތް ތަނެއް، ލިބިފައި އޮތް ގޮތަކަށް ދެއްވާނެ ވާހަކަ ރައީސް މުޢިއްޒު މާނަ ކުރެއްވީ އެގޮތުގައި ނޫން ކަމަށް މިނިސްޓަރު ވިދާޅުވި އެވެ. އެގޮތުން ޝަރުތު ހަމަ ނުވާ ފަރާތްތަކަށް ވެސް ދޫކޮށްފައިވާ ކަމަށާއި، އެ ފަރާތް ތަކަށް ދެއްވާނެ ވާހަކަ ނޫން ކަމަށް މިނިސްޓަރު ވިދާޅުވި އެވެ.
ރައީސުލްޖުމްހޫރިއްޔާގެ ވައުދުގައި ލިބިފައި އޮތް ތަނެއް، ލިބިފައި އޮތް ފަރާތަކަށް ދެއްވާނެ ވާހަކަ. އަޅުގަނޑު ހަމަ ދަންނާވަލަން ބޭނުން ވަނީ ރައީސުލްޖުމްހޫރިއްޔާ އެ މާނަ ކުރެއްވީ ކޮންމެ ގޮތެއް ވިޔަސް އޮޅުވާލުމާއި، މަކަރުގެ ތެރެއިން ޝަރުތު ހަމަ ނުވާ ފަރާތްތަކަށް ދޭ ވާހަކައެއް ނޫން. މިސާލަކަށް ދަންނަވާ ކަމަށް ވަންޏާ އަޅުގަނޑުމެންނަށް ފާހަގަ ކުރެވިފައި ހުރީ ބިންވެރިޔާ ސްކީމްގެ ތެރެއިން، އޭގައި ހަމަ ވަރަށް ސްޕެސިފިކް ޝަރުތެއް އޮންނާނެ މާލެ އަށް އުފަން، ފެށުނީއްސުރެ މާލެ އަށް ރަޖިސްޓްރީ އޮތް މީހަކަށް ވާން ޖެހޭނެއޭ. އެއީ ހަމަ އޭގެ ބޭސިކް ޝަރުތު އެއީ، ބިންވެރިޔާ ސްކީމްގެ. އެކަމަކު އެބަ އޮތް އެތައް ފަރާތްތަކަށް ދީފައި މާލޭގައި މާ ފަހުން ރަޖިސްޓްރީ ކުރި ފަރާތްތަކަށް ވެސް. މަންމަ އާއި ބައްޕަ މާލެ އެއް ނޫން، އެއްވެސް ގޮތަކަށް މާލެއެއް ނޫން، ފަހުން މާލޭގައި ރަޖިސްޓްރީވި ފަރާތްތަކަށް ވެސް ދީފައި އެބަ ހުރި.މިނިސްޓަރު ޑޮކްޓަރު ޢަބްދުﷲ މުއްތޮލިބު
މިނިސްޓަރު މުއްތޮލިބު ވިދާޅުވީ ޕޮއިންޓު ދީފައިވާ ގޮތުގެ ވާހަކަ ނުދައްކަވާ ކަމަށާއި، އަސާސީ ޝަރުތުގެ ވާހަކަ ދައްކަވާ ކަމަށެވެ. އެގޮތުން އަސާސީ ޝަރުތު ހަމަ ނުވާ ފަރާތެއް ހުރި ނަމަ، އެ ފަރާތެއް އުނި ކޮށްފައި ވާނެ ކަމަށް ވެސް ވިދާޅުވި އެވެ. ނަމަވެސް، އެގޮތަށް ލިސްޓުން އުނި ކޮށްފައި ވަނީ، ނުވަތަ ފްލެޓު އަތުލާފައި ވަނީ ކިތަން މީހުންގެ އަތުން ކަމެއް މިނިސްޓަރަށް އެނގިވަޑައި ނުގަންނަވަ އެވެ.
މިނިސްޓަރު މުއްތޮލިބު މިހެން ވިދާޅުވި ނަމަވެސް، ރައީސް މުޢިއްޒު ވައުދުވެ ވަޑައިގެންފައި ވަނީ ލިސްޓުގައި ހިމެނި، ގެޒެޓު ކޮށްފައިވާ ލިސްޓުގައި ނަން އޮތް މީހެއް ނަމަ، އެ މީހަކަށް އެ ފްލެޓެއް ނުވަތަ ގޯއްޗެއް ދެއްވާނެ ކަމަށެވެ. އޭގެ ތެރެއިން އެއްވެސް އެއްޗެއް އަތު ނުލައްވާނެ ކަމަށް ރައީސް މުޢިއްޒު ވައުދުވެ ވަޑައިގެންފައިވެ އެވެ.
އެހެން ނަމަވެސް، ކުރީ ސަރުކާރުން އެކުލަވާލައި، އަދި ގެޒެޓު ކޮށްފައިވާ ލިސްޓު މި ސަރުކާރުން ބަދަލު ކޮށްފައިވާ ކަމުގެ ތުހުމަތު ވަނީ އަމާާޒުވެފަ އެވެ. އަދި އެތައް ބައެއްގެ އަތުން ފްލެޓު އަތުލާފައިވާ ކަމަށް ބުނެ، ގިނަ ބަޔަކު އަންނަނީ ނުރުހުން ވެސް އަމާޒު ކުރަމުންނެވެ. އެގޮތުން އެކި އެކި މަރުޙަލާތައް ނިމި، ފައިނަލް ކޮށްފައިވާ ލިސްޓެއް ސަރުކާރުން ބޭނުން ބަޔަކަށް ފްލެޓުތައް ބަހާލުމުގެ މަޤުސަދުގައި ބަދަލު ކޮށްފައިވާ ކަމަށް ބުނެ އާންމުންގެ ނުރުހުން ވަނީ ހަައުސިން މިނިސްޓްރީ އަދި ސަރުކާރަށް ވެސް އަމާޒުވެފަ އެވެ.
