އާދިއްތަ ދުވަހުން ފެށިގެން މިފްކޯއިން މަސް ގަންނާނީ އެއް ކިލޯ މަހަށް އެންމެ މަތީ އަގު ދީގެން ކަމަށާއި މަސްވެރިންނަށް ތެޔޮ ވިއްކާނީ 51 ލާރި އަގުހެޔޮކޮށް ކަމަށް މުއިއްޒު ވިދާޅުވިއެވެ.
މަސްވެރިކަމުގެ ސިނާޢަތަކީ ދިވެހިންގެ ލޭނާރުކަމުގައި އަލުން ހެދުމަކީ މި ސަރުކާރުގެ މުހިންމު ސިޔާސަތެއް: ރައީސުލްޖުމްހޫރިއްޔާ
އާދިއްތަ ދުވަހުން ފެށިގެން، މޯލްޑިވްސް އިންޑަސްޓްރިއަލް ފިޝަރިޒް ކޯޕަރޭޝަން (މިފްކޯ) އިން މަސް ގަންނާނީ، ދޮޅު ކިލޯ މަހުގެ ބަދަލުގައި، އެއް ކިލޯ އާއި އެއަށްވުރެ ބަރުކޮށް ކިރާ މަހަށް އެންމެ މަތީ އަގު ދޭގޮތަށް ކަމަށާއި އަދި، މިފްކޯ އިން މަސްވެރިންނަށް ތެޔޮ ވިއްކާނީ އެވްރެޖްކޮށް 51 ލާރި އަގުހެޔޮކޮށް ކަމަށް ރައީސް މުހައްމަދު މުއިއްޒު ވިދާޅުވެއްޖެ އެވެ.
ރައީސް މުއިއްޒު މިހެން ވިދާޅުވީ، ރ. ދުވާފަރުގައި ބޭއްވެވި، ދިވެހިރާއްޖޭގެ 45 ވަނަ މަސްވެރިންގެ ދުވަހުގެ ރަސްމީ ޖަލްސާ ގައި ހޮނިހިރު ދުވަހުގެ ރޭ ވާހަކަފުޅުދައްކަވަމުންނެވެ.
ކޯލްޑް ސްޓޯރޭޖް އިތުރުކުރުމަށް ކުރައްވާ މަސައްކަތްތަކުގެ ދަށުން އިތުރު 200 ފަރާތަކަށް އާރް.އެސް.ޑަބްލިއު ލޯން ދޫކުރުމަށް ހުޅުވާލާފައިވާ ކަމަށާއި، މީގެ އިތުރުން، ރާއްޖޭގެ އެކި ކަންކޮޅުތަކުގައި ޤާއިމުކުރާ ޕްރޮސެސިންގ ކާރުޚާނާތަކުގެ ޢަމަލީ މަސައްކަތް ފެށުމަށް ތައްޔާރުވަމުންދާކަންވެސް ރައީސް މުއިއްޒު ފާހަގަ ކުރެއްވި އެވެ. އަދި ފިއުލް ސްކިޑްތަކުގެ މަސައްކަތް ބާރު ދުވެލީގައި ކުރިއަށް ގެންގޮސް، ކަނޑައެޅިފައިވާ ހުރިހާ ސަރަހައްދެއްގައި، އަންނަ މާރިޗު މަހުގެ ނިޔަލަށް ފިއުލް ސްކިޑްތައް ޤާއިމުކޮށް ނިންމޭނޭކަމަށްވެސް އެމަނިކުފާނު ވިދާޅުވިއެވެ.
މަސްވެރިންގެ އެންމެ ބޮޑު ކަންބޮޑުވުމަކީ މަސް ގަންނަ އަގުކަން ފާހަގަކުރައްވައި، އެކަމަށް ޙައްލު ހޯއްދަވައިދެއްވުމަށް މަސައްކަތްކުރައްވަނީ، ފަރުވާތެރިކަމާއެކު ދުރުރާސްތާއަށް ވިސްނަވާވަޑައިގެން، ދެމެހެއްޓެނިވި ގޮތެއްގައި އެކަން ކުރެވޭނޭ ގޮތަށްކަން މުއިއްޒު ވިދާޅުވިއެވެ. މިފްކޯއިން ބޮޑުކަންނެލި ގަނެވޭނޭ އިންތިޒާމުވެސް ދެމެހެއްޓެނިވި ގޮތެއްގައި ހަމަޖެއްސެވުމަށްޓަކައި އިތުރު މަސައްކަތްތައް ކުރައްވަމުންގެންދަވާ ކަމަށް ވިދާޅުވިއެވެ. އަދި ހުޅުމާލޭގައި ޤާއިމުކުރާ ފެސިލިޓީގެ މަސައްކަތްތައް ގޮސްފައިވާ ހިސާބަށް ބައްލަވާއިރު، ދާދި އަވަހަށް މިފްކޯ އިން ބޮޑުކަންނެލި ގަންނަން ފެށޭނޭކަމަށް އެމަނިކުފާނު އަންދާޒާކުރެއްވިއެވެ.
އެންމެ ބޮޑަށް ދެކެވަޑައިގަންނަވަން ބޭނުންފުޅުވަނީ، މަސްވެރިކަމުގެ ސިނާޢަތަކީ ހަމައެކަނި ދިވެހީން މަސައްކަތްކުރާ ސިނާޢަތަކަށް ވާނޭ ދުވަސްކަމަށް ވިދާޅުވެ، ދިވެހި ޒުވާނުން މި ދާއިރާއަށް ނެރޭ ފަރާތްތަކާއި، އޮޑިފަހަރުގައި ހަމައެކަނި ދިވެހި ފަޅުވެރިން ގެންގުޅޭ ފަރާތްތަކަށް ހިތްވަރުދެއްވުމުގެ ގޮތުން، ޤައުމީ ފެންވަރެއްގައި އެ ފަރާތްތަކުގެ އަގުވަޒަންކުރައްވާނޭކަމަށް މުއިއްޒު ވިދާޅުވިއެވެ.
ރައީސް މުއިއްޒުގެ ސަރުކާރަށް ދެ އަަހަރު ފުރިގެން ދިޔަ އިރު ބޮޑު ކަންނެލީގެ މަސްވެރިންނަށް ވެވަޑައިގެންނެވި ވައުދު ފުއްދާފައި ނުވާތީ، ހުސްވި އަހަރުގެ މަސްވެރިންގެ ދުވާހައި މިއަހަރުގެ މަސްވެރިންގެ ދުވަހު ވެސް މަސްވެރިން ވަނީ މުޒާހަރާ ކޮށްފައެވެ. މި ޑިސެމްބަރު މަހުގެ 10 ވަނަ ދުވަހު 49 ކަންނެލި އޮޑި މާލޭ ފަޅުން ބޭރުގައި ވައުދު ފުއްދުމަށް ގޮވާލާ އަޑު އުފުލާފައި ވެއެވެ. ފުލުހުން ވަނީ ބާރުގެ ބޭނުން ކޮށްގެން މުޒާހަރާ ރޫޅާލައި ބައެއް ފަރާތްތައް ހައްޔަރު ކޮށް ބައެއް އޮޑި ފަހަރު ވެސް ފުލުހުންގެ ބެލުމުގެ ދަށަށް ގެންގޮސްފަ އެވެ. ބޮޑު ކަންނެލި މަސްވެރިންގެ ޔޫނިއަން އިން ހޮނިހިރު ދުވަހު ބުނީ އެ މީހުންގެ އިހުތިޖާޖަކީ ސިޔާސީ ކަމެއް ނޫން ކަމަށާއި، އެ މީހުން ބޭނުން ވަނީ ވެވަޑައިގެންނެވި ވައުދާ އެއް ގޮތައް ކަންނެލި ކިރާ އަގު 80ރ. އާއި 100ރ. އާ ދެމެދުގެ އަގަށް ހެދުމަށާއި ހެޔޮ އަގުގައި ތެލާއި އައިސް ލިބޭނެ ގޮތް ހަދައި ދިނުމަށާއި ސަރުކާރުން ކަންނެލި ކިރަން ފެށުން ކަމުގައެވެ.
މަސްވެރިންގެ ދުވަހުގެ ޖަލްސާ ގައި މުއިއްޒު ވިދާޅުވީ، އަދި މި ސިނާޢަތް ކުރިއެރުވުމަކީ ފަރުދީ އަދި ޖަމަޢީ ތަރައްޤީއަށް ކުރެވޭ ޤައުމީ މަސައްކަތެއް ކަމަށް ބެލުމަށާއި، ޤައުމީ ވިސްނުމާ ދެކޮޅު ސިޔާސީ އޮއިވަރުގައި ނުޖެހި، އެންމެން އެކުގައި މަސައްކަތް ކުރުމަށް އިލްތިމާސްކުރައްވާ ކަމުގަ އެވެ.
