ޔާމީން ގެ މަރުގެ މައްސަލަ: ހައިޝަމް އާއި ޒިހާން ގެ މައްސަލަ އަލުން ބެލުމަށް އަމުރު ކުރުމުން ބަންދުކޮށްފި
ބްލޮގަރ ޔާމީން ރަޝީދުގެ މަރުގެ މައްސަލައިގައި ހައިޝަމް އަދި ޒިހާންގެ މައްޗަށް ކްރިމިނަލް ކޯޓުން 2022 ގައި ހުކުމް އިއްވި ނަމަވެސް ހައިކޯޓުން އެ ހުކުމް ބާތިލުކޮށް އަލުން ބަލަން އަންގާފައިވޭ. އެގޮތުން މި މައްސަލަ ކްރިމިނަލް ކޯޓަށް ހުށަހެޅުމުން އެ ދެމީހުން ބަންދުކުރުމަށް ކޯޓުން ވަނީ އަމުރުކޮށްފައި. މީގެ އިތުރުން މުހައްމަދު ދިފްރާން އަދި ތާއިފް އިސްމާއިލް ރަޝީދުގެ މައްސަލަ ވެސް ހައިކޯޓުން ބާތިލުކޮށް އަލުން ބަލަން އަންގާފައިވޭ.
ބްލޮގަރ ޔާމީން ރަޝީދުގެ މަރުގެ މައްސަލައިގައި ބަންދު ކުރި 2 މީހުން
ބްލޮގަރ ޔާމީން ރަޝީދުގެ މަރުގެ މައްސަލައިގައި ކުށް ސާބިތުވާކަމަށް ކްރިމިނަލް ކޯޓުން ކަނޑައެޅުމުން، ހައިކޯޓުން އެ ހުކުމް ބާތިލުކުރުމަށްފަހު މިނިވަންކުރި އިސްމާއިލް ހައިޝަމް ރަޝީދު އާއި އަހުމަދު ޒިހާން ގެ މައްސަލަ އަލުން ބެލުމަށް ކްރިމިނަލް ކޯޓުން ކަނޑައެޅުމުން އެ ދެމީހުން ބަންދުކޮށްފި އެވެ.
ހައިޝަމް އާއި ޒިހާންގެ މައްޗަށް ކުށް ސާބިތުވާ ކަމަށް ކަނޑައަޅައި އެ ދެމީހުންނަށް ކްރިމިނަލް ކޯޓުން ހުކުމް އިއްވީ 2022 ވަނަ އަހަރު އެވެ. ނަމަވެސް މި މައްސަލަ ހައިކޯޓުގައި އިސްތިއުނާފު ކުރުމުން ހައިކޯޓުގެ 3 ފަނޑިޔާރުންގެ ބެންޗުގެ އިއްތިފާގުން ވަނީ ކްރިމިނަލް ކޯޓުގެ ހުކުމް ބާތިލުކޮށްފަ އެވެ. މި މައްސަލަތައް ހައި ކޯޓުގައި އިސްތިއުނާފްކޮށްފައި އޮންނަތާ 3 އަހަރު ދުވަސް ފަހުން ބުދަ ދުވަހު ވަކިވަކިން ހައި ކޯޓުން އިއްވި ހުކުމްގައި ވަނީ، ކުށް ސާބިތުވާ ކަމަށް ހައިޝަމް އަދި ޒިހާންގެ މައްޗަށް އިއްވި ހުކުމް ބާތިލުކޮށް އަލުން ބަލަން އަންގާފަ އެވެ.
އެހެންކަމުން މި މައްސަލަ ކްރިމިނަލް ކޯޓަށް ހުށަހެޅުމުން މި ދެމީހުންގެ ބަންދު ކުރުމަށް ވެސް ބުދަ ދުވަހު ކްރިމިނަލް ކޯޓުން ވަނީ އަމުރުކޮށްފަ އެވެ.
ޕީޖީ އޮފީހުން ބުނީ 23 އެޕްރީލް 2017 ދުވަހުގެ ވަގުތެއްގައި ސ.ފޭދޫ، ޗަބޭލީގެ ޔާމީން ރަޝީދުގެ ދިރިއުޅޭ ގެއަށް ޔާމީން ރަޝީދު ވަތް ވަގުތު ޔާމީން ރަޝީދު ހިފަހައްޓައި ތޫނު ހަތިޔާރުން ޙަމަލާދީ ރަޙުމްކުޑަގޮތަކަށް މަރާލާފައިވާ މައްސަލައިގައި ދިވެހިރާއްޖޭގެ ހައިކޯޓުގައި ކުރިއަށްދިޔަ އިސްތިއުނާފީ މައްސަލަ އެކޯޓުން ބެލުމަށްފަހު، ހ. އަންނާރުމާގެ އިސްމާޢީލް ހައިޝަމް ރަޝީދު އާއި، ހުޅުމާލެ ގޯތި ނަންބަރު 11399، އަޙްމަދު ޒިހާން އިސްމާޢިލްގެ މައްޗަށް ސާބިތުވި ދައުވާތައް ބާޠިލްކޮށް މި މައްސަލަ އަލުން ބެލުމަށް ކްރިމިނަލް ކޯޓަށް ތަޙްވީލްކޮށްފައިވާ ކަމަށެވެ.
ދިވެހިރާއްޖޭގެ ހައިކޯޓުގެ މި ނިންމުމާ ގުޅިގެން، ހ. އަންނާރުމާގެ އިސްމާޢީލް ހައިޝަމް ރަޝީދުއާއި، ހުޅުމާލެ ގޯތި ނަންބަރު 11399 އަޙްމަދު ޒިހާން އިސްމާޢިލްގެ ބަންދާމެދު ގޮތެއް ކަނޑައަޅައިދިނުމަށް އެ އޮފީހުން ބުދަ ދުވަހު ކްރިމިނަލް ކޯޓަށް ހުށަހެޅި ހުށަހެޅުމާ ގުޅިގެން، ކްރިމިނަލް ކޯޓަށް ތަޙްވީލްކުރި މައްސަލައިގެ ޝަރީޢަތް ނިމެންދެން އިސްމާޢީލް ހައިޝަމް ރަޝީދު އާއި، އަޙްމަދު ޒިހާން އިސްމާޢިލް ބަންދުކުރުމަށް އެކޯޓުން ވަނީ ނިންމާފަ އެވެ.
މީގެ އިތުރުން ކްރިމިނަލް ކޯޓުން ކުށް ސާބިތު ނުވާ ކަމަށް ނިންމި 4 މީހުންގެ ތެރެއިން، ގދ. ގައްދޫ / ސިންދުބާދުގެ، މުހައްމަދު ދިފްރާން އަދި މ. ތާއިފް އިސްމާއިލް ރަޝީދު ގެ މައްސަލަ ވެސް ހައި ކޯޓުން ވަނީ ބާތިލުކޮށް، އަލުން ބަލަން އަންގާފަ އެވެ.
