ކޭޕާކް މައްސަލަ: މަންޑޭގެ މައްޗަށް 94 ދައުވާ، ޖައިޝާންގެ މައްޗަށް 89 ދައުވާ ސާބިތު ވެއްޖެ
ކޭޕާކް ފްލެޓްތައް ވިއްކުމުގައި މަކަރާއި ހީލަތް ހެދި ކަމަށް ތުހުމަތުކުރެވޭ ހަސަން މަމްދޫހު ގެ މައްޗަށް ކުރި 104 ދައުވާގެ ތެރެއިން 94 ދައުވާ ވަނީ ސާބިތުވެފަ. މި މައްސަލާގައި ޖައިޝާން ސައީދުގެ މައްޗަށް ކުރި 95 ދައުވާގެ ތެރެއިން 89 ދައުވާ ސާބިތުވި. ކުށުން ހޯދި ފައިސާއިން މަންޑޭ ގަނެފައިވާ އެޕާޓްމެންޓް ދައުލަތަށް ނަގަން ކޯޓުން އަމުރުކުރި.
މަންޑޭ އަދި އޭނާ ދިރިއުޅޭ ގެ ބަލާ ފަސްކުރުމުގެ ތެރެއިން ފުލުހުންނަށް ފެނުނު ބައެއް ތަކެތި
ކޭޕާކް ފްލެޓްތައް ވިއްކުމުގެ ނަމުގައި މަކަރާއި ހީލަތުން އެތައް ބައެއްގެ އަތުން ފައިސާ ނެގިކަމުގެ ތުހުމަތު ކުރެވޭ ހަސަން މަމްދޫހު (މަންޑޭ) ގެ މައްޗަށް ކުރި 100 އަށް ވުރެ ގިނަ ދައުވާގެ ތެރެއިން 94 ދައުވާ ސާބިތުވާ ކަމަށް ކްރިމިނަލް ކޯޓުން ހުކުމް ކޮށްފި އެވެ.
ހަންބޯ ކޮމްޕެނީ ޕްރައިވެޓް ލިމިޓެޑުން ހުޅުމާލޭ ގައި ތަރައްގީކުރަމުންދާ ކޭޕާކް ރެޒިޑެންސް ގެ އެޕާޓްމަންޓްތައް ވިއްކުމުގައި އޮޅުވާލުމާއި، މަކަރާއި ހީލަތް ހަދާފައިވާ ކަމަށް ތުހުމަތުކުރެވޭ މައްސަލައިގައި މަންޑޭގެ މައްޗަށް 104 ދައުވާ ދައުލަތުން ވަނީ އުފުލާފަ އެވެ. ދިވެހި ފުލުހުންގެ ޚިދުމަތުން މި މައްސަލައިގެ ތަހުގީގު ފުރިހަމަ ކުރުމަށް ފަހު ގެއްލުން ލިބުނު 51 މީހުންނާ ގުޅިގެން ދައުވާތައް ކުރުމަށް ކްރިމިނަލް ކޯޓަށް ހުށަހެޅީ 12 ޑިސެންބަރު 2023 ގަ އެވެ.
ބުރާސްފަތި ދުވަހު މަންޑޭ އޭނާ ގެ މައްސަލައިގެ އަޑު އެހުމަށް ހާޒިރު ނުވުމުން އެ މައްސަލައިގެ ހުކުމް ކުރުން ހޮނިހިރު ދުވަހަށް ވަނީ ލަސްކޮށްފަ އެވެ. ކްރިމިނަލް ކޯޓުގައި ބޭއްވި އަޑު އެހުމުގައި އެ މައްސަލަ ބައްލަވާ ގާޒީ އަލީ ނަދީމް ވިދާޅުވީ އެ އަޑު އެހުން ފަސްކުރުމަށް މަންޑޭ ގެ ފަރާތުން އެދުނު ނަމަވެސް ޝަރީއަތް އޮންނާނެކަން މަންޑޭ އަށް އަންގާފައިވާނެ ކަމަށެވެ. އެ ސަބަބަށްޓަކާ ކޯޓަށް ހާޒިރުނުވާ މީހުންނާ މެދު އަމަލުކުރާ އުސޫލުން މަންޑޭ އާއި މެދު ވެސް އަމަލު ކުރާނެ ކަމަށް ކޯޓުން ވަނީ ބުނެފަ އެވެ.
ހޮނިހިރު ދުވަހު ކްރިމިނަލް ކޯޓުން ކުރި ހުކުމުގައި ބުނީ މަންޑޭ ގެ މައްޗަށް ކުރި ދައުވާތަކުގެ ތެރެއިން އޭނާ ގެ މައްޗަށް ސާބިތުވީ، ޓެކުމުގެ 46 ދައުވާ އާއި، އޮޅުވާލުމުގެ އަމަލެއް ކުރުމުގެ 44 ދައުވާ އާއި، މީހަކަށް ކަމެއް އޮޅުވާލުމުގެ ނިޔަތުގައި އެނގިހުރެ ސައްހަ ނޫން ލިޔުމެއް ދިނުމުގެ 3 ދައުވާ އާއި، މަނީ ލޯންޑްރިންގ ގެ 1 ދައުވާ އެވެ. މިއީ ރާއްޖޭގައި އެކަކުގެ މައްޗަށް މިހާ ގިނަ އަދަދެއްގެ ދައުވާ ސާބިތުވި ފުރުތަމަ ފަހަރެވެ.
އެ މައްސަލައިގައި ދެން ދައުވާ އުފުލާފައި ވަނީ ރ. އަލިފުށީ ކިނާރާ ޖައިޝާން ސައީދަށެވެ. އޭނާ ގެ މައްޗަށް ދައުލަތުން ކޮށްފައި ވަނީ 95 ދައުވާ އެެވެ. އެ ދައުވާތަކުގެ ތެރެއިން އޭނާ ގެ މައްޗަށް ސާބިތުވީ 89 ދައުވާ އެވެ. ކްރިމިނަލް ކޯޓުން ބުނީ ޖައިޝާން ގެ މައްޗަށް ސާބިތުވީ ޓެކުމުގައި ބައިވެރިވުމުގެ 45 ދައުވާ އާއި އޮޅުވާލުމުގެ އަމަލެއް ކުރުމުގެ 40 ދައުވާ އާއި މީހަކަށް ކަމެއް އޮޅުވާލުމުގެ ނިޔަތުގައި އެނގިހުރެ ސައްހަ ނޫން ލިޔުމެއް ދިނުމުގެ 3 ދައުވާ ގެ އިތުރުން މަނީ ލޯންޑަރ ކުރުމަށް އެހީތެރިވުމުގެ 1 ދައުވާ އެވެ.
ހޮނިހިރު ދުވަހު ބޭއްވި އަޑުއެހުމުގައި ހުކުމް އިއްވަވަމުން ގާޒީ ނަދީމް ވިދާޅުވީ ކުށް ކޮށްގެން ހޯދި ފައިސާތައް މަންޑޭ އަމިއްލަ ބޭނުމަށް ބޭނުންކޮށް، އެ ފައިސާ އިން ހުޅުމާލެ އިން ފްލެޓްތަކެއް ވެސް މަންޑޭ ގަނެފައިވާ ކަމަށެވެ. އެހެންކަމުން މަނީ ލޯންޑްރިންގ ގެ ދައުވާ ސާބިތުވާތީ އާއި އެ ފައިސާ ބޭނުން ކޮށްގެންގެން ގަނެފައިވާ އެ އެޕާޓްމެންޓް ވެސް ދައުލަތަށް ނެގުމަށް ގާޒީ ނަދީމް ވަނީ އަމުރު ކުރައްވާފަ އެވެ.
ގާޒީ ނިންމެވީ ސާބިތުވި ދައުވާތަކަށް އަދަބު ކަނޑައެޅުމާ ގުޅޭ ގޮތުން އަންނަ އަންގާރަ ދުވަހުގެ ހެނދުނު އަޑުއެހުމެއް ބޭއްވުމަށެވެ.
