ކޭޕާކް މައްސަލައިގައި މަންޑޭ 397 އަހަރަށް ޖަލަށް، މިއީ ރާއްޖޭގައި އިއްވި އެންމެ ދިގު ޖަލު ހުކުމް!
ކޭޕާކް ފްލެޓް ވިއްކުމުގެ މައްސަލައިގައި ހަސަން މަމްދޫހުގެ މައްޗަށް 100 އަށްވުރެ ގިނަ ދައުވާގެ ތެރެއިން 94 ދައުވާ ސާބިތުވެ 397 އަހަރާއި 6 މަހާއި 20 ދުވަހުގެ ޖަލު ހުކުމެއް ވަނީ އިއްވާފަ. ޖަލު ހުކުމުގެ އިތުރުން 30 މިލިއަން ރުފިޔާގެ ޖޫރިމަނާއާއެކު ހުޅުމާލެއިން ގަނެފައިވާ ޕެންޓްހައުސް ދައުލަތަށް ނެގުމަށް ކްރިމިނަލް ކޯޓުން އަމުރުކޮށްފައިވޭ.
މަންޑޭ އަދި އޭނާ ދިރިއުޅޭ ގެ ބަލާ ފަސްކުރުމުގެ ތެރެއިން ފުލުހުންނަށް ފެނުނު ބައެއް ތަކެތި
ކޭޕާކް ފްލެޓްތައް ވިއްކުމުގެ ނަމުގައި މަކަރާއި ހީލަތުން އެތައް ބައެއްގެ އަތުން ފައިސާ ނެގި މައްސަލައިގައި ކްރިމިނަލް ކޯޓުގައި 94 ދައުވާ ސާބިތުވި ހަސަން މަމްދޫހު (މަންޑޭ) 397 އަހަރަށް ޖަލަށް ލާން ހުކުމް ކޮށްފި އެވެ.
މަންޑޭ ގެ މައްޗަށް ކުރި 100 އަށް ވުރެ ގިނަ ދައުވާގެ ތެރެއިން 94 ދައުވާ ސާބިތުވާ ކަމަށް ކްރިމިނަލް ކޯޓުން ހުކުމް ކުރީ މި މަހުގެ 27 ވަނަ ދުވަހުގަ އެވެ.
ހޮނިހިރު ދުވަހު ކްރިމިނަލް ކޯޓުން ކުރި ހުކުމުގައި ބުނީ މަންޑޭ ގެ މައްޗަށް ކުރި ދައުވާތަކުގެ ތެރެއިން އޭނާ ގެ މައްޗަށް ސާބިތުވީ، ޓެކުމުގެ 46 ދައުވާ އާއި، އޮޅުވާލުމުގެ އަމަލެއް ކުރުމުގެ 44 ދައުވާ އާއި، މީހަކަށް ކަމެއް އޮޅުވާލުމުގެ ނިޔަތުގައި އެނގިހުރެ ސައްހަ ނޫން ލިޔުމެއް ދިނުމުގެ 3 ދައުވާ އާއި، މަނީ ލޯންޑްރިންގ ގެ 1 ދައުވާ އޭނާ ގެ މައްޗަށް ސާބިތުވާ ކަމަށެވެ.
އަންގާރަ ދުވަހު ކްރިމިނަލް ކޯޓުން ކުރި ހުކުމުގައި އޭނާ ގެ މައްޗަށް 397 އަހަރުގެ ޖަލުގެ ހުކުމެއް އައިސްފައި ވަނީ އޭނާ ގެ މައްޗަށް ސާބިތުވި ޓެކުމުގެ 46 ދައުވާގައި، ކޮންމެ ދައުވާއެއް ގައި 8 އަހަރުގެ ޖަލު ހުކުމެއް ތަންފީޒުކުރަން ޖެހޭ ހެން ޖުމްލަ 368 އަހަރުގެ ޖަލު ހުކުމަކާއި، އޮޅުވާލުމުގެ އަމަލެއް ކުރުމުގެ 44 ދައުވާގައި ޖުމްލަ 14 އަހަރުގެ ޖަލު ހުކުމެއްގެ އިތުރުން މަނީ ލޯންޑްރިންގ ގެ ކުށުގައި 15 އަހަރުގެ ޖަލު ހުކުމެއްގެ އިތުރުން ސައްހަ ނޫން ލިޔުމެއް ދިނުމުގެ 3 ދައުވާއެއް ގައި ދޮޅު އަހަރުގެ ޖަލު ހުކުމެއް އިއްވުމުން ނެވެ.
އެހެން ކަމުން ބަންދުގައި ހޭދަކުރި މުއްދަތު އުނި ކުރުމަށްފަހު، ހުރިހާ ދައުވާއެއްގެ އަދަބަކީ ޖުމުލަ 397 އަހަރާއި 6 މަހާއި 20 ދުވަސް ކަމަށް މައްސަލަ ބައްލަވާ ގާޒީ އަލީ ނަދީމް ހުކުމް ކުރެއްވި އެވެ. ޖަލު ހުކުމުގެ އިތުރުން މަނީ ލޯންޑްރިންގ ގެ ކުށުގައި މަންޑޭ 30 މިލިއަން ރުފިޔާއިން ޖޫރިމަނާ ކުރުމާއެކު ފައިސާ ނެގި މީހުންނަށް އެ ފައިސާ ދިނުމަށް ވެސް ކޯޓުން އަމުރު ކޮށްފައި ވެ އެވެ.
އޭގެ އިތުރުން އޭނާ ގަނެފައިވާ ޕެންޓްހައުސްއާއި އެ ތަނުގައި ހުރި މުދާތައް ދައުލަތަށް ނެގުމަށް ވެސް ހުކުމް ކޮށްފައި ވެ އެވެ.
ކްރިމިނަލް ކޯޓުން ވަނީ މަންޑޭގެ އިތުރުން އޭނާ އާއެކު މި މައްސަލައިގައި ހިމެނޭ ޖައިޝާން ސައީދު 159 އަހަރަށް ޖަލަށް ލުމަށް ވެސް ހުކުމް ކޮށްފަ އެވެ.
