ފުލުހުންގެ ބަންދު ގައި ބަހައްޓައިގެން ކޯޓަށް ހާޒިރު ކުރުމަށް މަންޑޭ ހޯދަނީ
ހަސަން މަމްދޫހު ބަންދުގައި ބަހައްޓައިގެން 2025 ޑިސެންބަރު 27 ވަނަ ދުވަހުގެ 14:00 އަށް ކޯޓަށް ހާޒިރުކޮށްދިނުމަށް ފުލުހުންގެ މައްޗަށް އަމުރުކޮށްފައިވޭ. މި އަމުރާ ގުޅިގެން ކޯޓަށް ހާޒިރުކުރުމަށް ކުރަންޖެހޭ މަސައްކަތްތައް ފުލުހުން ދަނީ ކުރަމުން.
ކޭ ޕާކު މައްސަލައިގައި ސީރިއަސް ތުހުމަތުތަކެއް ކުރެވޭ މަމްދޫހު (މަންޑޭ)
ކޭ-ޕާކް ފްލެޓްތައް ވިއްކުމުގެ ނަމުގައި މަކަރާއި ހީލަތުން އެތައް ބައެއްގެ އަތުން ފައިސާ ނެގިކަމުގެ ތުހުމަތު ކުރެވޭ ހަސަން މަމްދޫހު (މަންޑޭ) ކޯޓަށް ހާޒިރު ނުވުމުން ފުލުހުންގެ ބަންދުގައި ބަހައްޓައިގެން ކޯޓަށް ހާޒިރުކުރުމަށް އޭނާ ހޯދަން ފަށައިފި އެވެ.
ރާއްޖެ އެމްވީ އިން ކުރި ސުވާލަކަށް ޖަވާބުދެމުން ފުލުހުން ބުނީ އ. އެރަލްަސީ /މާލެ، ޙަސަން މަމްދޫހު ބަންދުގައި ބަހައްޓައިގެން 2025 ޑިސެންބަރު 27 ވަނަ ދުވަހުގެ 14:00 އަށް ކޯޓަށް ހާޒިރުކޮށްދިނުމަށް ފުލުހުންގެ މައްޗަށް ކޮށްފައިވާ އަމުރަކާ ގުޅިގެން ކޯޓަށް ހާޒިރުކުރުމަށް ކުރަންޖެހޭ މަސައްކަތްތައް ކުރަމުންދާ ކަމަށެވެ.
ބުރާސްފަތި ދުވަހު މަންޑޭ އޭނާ ގެ މައްސަލައިގެ އަޑު އެހުމަށް ހާޒިރު ނުވުމުން އެ މައްސަލައިގެ ހުކުމް ކުރުން ހޮނިހިރު ދުވަހަށް ވަނީ ލަސްކޮށްފަ އެވެ. ކްރިމިނަލް ކޯޓުގައި ބޭއްވި އަޑު އެހުމުގައި އެ މައްސަލަ ބައްލަވާ ގާޒީ އަލީ ނަދީމް ވިދާޅުވީ އެ އަޑު އެހުން ފަސްކުރުމަށް މަންޑޭ ގެ ފަރާތުން އެދުނު ނަމަވެސް ޝަރީއަތް އޮންނާނެކަން މަންޑޭ އަށް އަންގާފައިވާނެ ކަމަށެވެ. އެ ސަބަބަށްޓަކާ ކޯޓަށް ހާޒިރުނުވާ މީހުންނާ މެދު އަމަލުކުރާ އުސޫލުން މަންޑޭ އާއި މެދު ވެސް އަމަލު ކުރާނެ ކަމަށް ކޯޓުން ވަނީ ބުނެފަ އެވެ.
ހަންބޯ ކޮމްޕެނީ ޕްރައިވެޓް ލިމިޓެޑުން ހުޅުމާލޭ ގައި ތަރައްގީކުރަމުންދާ ކޭ-ޕާކް ރެޒިޑެންސް ގެ އެޕާޓްމަންޓްތައް ވިއްކުމުގައި އޮޅުވާލުމާއި، މަކަރާއި ހީލަތް ހަދާފައިވާކަމަށް ތުހުމަތުކުރެވޭ މައްސަލައިގައި މަންޑޭގެ މައްޗަށް 100 އަށް ވުރެ ގިނަ ދައުވާ ދައުލަތުން ވަނީ އުފުލާފަ އެވެ. އަދި ދިވެހި ފުލުހުންގެ ޚިދުމަތުން މި މައްސަލައިގެ ތަހުގީގު ފުރިހަމަކުރުމަށް ފަހު ގެއްލުން ލިބުނު 51 މީހުންނާ ގުޅިގެން ދައުވާތައް ކުރުމަށް ކްރިމިނަލް ކޯޓަށް ހުށަހެޅީ 12 ޑިސެންބަރު 2023 ގައެވެ.
މަންޑޭގެ މައްޗަށް ކުރާ ދައުވާތައް ސާބިތުވެއްޖެ ނަމަ އޭނާ އަށް ދިގު މުއްދަތެއް ޖަލު ހުކުމެއް އަންނާނެ ކަން ފާހަގަކޮށްލެވެ އެވެ.
