13 އަހަރުގެ ކުޑަކުއްޖާގެ މަރުގެ މައްސަލައިގައި 17 އަހަރުގެ ކުއްޖަކުގެ މައްޗަށް ހުށަހެޅި ދައުވާތައް ސާބިތުވެފައިވާ އިރު، ޤަސްދުގައި މީހަކު މެރުމުގެ ކުށުގައި 16 އަހަރާ 10 މަހާއި 7 ދުވަހަށް ބަންދުކުރަން އަމުރުކޮށް، ކަރެކްޝަނަލްގައި ހޭދަކުރި 4 އަހަރާ 6 މަސް އުނިކުރުމުން ތަންފީޛުކުރަންޖެހޭނީ 12 އަހަރާ 4 މަހާއި 5 ދުވަސް. މި މައްސަލައިގައި ޒިހާން ނަމަކަސް ކިޔާ މީހެއްގެ މައްޗަށް 13 ދައުވާ އުފުލާފައިވާއިރު އޭނާގެ މައްސަލަ ކުރިއަށްދަނީ ކްރިމިނަލް ކޯޓުގައި ސިއްރުކޮށްގެން.
2021 ވަނަ އަހަރު ހުޅުމާލޭ ދެވަނަ ފިޔަވަހީގައި 13 އަހަރުގެ ކުއްޖަކު މަރާލި މައްސަލައިގައި 17 އަހަރުގެ ކުއްޖާގެ މައްޗަށް ކުށް ސާބިތުވެ އަދަބު ވަނީ ކަނޑައަޅާފައި
ހުޅުމާލޭގެ ދެވަނަ ފިޔަވަހީގައި އުމުރުން 13 އަހަރުގެ ކުޑަ ފިރިހެން ކުއްޖަކު ރަހީނުކޮށް މަރާލި މައްސަލައިގައި ހިމެނޭ 17 އަހަރުގެ ކުއްޖާގެ މައްޗަށް ޤަސްދުގައި މީހަކު މެރުމާއި ހުއްދަ ނޫން ގޮތުގައި މީހަކު ހިފެހެއްޓުމާއި މައްޔިތާގެ ބޭނުން ނަހަމަ ގޮތުގައި ކުރުމުގެ ކުށުގެ ދައުވާ ސާބިތުވެއްޖެ އެވެ.
ޕްރޮސެކިއުޓަރ ޖެނެރަލް (ޕީޖީ) އޮފީހުން 22 ޖޫން 2021 ދުވަހުގެ ދަންވަރު 02:00 ހާއިރު، ހުޅުމާލެ ފޭސް 2 ގެ ފަޅުތެރޭ މޫދުގައި އޮތް ލަގެޖް ފޮއްޓެއްގެ ތެރެއިން 13 އަހަރުގެ ކުޑަކުއްޖެއްގެ ހަށިގަނޑު ފެނުނު މައްސަލާގައި، ކުއްޖާ މަރާލިކަމަށް ތުހުމަތުކުރެވުނު 17 އަހަރުގެ ކުޑަކުއްޖެއްގެ މައްޗަށް އެ އޮފީހުން ޖުވެނައިލް ކޯޓަށް ހުށަހެޅި ޤަޞްދުގައި މީހަކު މެރުމާއި، ހުއްދަނޫން ގޮތުގައި މީހަކު ހިފެހެއްޓުމާއި މައްޔިތާގެ ބޭނުން ނަހަމަ ގޮތުގައި ކުރުމުގެ ކުށުގެ ދަޢުވާތައް ސާބިތުވާކަމަށް އެކޯޓުން 23 ޑިސެންބަރު 2025 ގައި ޙުކުމްކޮށްފައިވާ ކަމަށެވެ.
ޤަޞްދުގައި މީހަކު މެރުމުގެ ކުށުގެ އަދަބެއްގެ ގޮތުން 16 އަހަރާ 10 މަހާއި 7 ދުވަހަށް ކުޑަކުދިންގެ ކަރެކްޝަނަލް މަރުކަޒެއްގައި ބަންދުކުރުމަށް އަމުރުކޮށް، ޙުކުމްކުރުމުގެ ކުރިން ބަންދުގައި ހޭދަކުރި 4 އަހަރާއި 6 މަހާއި 2 ދުވަސް އުނިކުރުމުން ތަންފީޛު ކުރަންޖެހޭ މުއްދަތަކީ 12 އަހަރާ 4 މަހާއި 5 ދުވަސް ކަމުގައި ކަނޑައަޅައި ކައްފާރާއެއްގެ ގޮތުން ވިދިވިދިގެން 2 މަސް ދުވަހު ރޯދަ ހިފުމަށް ކޯޓުން ވަނީ އަމުރުކޮށްފަ އެވެ.
ކޯޓުން ވަނީ ހުއްދަނޫން ގޮތުގައި މީހަކު ހިފެހެއްޓުމުގެ ކުށުގެ އަދަބެއްގެ ގޮތުން 11 މަހާއި 9 ދުވަހަށް ޖުވެނައިލް ޑިޓެންޝަން ސެންޓަރެއްގައި ބަންދުކުރުމަށް އަމުރުކޮށްފަ އެވެ. އަދި މައްޔިތާގެ ބޭނުން ނަހަމަ ގޮތުގައި ކުރުމުގެ ކުށުގެ އަދަބެއްގެ ގޮތުން 18 ދުވަހަށް ޖުވެނައިލް ޑިޓެންޝަން ސެންޓަރެއްގައި ބަންދުކުރުމަށް އަމުރުކޮށްފައިވެ އެވެ.
މި މައްސަލާގައި އިތުރު ބޮޑު މީހެއްގެ މައްޗަށް ކްރިމިނަލް ކޯޓަށް ހުށަހަޅާފައިވާ މައްސަލާގައި އެކޯޓުން ޙުކުމެއް ކުރުމުން މަރުގެ ދިޔައާމެދު ގޮތެއް ކަނޑައެޅުމަށްޓަކައި ޖުވެނައިލް ކޯޓަށް ހުށަހެޅުމަށް އަންގާފައިވެ އެވެ. މިއީ 2021 ގައި ހިނގި ހާދިސާއެއް ކަމުން މިހާރު 17 އަހަރުގެ ކުއްޖާގެ މިހާރުގެ އުމުރަކީ 21 އަހަރެވެ. އޭނާ ގެ މައްޗަށް ކުށް ސާބިތުވާކަމަށް ކަނޑައެޅީ 19 މާޗް 2024 ގަ އެވެ. ނަމަވެސް ހުކުމް އިއްވާ އަދަބު ކަނޑައަޅާފައި ނުވެ އެވެ.
މި މައްސަލައިގައި ދެން ދައުވާ އުފުލީ ނ. ލަންދޫ، ބަގީޗާގޭ އިބްރާހީމް ޒިހާންގެ މައްޗަށެވެ. ޒިހާންގެ މައްޗަށް 7 ބާވަތެއްގެ 13 ދައުވާއެއް އުފުލި އެވެ. އޭގެ ތެރޭގައި ޤަސްދުގައި މީހަކު މެރުން، ކުޑަކުއްޖެއްގެ ހަށިގަނޑުގައި ޖިންސީ ނިޔަތެއް އޮވެގެން ޤަޞްދުގައި އަތްލުމުގެ ކުށުގެ 5 ދަޢުވާ، ޖިނާއީ ކުށެއް ކުރުމުގައި ކުޑަކުއްޖަކު ބޭނުންކުރުމުގެ ކުށުގެ 3 ދަޢުވާ، ހުއްދަނޫން ގޮތުގައި މީހަކު ހިފެހެއްޓުން، މައްޔިތާގެ ބޭނުން ނަހަމަ ގޮތުގައި ކުރުން، ކުޑަކުއްޖަކަށް ޖިންސީ ގޯނާކުރުމަށްޓަކައި އެކުއްޖާ ގްރޫމްކުރުން، ކުޑަކުއްޖަކަށް މަސްތުވާއެއްޗެއް ދީގެން، އެ ކުއްޖާއާއެކު، މީހަކު ޖިންސީ ޢަމަލެއް ހިންގުމުގެ ކުށުގެ ދައުވާ ހިމެނެއެވެ.
އެންމެފަހުން ޒިހާން ގެ ދައުވާތަކުގެ އަޑުއެހުމެއް ބޭއްވީ މި މަހުގެ 3 ވަނަ ދުވަހު އެވެ. އޭނާގެ މައްޗަށް ކުރާ ދައުވާތައް ކްރިމިނަލް ކޯޓުގައި ކުރިއަށް ގެންދަނީ ސިއްރުކޮށްގެންނެވެ.
ހުޅުމާލެ ދެވަނަ ފިޔަވަހީގައި، މީހުން ވަނުން މަނާކޮށްފައިވާ ސަރަހައްދުގެ މޫދު ތެރޭގައި ދަގަނޑެއްޖަހައި އޭގައި އައްސާފައި އޮތް ފޮއްޓެއްގެ ތެރެއަށް އެ ކުއްޖާގެ ހަށިގަނޑު ލާފައި އޮއްވާ ފުލުހުން އެ ކުއްޖާ ނެގީ 2021 ވަނަ އަހަރުގެ ޖޫން މަހުގެ 21 ވަނަ ދުވަހު އެވެ.
ކުއްޖާގެ ހަށިގަނޑު އެތަނުން ނެގީ ކުއްޖާ މަރާލިކަމަށް ތުހުމަތުކުރެވޭ މީހުންގެ ހާޒިރުގަ އެވެ. މި މައްސަލައިގެ ދައުވާ އުފުލާފައިވަނީ 2021 ވަނަ އަހަރު އޮގަސްޓު މަހުގެ 19 ވަނަ ދުވަހު އެވެ.
