އޭސީސީ އާއި ފުލުހުންނާއި ގުޅިގެން މިހާރު 13 މައްސަލަ އެއް އެބަ ބަލާ: ފުލުހުން
ފުލުހުންގެ އިކޮނޮމިކް ކްރައިމް ޑިޕާޓްމަންޓަށް މި އަހަރު 168 މައްސަލަ ރިޕޯޓުކޮށްފައިވާއިރު އޭގެ ތެރެއިން 23 މައްސަލަ ދައުވާކުރުމަށް ޕީޖީއަށް ފޮނުވާފައިވޭ.
ފުލުހުންގެ ނޫސްވެރިންގެ ބައްދަލުވުމުގެ ތެރެއިން
އެންޓިކޮރަޕްޝަން ކޮމިޝަން އޭސީސީ އާއި ފުލުހުންނާއި ގުޅިގެން މިހާރު 13 މައްސަލަ އެއް ބަލަމުންދާ ކަމަށް މޯލްޑިވްސް ޕޮލިސް ސަރވިސް އިން ހާމަކޮށްފި އެވެ.
ފުލުހުން ބޭއްވި ނޫސްވެރިންގެ ބައްދަލުވުމެއްގައި އިކޮނޮމިކް ކްރައިމް ޑިޕާޓްމަންޓުގެ މަސައްކަތްތަކުގެ މައުލޫމާތު ހިއްސާކުރައްވަމުން ސްޕްރިޓެންޑެންޓް އޮފް ޕޮލިސް އަހުމަދު ހުސައިން ވިދާޅުވީ އޭސީސީ އާއި އެކު ބަަލަމުންދާ މައްސަލަތަކުގެ ތެރޭގައި ދައުލަތުގެ މުއައްސާތަކުގެ ކޮރަޕްޝަނާއި ގުޅުން ހުރި ކަންކަން ހިމެނޭ ކަމަށެވެ. އެހެންނަމަވެސް އެ މައްސަލަތަކުގެ ތަފްސީލް ހިއްސާކުރައްވާފަ އެއް ނުވެ އެވެ.
އެ ޑިޕާޓްމެންޓުގެ މަސައްކަތްތަކާއި މެދު އޭނާ އިތުރަށް ވިދާޅުވީ މި އަހަރު ފްރޯޑް އެންޑް ފައިނޭންޝިއަލް އިންވެސްޓިގޭޝަން ޑިޕާޓްމަންޓަށް ރިޕޯޓުކޮށްފައި ވަނީ 168 މައްސަލަ ކަމަށެވެ. އޭގެ ތެރެއިން 23 މައްސަލަ އެއްގައި ދައުވާކުރުމަށް ޕީޖީ އަށް ފޮނުވާފައިވާ ކަމަށް އޭނާ ވިދާޅުވި އެވެ. އޭނާ ވަނީ އިތުރު މައްސަލަތަކުގެ ތަފާސްހިސާބަށް އަލިއަޅުވާލައްވާފަ އެވެ. މީގެ އިތުރުން މިދިޔަ އަހަރުގެ މައްސަލަތަކާއެކު 185 މައްސަލަ އެއް ތަހުގީގުކޮށް ނިންމާފައިވާ ކަމަށް އޭނާ ވިދާޅުވި އެވެ.
އިތުރު ބައެއް ތަފާސްހިސާބުތަކަށް ބަލާ އިރު، ކޮމްޕްލެކްސް ފައިނޭންސްގެ 1 މައްސަލަ އާއި ކޯޕަރޭޓް ކޮރަޕްޝަންގެ 7 މައްސަލަ، މަނީލޯންޑަރިންގެ 5 މައްސަލަ އަދި އެސެޓް ރިކަވަރީގެ 2 މައްސަލަ ހުށަހަޅާފައި ވެ އެވެ. މީގެ އިތުރުން މި އަހަރު މިހާތަނަށް 25 މައްސަލައަކާ ގުޅޭގޮތުން ފައިނެންޝިއަލް ރިޕޯޓް ހެދުމަށް އެދިފައި ވާއިރު އޭގެ ތެރެއިން 32 މައްސަލައެއްގެ ރިޕޯޓް މިހާރު ވަނީ ނިމިފަ އެވެ.
