ޔުއެފާ ޗެމްޕިއަންސް ލީގުގައި ބާސެލޯނާއާ ދެކޮޅަށް ކުޅުނު މެޗުން ޗެލްސީ މޮޅުވެއްޖެ އެވެ.

ޗެލްސީގެ އަމިއްލަ ދަނޑުގައި އަންގާރަ ދުވަހުގެ ރޭ ދަންވަރު ކުޅުނު މެޗު އެ ޓީމުން ކާމިޔާބު ކުރީ 3-0 އިންނެވެ. މެޗުގެ ފުރަތަމަ ހާފުގައި ޗެލްސީ އަށް އެއް ލަނޑުގެ ލީޑެއް ލިބުނުއިރު، ދެ ވަނަ ހާފުގައި އެ ޓީމުން ވަނީ ބާސެލޯނާ ކޮޅަށް ދެ ލަނޑު ޖަހައިގެން މެޗުން މޮޅުވެފަ އެވެ.

މެޗުގެ ފުރަތަމަ ހާފުގެ 27 ވަނަ މިނެޓުގައި ޗެލްސީ އަށް ލީޑު ލިބުނީ ބާސެލޯނާގެ ޖޫލްސް ކޫންޑޭ އަތުން ބައި ކޮޅަށް ވަތް ލަނޑުންނެވެ. އެއީ ޗެލްސީގެ މާކް ކުކުރޭލާ ހުރަސްކޮށްދިން ބޯޅައެއް ޕެޑްރޯ ނެޓޯ ފޮނުވާލި ވަގުތު ކޫންޑޭގެ ފައިހައި ޖެހި ގޯލަށް ވަދެގެންނެވެ.

މެޗުގައި ބާސެލޯނާ އަށް އެންމެ ބޮޑު ގެއްލުމެއް ދެއްކީ ފުރަތަމަ ހާފުގެ ފަހު ވަގުތު އެ ޓީމުގެ ރޮނާލްޑް އަރައުހޯ އަށް ދެވަނަ ރީނދޫ ކާޑާ އެކު ރަތް ކާޑު ދެއްކުމުންނެވެ. އަރައުހޯ އަށް ދެ ވަނަ ރީނދޫ ކާޑެއް ދެއްކީ ޗެލްސީގެ ކުކުރޭލާ އަށް ކުރި ފައުލަކާ ގުޅިގެންނެވެ.

އެއް ކުޅުންތެރިޔަކު މަދުން ކުޅެމުން ދިޔަ ބާސެލޯނާ ކޮޅަށް ޗެލްސީ އިން ދެ ވަނަ ލަނޑެއް ޖެހީ، މެޗުގެ ދެ ވަނަ ހާފު ފަށައިގެން ދިހަ ވަނަ މިނެޓުގަ އެވެ. އެއީ ރީސް ޖޭމްސް ތަނަވަސްކޮށްދިން ފުރުސަތެއްގައި އެސްޓެވާއޯ ޖެހި ލަނޑެކެވެ.

އޭގެ ފަހުން މެޗުގެ 73 ވަނަ މިނެޓުގައި ޗެލްސީ އިން ވަނީ ތިން ވަނަ ލަނޑެއް ޖަހައި ބާސެލޯނާގެ މައްޗަށް ފުރިހަމަ މޮޅެއް ހޯދައިފަ އެވެ. އެ ލަނޑު ޗެލްސީ އަށް ޖަހައިދިނީ ލިއަމް ޑެލަޕް އެވެ. މެޗުގައި އޭނާ ކުޅެން ނިކުތީ ވެސް ބަދަލު ކުޅުންތެރިޔެއްގެ ގޮތުގަ އެވެ. އެ ލަނޑު ޖަހަން ޑެލަޕް އަށް ފުރުސަތު ތަނަވަސްކޮށްދިނީ އެންޒޯ ފެނާންޑޭޒް އެވެ.

މެޗަށް ފަހު ވާހަކަ ދައްކަމުން ޗެލްސީގެ ކޯޗު އެންޒޯ މަރެސްކާ ބުނެފައި ވަނީ، އޭނާ ޤަބޫލު ކުރާ ގޮތުގައި ބާސެލޯނާ އަތުން ލިބުނު މޮޅަކީ ޗެލްސީ އަށް ވަރަށް ބޮޑު މޮޅެއް ކަމަށެވެ. ސަބަބަކީ އިދިކޮޅު ޓީމަކީ ބާސެލޯނާ ކަމަށްވުން ކަމުގައި މަރެސްކާ ބުންޏެވެ. އެހެން ނަމަވެސް، ޓީމެއްގެ ހައިސިއްޔަތުން ޗެލްސީގެ ފެންވަރާއި، އެ ޓީމަށް ހާސިލު ކުރެވޭނެ ކަންކަން ބަދަލު ނުވާ ކަމުގައި އޭނާ ފާހަގަ ކުރި އެވެ.

އެކަން ފާހަގަ ކުރަމުން މަރެސްކާ ބުނީ އެ މެޗުން ލިބުނު މޮޅު ހުރިހާ ގޮތަކުން ވެސް ޚާއްސަވާ ކަމަށެވެ. އެހެން ނަަމަވެސް، އިތުރަށް އެ ވާހަކަ ދައްކަން ބޭނުން ނުވާ ކަމަށް ވެސް އޭނާ ބުންޏެވެ. އެ މެޗު ނިމުނީ ކަމަށާއި، ދެން ޗެލްސީ އިން ކުރަން ޖެހޭ ކަމަކީ ކުރިއަށް އޮތް މެޗަށް ފުރިހަމަ އަށް ފޯކަސް ކުރުން ކަމުގައި މަރެސްކާ ބުނެފައިވެ އެވެ.

މޮޅާއެކު ޗެލްސީ އޮތީ ޗެމްޕިއަންސް ލީގު ތާވަލްގެ ފަސް ވަނައިގަ އެވެ. އެއީ މިހާތަނަށް އެ ޓީމު ކުޅެފައިވާ ފަސް މެޗުން 10 ޕޮއިންޓާ އެކު އެވެ. ޗެލްސީ އަތުން ބަލިވި ބާސެލޯނާ އޮތީ ފަސް މެޗުން ހަތް ޕޮއިންޓާ އެކު 15 ވަަނައިގަ އެވެ.