ފަހު ވަގުތު ބޯންްމައުތުން ޔުނައިޓެޑާ އެއްވަރު ކޮށްފި

އިނގިރޭސި ޕްރިމިއަރ ލީގުގައި ބޯންމައުތާ ދެކޮޅަށް ކުޅުނު މެޗުން މެންޗެސްޓަރ ޔުނައިޓެޑު އެއްވަރު ވެއްޖެ އެވެ. 

ހޯމަ ދުވަހުގެ ރޭ ޔުނައިޓެޑުގެ އަމިއްލަ ދަނޑުގައި ކުޅުނު މެޗު ނިމުނީ 4-4 އިން އެއްވަރު ވެގެންނެވެ. މެޗުގައި ބޯންމައުތުން ކުރި ހޯދާފައި ވަނިކޮށް، ޔުނައިޓެޑުން ފަހަތުން އަރައި ލީޑު ވެސް ނެގި އެވެ. ނަމަވެސް މެޗުގެ ފަހު ވަގުތުގައި ލަނޑު ޖަހައިގެން ބޯންމައުތުން ވަނީ ޔުނައިޓެޑާ އެއްވަރު ކޮށްފަ އެވެ.

މެޗު ފަށައިގެން 13 ވަނަ މިނެޓުގައި ޔުނައިޓެޑުން ވަނީ ލަނޑު ޖަހައި ލީޑު ނަގައިފަ އެވެ. އެ ލަނޑު އެ ޓީމަށް ޖަހައިދިނީ އަމަދް ޑިއާލޯ އެވެ. ނަމަވެސް، ފުރަތަމަ ހާފުގެ ފުރިހަމަ ވަގުތު ހަމަވާން ފަސް މިނެޓަށް ވެފައި ވަނިކޮށް އެންޓޮއިން ސެމެންޔޯ ވަނީ ލަނޑު ޖަަހައި ބޯންމައުތަށް ނަތީޖާ ހަމަހަމަ ކޮށްފަ އެވެ. އޭގެ ފަހުން ފުރަތަމަ ހާފުގެ ފަހު ވަގުތުގައި ދެ ވަނަ ފަހަރަށް ޔުނައިޓެޑަށް ލީޑު ނަގައިދިނީ ކަސެމީރޯ އެވެ.

މެޗުގެ ދެ ވަނަ ހާފު ފަށައިގެން ދެ ވަނަ މިނެޓުގައި ބޯންމައުތުން ވަނީ ދެ ވަނަ ލަނޑެއް ޖަހައި ނަތީޖާ ހަމަހަމަ ކޮށްފަ އެވެ. އެ ލަނޑު އެ ޓީމަށް ޖަހައިދިނީ އެވަނިލްސަން އެވެ. އޭގެ ހަ މިނެޓު ފަހުން މާކަސް ޓަވަނިއާ ވަނީ ތިން ވަނަ ލަނޑެއް ވެސް ޖަހައި، ބޯންމައުތަށް ލީޑު ނަގައިދީފަ އެވެ. 

އޭގެ ފަހުން މެޗުގައި ޔުނައިޓެޑުން ވަނީ ދެ ލަނޑު ޖަހައިގެން ލީޑު ނަގައިފަ އެވެ. އެގޮތުން މެޗުގެ 77 ވަނަ މިނެޓުގައި އެ ޓީމަށް ނަތީޖާ ހަމަހަމަ ކޮށްދިނީ ކެޕްޓަން ބްރޫނޯ ފެނާންޑޭސް އެވެ. އަދި އޭގެ ދެ މިނެޓު ފަހުން މަތެއުސް ކުންހާ ވަނީ އިތުރު ލަނޑެއް ޖަހައި ޔުނައިޓެޑަށް ލީޑު ނަގައިދީފަ އެވެ. މެޗުގެ ފުރިހަމަ ވަގުތު ހަމަވާން ހަ މިނެޓަށް ވެފައި ވަނިކޮށް، އެލީ ޖޫނިއާ ކްރޫޕީ ވަނީ ލަނޑު ޖަހައި ބޯންމައުތަށް ނަތީޖާ ހަމަހަމަ ކޮށްދީފަ އެވެ.

މި ނަތީޖާ އާއެކު ޔުނައިޓެޑު އޮތީ ލީގު ތާވަލްގެ ހަ ވަނަ މަގާމުގަ އެވެ. މިހާތަނަށް ލީގުގައި ކުޅެފައިވާ 16 މެޗުން އެ ޓީމަށް ލިބެނީ 26 ޕޮއިންޓެވެ. ޔުނައިޓެޑު އަތުން ޕޮއިންޓެއް ހޯދި ބޯންމައުތު އޮތީ ލީގު ތާވަލްގެ 13 ވަނައިގަ އެވެ. އެއީ މިހާތަނަށް ކުޅެފައިވާ 16 މެޗުން 21 ޕޮއިންޓާ އެކު އެވެ.

މެޗަށް ފަހު ވާހަކަ ދައްކަމުން ޔުނައިޓެޑުގެ ކޯޗު ރުބެން އަމޯރިމްް ބުނެފައި ވަނީ، ބޯންމައުތު އަތުން މޮޅެއް ހޯދޭނެ ގޮތް ނުވުމުން އެކަމާ ވަރަށް ބޮޑަށް ހިތްހަމަ ނުޖެހިފައި ހުރި ކަމަށެވެ. ބޯންމައުތާ ދެކޮޅަށް ކުޅުނު މެޗަކީ ވަރަށް ވާދަވެރި އަދި ފޯރި ގަދަ މެޗެއް ކަމަށް ފާހަގަކޮށް އަމޯރިމް ބުނީ، ޔުނައިޓެޑަށް މުހިންމު ދެ ޕޮއިންޓު ގެއްލުނީ ދެ ވަނަ ހާފުގައި ނޫން ކަމަށެވެ. އޭނާ ބުނީ ފުރަތަމަ ހާފުގައި ވެސް ޔުނައިޓެޑަށް އޮތީ ދެ ޕޮއިންޓު ގެއްލިފައި ކަމަށެވެ.

އަމޯރިމް ބުނީ މެޗުގައި ޔުނައިޓެޑުން ލަނޑު ޖަހަން ވަރަށް ގިނަ ފުރުސަތު ތަކެއް ތަނަވަސް ކުރި ކަމަށާއި، ފުރަތަމަ ހާފުގައި ވެސް ރަނގަޅު ލީޑެއް ނަގާނެ ފުރުސަތު ލިބުނު ކަމަށެވެ. އޭނާ ބުނީ ޔުނައިޓެޑުގެ ކުޅުންތެރިން މެޗުގައި ކުޅެމުން ދިޔަ ގޮތަށް ބަލާއިރު، އެހެން ނަތީޖާ އަކަށް ވެސް އުންމީދު ކުރެވުނު ކަމަށެވެ. ޚާއްސަކޮށް މެޗު ފަށައިގެން ކުޅުންތެރިން ރަނގަޅަށް ކުޅެމުން ދިޔަ ކަމަށާއި، ނަތީޖާ ތަފާތުވާން ޖެހޭނެ ކަމަށް ޤަބޫލު ކުރާ ކަމަށް އޭނާ ބުންޏެވެ. 

ނަމަވެސް، ދެ ވަނަ ހާފު ފަށައިގެން ބައެއް ކަންކަން މަދުވަމުން ގޮސް، ޔުނައިޓެޑަށް ގޯސް ތަކެއް ހެދުނު ކަމަށް އަމޯރިމް ވަނީ ފާހަގަ ކޮށްފަ އެވެ. އިތުރަށް އަމޯރިމް ބުނީ މެޗުގައި ކޮންޓްރޯލްް ހޯދައި، އެ ކޮންޓްރޯލް ހިފަހައްޓަން އިތުރު މަސައްކަތް ތަކެއް ކުރަން ޖެހޭ ކަމަށާއި، ކުރިއަށް އޮތް ތަނުގައި އެކަމަށް ސަމާލުކަން ދޭނެ ކަމަށެވެ.