ފަހު ވަަގުތު މޮޅުވެ، ޗެލްސީ ސެމީ ފައިނަލަށް
17 ޑިސެމްބަރު 2025 | ބުދަ 07:44މެޗަށް ފަހު ވާހަކަ ދައްކަމުން ޗެލްސީގެ ކޯޗު އެންޒޯ މަރެސްކާ ބުނެފައި ވަނީ، އަނެއްކާ ވެސް އެ ޓީމަށް ސެމީ ފައިނަލެއްގައި ކުޅުމުގެ ފުރުސަތު ލިބުމުން އޭނާ އުފާވާ ކަމަށެވެ. އޭނާ ބުނީ އެއީ ޗެލްސީގެ ސަޕޯޓަރުންނަށް ވެސް ހައްގުވާ ކަމެއް ކަމަށާއި، އެންމެން ވެސް ބޭނުން ވަނީ ކުލަބު ކުރިއަށް ދާން ކަމަށް.
މެޗުގައި ލަނޑު ޖެހުމަށް ފަހު ޗެލްސީގެ ކުޅުންތެރިން އުފާ ފާޅު ކުރަނީ
ކަރަބޯ ކަޕްގެ ކުއާޓާ ފައިނަލްގައި ކާޑިފް ސިޓީއާ ދެކޮޅަށް ކުޅުނު މެޗުން މޮޅުވެ، ޗެލްސީ އިން މުބާރާތުގެ ސެމީ ފައިނަލްގެ ފުރުސަތު ހޯދައިފި އެވެ.
އަންގާރަ ދުވަހުގެ ރޭ ކުޅުނު ކުއާޓާ ފައިނަލް މެޗު ޗެލްސީ އިން ކާމިޔާބު ކުރީ 3-1 އިންނެވެ. މެޗުގައި ޗެލްސީ އިން ލަނޑު ޖަހައި ކުރި ހޯދާފައި ވަނިކޮށް، ކާޑިފް ސިޓީ އިން ވަނީ ނަތީޖާ ހަމަހަމަ ވެސް ކޮށްފަ އެވެ. ނަމަވެސް، މެޗުގެ ފަހު ވަގުތުގައި ލަނޑު ޖަހައިގެން ޗެލްސީ ވަނީ މެޗުން މޮޅުވެފަ އެވެ.
މެޗުގެ ދެ ވަނަ ހާފު ފަށައިގެން 12 ވަނަ މިނެޓުގައި ޗެލްސީ އިން ލަނޑު ޖަހައި ލީޑު ނެގި އެވެ. އެ ލަނޑު އެ ޓީމަށް ޖަހައިދިނީ އަލެހަންދްރޯ ގާނާޗޯ އެވެ. އޭގެ ފަހުން މެޗުގެ 75 ވަނަ މިނެޓުގައި ކާޑިފް ސިޓީ އިން ވަނީ ލަނޑު ޖަހައި ނަތީޖާ ހަމަހަމަ ކޮށްފަ އެވެ. އެ ޓީމަށް ނަތީޖާ ހަމަހަމަ ކޮށްދިނީ ޑޭވިޑް ޓާންބުލް އެވެ.
މެޗުގެ ފުރިހަމަ ވަގުތު ހަމަވާން އަށް މިނެޓަށް ވެފައި ވަނިކޮށް، ދެ ވަނަ ފަހަރަށް ޗެލްސީ އަށް ލީޑު ނަގައިދިނީ ޕެޑްރޯ ނެޓޯ އެވެ. އޭގެ ފަހުން މެޗުގެ ފުރިހަމަ ވަގުތު ހަމަވެ އިތުރަށް ދެއްކި ވަގުތުގައި ޗެލްސީ އިން ވަނީ ތިން ވަނަ ލަނޑެއް ވެސް ޖަހައިފަ އެވެ. ޕެޑްރޯ ތަނަވަސްކޮށްދިން ފުރުސަތެއްގައި އެ ލަނޑު ޗެލްސީ އަށް ޖަހައިދިނީ ގާނާޗޯ އެވެ.
މެޗަށް ފަހު ވާހަކަ ދައްކަމުން ޗެލްސީގެ ކޯޗު އެންޒޯ މަރެސްކާ ބުނެފައި ވަނީ، އަނެއްކާ ވެސް އެ ޓީމަށް ސެމީ ފައިނަލެއްގައި ކުޅުމުގެ ފުރުސަތު ލިބުމުން އޭނާ އުފާވާ ކަމަށެވެ. އޭނާ ބުނީ އެއީ ޗެލްސީގެ ސަޕޯޓަރުންނަށް ވެސް ހައްގުވާ ކަމެއް ކަމަށާއި، އެންމެން ވެސް ބޭނުން ވަނީ ކުލަބު ކުރިއަށް ދާން ކަމަށެވެ.
އެކަން ފާހަގަކޮށް މަރެސްކާ ބުނީ ބައެއް މެޗު ތަކުން މޮޅުވުމަށް ޗެލްސީ އަށް އުނދަގޫވެ، މޮޅެއް ހޯދިފައި ނެތުމުން ސަޕޯޓަރުން ތިބެނީ ވަރަށް ބޮޑަށް މާޔޫސްވެފައި ކަމަށެވެ. ސަޕޯޓަރުންގެ އެ އިހުސާސް ޤަބޫލު ކުރެވޭކަން ފާހަގަކޮށް މަރެސްކާ ބުނީ، މި މެޗުން ލިބުނު މޮޅަކީ އަނެއްކާ ވެސް ޗެލްސީ އަށް އިތުރު ހިތްވަރެއް ކަމަށެވެ.
އިތުރަށް ވާހަކަ ދައްކަމުން މަރެސްކާ ބުނީ، ޗެލްސީއާ އެންމެ ފުރަތަމަ ހަވާލުވީ ފަހުން ފެށިގެން ވެސް އެ ކުލަބުގައި އޭނާ ހުންނަނީ ހިތްހަމަ ޖެހިގެން ކަމަށެވެ. އެއީ ހަމައެކަނި ކާޑިފް ސިޓީ އަތުން މޮޅުވެ، ސެމީ ފައިނަލަށް ދިޔުމުންވާ ކަމެއް ނޫން ކަމަށާއި، ކުލަބުގައި ކުރާ މަސައްކަތާއި، ކުޅުންތެރިންގެ ކުޅުމާ މެދު އަބަދު ވެސް އުފާވާ ކަމަށް އޭނާ ބުންޏެވެ.
