އެމެރިކާގެ ރައީސް ޑޮނަލްޑް ޓްރަމްޕް އަންގާރަ ދުވަހު ސައުދީ ވަލީ އަހުދު މުހައްމަދު ބިން ސަލްމާން (އެމްބީއެސް) އަށް ވައިޓް ހައުސް އިން ހޫނު މަރުހަބާ އެއް ދަންނަވައިފި އެވެ.

ވައިޓް ހައުސް އިން ވަލީ އަހުދު އަދި ބޮޑު ވަޒީރަށް މަރުހަބާ ދެންނެވީ ހާއްސަ ރަސްމިއްޔާތެއްގައެވެ. ދެބޭފުޅުން ސަލާން ކުރެއްވި އިރު ވައިޓް ހައުސް ގެ މަތިން ފައިޓަރޖެޓް ތައް ޚާއްސަ ފޯމޭޝަން އަކަށް އުދުހެމުން ދިޔައެވެ.

ހަތް އަހަރަށްވުރެ ގިނަ ދުވަހަށް ފަހު ވައިޓް ހައުސް އަށް ކުރައްވާ ފުރަތަމަ ޒިޔާރަތުގައި އެމްބީއެސް އަށް ޓްރަމްޕް މަރުހަބާ ދެންނެވީ ސައުތު ލޯންގައި އޮތް އޮނަރގާޑަކާ ބޮޑު ބަޑީގެ ސެލިއުޓާ އެކުގައެވެ.

ދެ ލީޑަރުންގެ ދެމެދު ބޭއްވުމަށް ހަމަޖެހިފައިވާ މަޝްވަރާތަކުގައި ސަލާމަތީ ގުޅުންތަކާއި، މަދަނީ ނިއުކްލިއަރ ކޯޕަރޭޝަން އަދި ސައުދީ އާ އެކު ހަދާފައިވާ ބިލިއަން ޑޮލަރުގެ ވިޔަފާރީގެ އެއްބަސްވުންތަކާ ބެހޭ ވާހަކަތައް ހިމެނޭނެ ކަމަށް ބެލެވެއެވެ.

ޓްރަމްޕް އެމްބީއެސް އަށް ދެންނެވި ހޫނު މަރުހަބާ އިން ދުނިޔޭގެ އެންމެ ބޮޑު އިގްތިސާދާއި އެންމެ ބޮޑު ތެޔޮ އެކްސްޕޯޓަރާ ދެމެދުގައިވާ ޚާއްސަ ގުޅުން ހާމަވާ ކަމަށް ރިޕޯޓުތަކުގައި ފާހަގަ ކޮށްފައި ވެއެވެ.

ޓްރަމްޕް ވަލީ އަހުދަށް ރަތްދޫލައިގެ މަތީގައި ހިނިތުންވުމާއެކު މަރުހަބާ ވިދާޅުވެ ސަލާން ކުރެއްވި އިރު، ވަށައިގެން ޚާއްސަ ޔުނިފޯމުގައި ތިބި އަސްކަރީ ގާޑުން އެތުރިގެން ތިއްބެވެ.

މަޝްވަރާތަކަށް ވަޑައިގަތުމުގެ ކުރިން، އޯވަލް އޮފީހުގެ ބޭރު ފާރުގައި ހުރި ކުރީގެ ރައީސުންގެ ފޮޓޯތައް ޓްރަމްޕް އެމްބީއެސް އަށް ދައްކާލެއްވި އެވެ.

ވައިޓް ހައުސްގެ އޯވަލް އޮފީހުގައި ޓްރަމްޕް އާ އެމްބީއެސް މަޝްވަރާތައް ބާއްވައި، ކެބިނެޓް ރޫމްގައި މެންދުރުގެ ފަރިއްކޮޅުގައި ވަނީ ބައިވެރިވެވަޑައިގެންފައެވެ.

އެމްބީއެސް ގެ މި ދަތުރުފުޅުގެ ތެރޭގައި ޓްރަމްޕް އުއްމީދު ކުރައްވަނީ މެއި މަހު ސައުދީ އަށް ކުރެއްވި ދަތުރުފުޅުގައި ސައުދީން ވައުދުވި 600 ބިލިއަން ޑޮލަރުގެ އިންވެސްޓްމަންޓްގެ ކަންކަން ކުރިއަށް ގެންދެވުމަށެވެ. މިދަތުރުފުޅުގައި މި ވައުދުގެ ތެރޭގައި ހިމެނޭ ގިނަ މަޝްރޫއުތަކެއް އިއުލާނު ކުރައްވާނެ ކަމަށް ބެލެވެއެވެ. ސައުދީ އާއި އެމެރިކާ އިން ދިފާއީ ދާއިރާ އިންނާއި، މަދަނީ ނިއުކްލިއަރ ހަކަތައިގެ ރޮނގުންނާއި އަދި އެމެރިކާގެ އާޓިފިޝަލް އިންޓެލިޖެންސް ގެ ރޮނގުން ބިލިއަން ޑޮލަރުގެ އިންވެސްޓްމަންޓްގެ އެއްބަސްވުންތައް ހަދަން ތައްޔާރަށް ތިބި ކަމަށް އޮފިޝަލުންނާ ހަވާލާދީ މީޑިއާ ރިޕޯތުތައް ބުނެފައި ވެއެވެ. ޓްރަމްޕް ހޯމަ ދުވަހު ނޫސްވެރިންނަށް ވިދާޅުވީ އެފް-35 ފައިޓަރ ޖެޓްތައް ސައުދީ އަށް ވިއްކަން ތައްޔާރަށް ހުންނެވި ކަމަށެވެ.

މިއީ ސައުދީ އަރަބިއްޔާ އަށް ހަނގުރާމަމަތީ ވައިގެ އުޅަނދުތައް އެމެރިކާ އިން ވިއްކާ ފުރަތަމަ ފަހަރު ކަމަށްވާއިރު މިއީ އެމެރިކާގެ ސިޔާސަތައް އައި މުހިންމު ބަދަލެއްކަން ފާހަގަ ކުރެވެއެވެ. މިހާތަނަށް އެފް-35 މިލިޓަރީ ޖެޓުތައް މެދުއިރުމަތީގައި ލިބިފައިވާ ހަމައެކަނި ގައުމަކީ އިޒްރޭލެވެ.

މިލިޓަރީ އިކުއިޕްމަންޓް ގެ އިތުރަށް، ސައުދީ ވަލީ އަހުދު ސަލާމަތީ ގެރެންޓީ އެމެރިކާ އިން ބޭނުންފުޅު ވެއެވެ. ތަޖުރިބާކާރުން ދެކޭ ގޮތުގައި އެމްބީއެސް ގެ މި ދަތުރުފުޅުގައި ގަތަރަށް ދެއްވި ފަދަ ސަލާމަތީ ގެރެންޓީ އެއް ޓްރަމްޕް ގެ އެގްޒެކެޓިވް އޯޑަރަކުން ސައުދީ އަށް ދެއްވާނެ ކަމަށް ބެލެވެއެވެ.