އިޒްރޭލުން ސޯމާލީލޭންޑް ބަލައިގަތުމަކީ ސަރަހައްދަށް އޮތް ބޮޑު ބިރެއް: ސޯމާލިއާގެ ރައީސް
1991 ގައި އަމިއްލަ އަށް މިނިވަންކަން އިޢުލާންކުރި ސޯމާލީލޭންޑް އޮތީ އެކަހެރިކޮށްފައި ނަމަވެސް، އިޒްރޭލު ވަނީ ސޯމާލީލޭންޑް ބަލައިގަތް ފުރަތަމަ ގައުމަށް ވެފައި. ސޯމާލިއާ، އެފްރިކާ ޔޫނިއަން، މިޞްރު، ތުރުކީ، ޖީސީސީ އަދި އޯއައިސީން ވަނީ މި ނިންމުން ކުށްވެރިކޮށްފައި.
ހަސަން ޝެއިޚް މުހައްމަދު
ސޯމާލިއާ އިން ވަކިވެގަނެފައިވާ ސޯމާލީލޭންޑް، އިޒްރޭލުން ބަލައިގަތުމަކީ، "ދުނިޔޭގެ ސަލާމަތާއި ހަމަޖެހުމަށާއި، ސަރަހައްދުގެ ސަލާމަތާއި ހަމަޖެހުމަށް އޮތް ބިރެއް" ކަމަށް، ސޯމާލިއާގެ ރައީސް ޙަސަން ޝައިޚް މުޙައްމަދު، ވިދާޅުވެއްޖެއެވެ.
ސޯމާލިއާގެ ގާނޫނު ހަދާ މަޖިލީހުގެ ކުއްލި ބައްދަލުވުމެއް ގައި އާދިއްތަ ދުވަހު ވާހަކަ ދައްކަވަމުން ވިދާޅުވީ، އިޒްރޭލުގެ ބޮޑުވަޒީރު ބެންޖަމިން ނަތަންޔާހޫ ސޯމާލީލޭންޑް ބަލައިގަންނަ ކަމަށް ހުކުރު ދުވަހު ކުރެއްވި އިއުލާނުން، ސޯމާލީލޭންޑް ބަލައިގަތް ފުރަތަމަ ގައުމަކަށް އިޒްރޭލު ވެގެންދިއުމަކީ، "ސޯމާލިއާގެ ސިޔާދަތީ މިނިވަންކަމާއި، ސަރަހައްދީ އެއްބައިވަންތަ ކަމާއި، އެ ގައުމުގެ ރައްޔިތުންގެ އެއްބައިވަންތަކަމާ ދެކޮޅަށް ދިން ހަރުކަށި ޙަމަލާއެއް" ކަމަށް ރައީސް މުޙައްމަދު ވިދާޅުވިއެވެ.
ސޯމާލީލޭންޑުން ސޯމާލިއާ އިން މިނިވަންކަން އިޢުލާނުކުރީ 1991 ވަނަ އަހަރުގައެވެ. އަދި އެތައް އަހަރެއް ވަންދެން މިނިވަން ދައުލަތެއްގެ ގޮތުގައި ބައިނަލްއަޤްވާމީ ގޮތުން ބަލައިގަނޭތޯ މަސައްކަތްކޮށްފައިވެއެވެ.
މިނިވަން ދައުލަތެއްގެ ގޮތުގައި އަމިއްލަ އަށް އިޢުލާންކޮށްފައިވާ ސޯމާލީލޭންޑަށް އަދަން ކަނޑުން ސްޓްރެޓީޖިކް ގޮތުން މުހިންމު ޖާގަ އެއް ލިބިފައިވެއެވެ. އަދި އެތަނުގެ އަމިއްލަ ފައިސާ އާއި، ޕާސްޕޯޓާއި، ސިފައިން ވެސް ތިބެ އެވެ.
ނަމަވެސް، އަމިއްލަ އަށް މިނިވަންކަން އިޢުލާނުކުރި ފަހުން، ސިޔާސީ ގޮތުން ސޯމާލީލޭންޑް އޮތީ އެކަހެރިވެފަ އެވެ.
އިޒްރޭލުގެ މި އިއުލާނަށް ފަހު، ހުކުރު ދުވަހު ސޯމާލިއާގެ ސަރުކާރާއި، އެފްރިކާ ޔޫނިއަނުން ވަނީ ވަރަށް ބޮޑަށް ހިތްހަމަނުޖެހުން ފާޅުކޮށްފަ އެވެ.
މޮގަދިޝޫއިން މިކަން ސިފަކޮށްފައިވަނީ، އެ ގައުމުގެ ސިޔާދަތީ މިނިވަންކަމަށް ދެވުނު "ހަރުކަށި ޙަމަލާއެއް" ގެ ގޮތުގައެވެ. މީގެ އިތުރުން މިޞްރާއި، ތުރުކީ އާއި، ހަ ގައުމު ހިމެނޭ ގަލްފް ކޯޕަރޭޝަން ކައުންސިލް (ޖީ.ސީ.ސީ) އާއި، އޯގަނައިޒޭޝަން އޮފް އިސްލާމިކް ކޯޕަރޭޝަން (އޯ.އައި.ސީ) އިން ވެސް ވަނީ މި ނިންމުން ކުށްވެރިކޮށްފައެވެ.
