އިނގިރޭސި ޕްރިމިއާ ލީގުގައި ލިވަޕޫލް 3-0 އިން ބަލިކޮށް މެންޗެސްޓާ ސިޓީން ލީގުގެ ދެވަނަ އަށް ޖެހިލައިފި އެވެ.

އާދީއްތަ ދުވަހުގެ ރޭ އަމިއްލަ ދަނޑުގައި ކުޅުނު މި މެޗުގައި ސިޓީން ވަނީ މޮޅު ކުޅުމެއް ދައްކާފަ އެވެ.

މެޗުގެ ފުރަތަމަ ހާފުން ފެށިގެން ސިޓީން ވަނީ ލިވަޕޫލްގެ ގޯލަށް ނުރައްކާ ކުރަން ފަށާފަ އެވެ. ސިޓީ އަށް 13 ވަނަ މިނިޓްގައި ލީޑުނަގަން ލިބުނު ފުރުސަތުގައި އާލިން ހާލަންޑް ފޮނުވާލި ޕެނަލްޓީ ލިވަޕޫލްގެ ކީޕަރު، ޖިއޯޖީ މަމަޑާޝްވިލީ ވަނީ މަތަކޮށްފަ އެވެ. ނަމަވެސް މެޗުގެ 29 ވަނަ މިނިޓްގައި ހާލަންޑް ވަނީ ގޯލެއް ޖަހާ ސިޓީއަށް ލީޑު ނަގައިދީފަ އެވެ. މި ގޯލަކީ މަޓެއުސް ނޫނޭސް ނެގި ހުރަހަކުން ހާލަންޑް ބޮލުން ޖެހި ގޯލެކެވެ. މިއީ ޕްރިމިއާ ލީގުގައި ސިޓީ އަށް ހާލަންޑް ޖަހައިދިން 99 ވަނަ ގޯލެވެ.

ސިޓީގެ ފުރަތަމަ ގޯލަށް ފަހު، ލިވަޕޫލުން ވާޖިލް ވެން ޑައިކް ބޮލުން ޖެހި ގޯލުން އެއްވަރުކުރި ނަމަވެސް ވީއޭއާރް އިން ވަނީ އޮފްސައިޑް ކަމަށް ނިންމާފަ އެވެ.

ފުރަތަމަ ހާފް ނިމުމުގެ ކުރިން ސިޓީގެ ދެވަނަ ގޯލު ކާމިޔާބުކޮށްދިނީ ނިކޯ ގޮންޒާލޭޒް އެވެ. މިއާއެކު ސިޓީން ވަނީ 2-0 އިން ލީޑެއް ނަގައިގެން ފުރަތަމަ ހާފް ނިންމާލާފަ އެވެ.

މެޗުގެ 63 ވަނަ މިނިޓްގައި މި މެޗުގެ މޮޅު ކުޅުންތެރިޔާގެ އިނާމު ހޯދި ޑޮކޫ އޭރިއާބޭރުން ފޮނުވާލި ބޯޅަ ގޯލުގެ މަތީ ކަނަށް އަމާޒުކޮށް ސިޓީގެ ތިން ވަނަ ގޯލު ކާމިޔާބުކޮށްދިނެވެ. މިއާއެކު މެޗު ނިމުނީ 3-0 އިން ސިޓީ މޮޅުވެގެންނެވެ.

ލިވަޕޫލްގެ މައްޗަށް ސިޓީން ބޮޑު މޮޅެއް ހޯދި މި މެޗަކީ ސިޓީގެ ކޯޗު ޕެޕް ގާޑިއޯލާގެ ކޯޗިން ކެރިއަރުގެ 1000 ވަނަ މެޗެވެ.

ލީގުގެ އެއް ވަނައިގައި އޮތް އާސެނަލަށް 11 މެޗުން 26 ޕޮއިންޓް ލިބިފައިވެއެވެ. ދެ ވަނައިގައި އޮތް ސިޓީ އަށް 11 މެޗުން ލިބިފައިވަނީ 22 ޕޮއިންޓް އެވެ. ތިން ވަނައިގައި އޮތް ޗެލްސީ އަށް 11 މެޗުން 20 ޕޮއިންޓް ލިބިފައިވާއިރު، ހަތަރު ވަނައިގައި އޮތް ސަންޑަލެންޑަށް 11 މެޗުން 19 ޕޮއިންޓް ލިބިފައިވެ އެވެ.

ފަސް ވަނައިގައި އޮތް ޓޮޓެންހަމް ހޮޓްސްޕާސް އާއި ހަ ވަނައިގައި އޮތް އެސްޓަން ވިލާ އަދި ހަތް ވަނައިގައި އޮތް މެންޗެސްޓާ ޔުނައިޓެޑް އަދި އަށް ވަނައިގައި އޮތް ލިވަޕޫލަށް 11 މެޗުން 18 ޕޮއިންޓް ލިބިފައިވެ އެވެ.