ޔުއެފާ ޗެމްޕިއަންސް ލީގުގައި ޖަރުމަނުގެ ބަޔާ ލެވަކޫސަންއާ ދެކޮޅަށް ކުޅުނު މެޗުން މެންޗެސްޓަރ ސިޓީ ބަލިވެއްޖެ އެވެ.

ސިޓީގެ އަމިއްލަ ދަނޑު، އިއްތިހާދު ސްޓޭޑިއަމްގައި އަންގާރަ ދުވަހުގެ ރޭ ކުޅުނު މެޗުގައި ލެވަކޫސަން އިން ވަނީ 2-0 އިން ސިޓީގެ މައްޗަށް ކުރި ހޯދައިފަ އެވެ. މެޗުގެ ފުރަތަމަ ހާފުގައި ލެވަކޫސަން އިން އެއް ލަނޑު ޖެހިއިރު، ދެ ވަނަ ލަނޑު އެ ޓީމުން ޖެހީ ދެ ވަނަ ހާފުގަ އެވެ.

މެޗުގެ ފުރަތަމަ ހާާފުގެ 23 ވަނަ މިނެޓުގައި ލެވަކޫސަން އިން ވަނީ ލަނޑު ޖަހައި ލީޑު ނަގައިފަ އެވެ. އެ ލަނޑު އެ ޓީމަށް ޖަހައިދިނީ އެލެކްސް ގްރިމާލްޑޯ އެވެ. އެއީ ކްރިސްޓިއަން މިކޭލް ކޮފާނޭ ތަނަވަސްކޮށްދިން ފުރުސަތެއްގައި އޭނާ ޖެހި ލަނޑެކެވެ.

އޭގެ ފަހުން މެޗުގައި ސިޓީ އަށް ވަނީ ލަނޑު ޖަހައި ނަތީޖާ ހަމަހަމަ ކުރަން ފުރުސަތު ލިބިފަ އެވެ. ލެވަކޫސަންގެ އޭރިޔާ ތެރެއިން ސިޓީގެ އޮސްކާ ބޮބް ފޮނުވާލި ބޯޅަ ލެވަކޫސަންގެ ގޯލު ކީޕަރު ވަނީ މަތަކޮށްފަ އެވެ. އޭގެ ފަހުން ސިޓީގެ ޓިޖާނީ ރެއިންޖާސް ފޮނުވާލި ބާރު ހަމަލާ ވެސް ލެވަކޫސަންގެ ކީޕަރު ވަނީ މަތަކޮށްފަ އެވެ.

މެޗުގެ ދެ ވަނަ ހާފު ފަށައިގެން ނުވަ ވަނަ މިނެޓުގައި ލެވަކޫސަން އިން ވަނީ ދެ ވަނަ ލަނޑެއް ޖަހައި ލީޑު ފުޅާ ކޮށްފަ އެވެ. އެ ލަނޑު އެ ޓީމަށް ޖަހައިދިނީ ޕެޓްރިކް ޝިކް އެވެ. އެ ލަނޑު ޖަހަން އޭނާ އަށް ފުރުސަތު ތަނަވަސްކޮށްދިނީ އިބްރާހީމް މަޒާ އެވެ.

މޮޅާއެކު ލެވަކޫސަން އޮތީ ޗެމްޕިއަންސް ލީގު ތާވަލްގެ 13 ވަނަ މަގާމުގަ އެވެ. އެއީ މިހާތަނަަށް ކުޅެފައިވާ ފަސް މެޗުން އަށް ޕޮއިންޓާ އެކު އެވެ. ލެވަކޫސަން އަތުން ބަލިވި ނަމަވެސް، ސިޓީ އޮތީ ތާވަލްގެ ހަ ވަނަ މަގާމުގަ އެވެ. އެއީ އެ ޓީމު ކުޅެފައިވާ ފަސް މެޗުން 10 ޕޮއިންޓާ އެކު އެވެ.

މެޗަށް ފަހު ވާހަކަ ދައްކަމުން ސިޓީގެ ކޯޗު ޕެޕް ގާޑިއޯލާ ބުނެފައި ވަނީ މެޗުން ބަލިވުމުގެ ޒިންމާ އޭނާ ފުރިހަމަ އަށް ނަގާ ކަމަށެވެ. އެގޮތުން މާ ގިނަ ބަދަލު ތަކެއް ޓީމަަށް ގެނެެވުނީ ކަމަށާއި، މެޗުގެ ނަތީޖާ އެގޮތަށް ނިކުންނަން ޖެހުނު މައިގަނޑު އެއް ސަބަބަކީ އެއީ ކަމަށް ޤަބޫލު ކުރާ ކަމުގައި ގާޑިއޯލާ ބުންޏެވެ.

އެހެން ނަމަވެސް، ހުރިހާ ކުޅުންތެރިންނަށް ވެސް ފުރުސަތު ދޭން ބޭނުންވާ ކަމުގައި ގާޑިއޯލާ ބުންޏެވެ. ޚާއްސަކޮށް ފުޓުބޯޅަ ކުޅުންތެރިޔެއްގެ ގޮތުގައި ހުރެ، ފަސް މެޗު، ހަ މެޗު ނުވަތަ ހަތް މެޗު ނުކުޅެ ހުންނަން ޖެހުމަކީ ވެސް ބޮޑު ވަރެއް ކަމަށް ގާޑިއޯލާ ބުނެފައިވެ އެވެ. އެހެންކަމުން، އަބަދު ވެސް އޭނާ ބޭނުން ވަނީ ހުރިހާ ކުޅުންތެރިންނަށް ފުރުސަތު ދީގެން، އެންމެން ޝާމިކޮށްގެން ކުރިއަށް ދާން ކަމުގައި ގާޑިއޯލާ ބުންޏެވެ.