ބޯންމައުތު ބަލިކޮށް، ސިޓީ ދެ ވަނަ އަށް

އިނގިރޭސި ޕްރިމިއާ ލީގުގައި ބޯންމައުތާ ދެކޮޅަށް ކުޅުނު މެޗުން މޮޅުވެ، މެންޗެސްޓަރ ސިޓީ އިން ލީގު ތާވަލްގެ ދެ ވަނަ މަގާމަށް ޖެހިލައިފި އެވެ.

އާދިއްތަ ދުވަހުގެ ރޭ، ސިޓީގެ އިއްތިހާާދު ސްޓޭޑިއަމްގައި ކުޅުނު މެޗު އެ ޓީމުން ކާމިޔާބު ކުރީ 3-1 އިންނެވެ. މެޗުގައި ސިޓީ އިން ލަނޑު ޖަހައި ކުރި ހޯދާފައި ވަނިކޮށް، ބޯންމައުތުން ނަތީޖާ ހަމަހަމަ ވެސް ކުރި އެވެ. ނަމަވެސް، އިތުރު ދެ ލަނޑު ޖަހައިގެން ސިޓީ ވަނީ މެޗުން މޮޅުވެފަ އެވެ.

މެޗު ފަށައިގެން 17 ވަނަ މިނެޓުގައި ސިޓީ އިން ވަނީ ލަނޑު ޖަހައި ލީޑު ނަގައިފަ އެވެ. އެ ލަނޑު ސިޓީ އަށް ޖަހައިދިނީ ނޯވޭގެ ފޯވާޑު އާލިން ހާލަންޑް އެވެ. އެއީ ރަޔަން ޗާކީ ތަނަވަސްކޮށްދިން ފުރުސަތެއްގައި ހާލަންޑް ޖެހި ލަނޑެކެވެ. ނަމަވެސް އޭގެ އަށް މިނެޓު ފަހުން، ޓައިލާ އެޑަމްސް ވަނީ ލަނޑު ޖަހައި ބޯންމައުތަށް ނަތީޖާ ހަމަހަމަ ކޮށްފަ އެވެ.

ފުރަތަމަ ހާފުގެ 33 ވަނަ މިނެޓުގައި ދެ ވަނަ ފަހަރަށް ސިޓީ އަށް އަލުން ލީޑު ނަގައިދިނީ ވެސް ހާލަންޑް އެވެ. އެ ލަނޑު ވެސް ހާލަންޑް ޖެހީ ޗާކީ ތަނަވަސްކޮށްދިން ފުރުސަތެއްގަ އެވެ. އަދި މެޗުގައި ސިޓީގެ ތިން ވަނަ ލަނޑު 60 ވަނަ މިނެޓުގައި ޖެހީ ނިކޯ އޯ ރެއިލީ އެވެ. އެ ލަނޑު ޖަހަން އޭނާ އަށް ފުރުސަތު ތަނަވަސްކޮށްދިނީ ފިލް ފޮޑެން އެވެ.

މެޗަށް ފަހު ވާހަކަ ދައްކަމުން ސިޓީގެ ކޯޗު ޕެޕް ގާޑިއޯލާ ވަނީ ހާލަންޑް އަށް ވަރަށް ބޮޑަށް ތައުރީފު ކޮށްފަ އެވެ. އެގޮތުން ހާލަންޑް ކުޅެމުން އަންނަނީ ލިއޮނަލް މެސީ އާއި، ކްރިސްޓިއާނޯ ރޮނާލްޑޯއާ އެއް ފެންވަރެއްގައި ކަމަށް ގާޑިއޯލާ ބުންޏެވެ. އަދި ހާލަންޑް ނެތް ނަމަވެސް، ސިޓީ އަށް ވަރަށް ބޮޑު އުނދަގޫތަކާ ކުރިމަތިލާން ޖެހޭނެ ކަމަށް ވެސް ގާޑިއޯލާ ބުންޏެވެ.

މީގެ އިތުރުން ބޯންމައުތު އަތުން ސިޓީ މޮޅުވެފައިވާއިރު، އެ ޓީމުގައި މިހާރު އޮތީ ރަނގަޅު ރޫޙެއް ކަމަށް ގާޑިއޯލާ ސިފަ ކުރި އެވެ. ޚާއްސަކޮށް ބައެއް ކުޅުންތެރިން އެނބުރި އައިސް ޓީމާ ގުޅުމަކީ ވެސް ހިތްހަމަ ޖެހުމެއް ކަމަށް އޭނާ ބުންޏެވެ. އެހެންކަމުން ކުރިއަށް އޮތް ތަނުގައި ވެސް ސިޓީ އިން ކުރިއަށް ދާން ޖެހޭނީ ފެންވަރު ރަނގަޅު ގޮތުގައި ކަމަށް ގާޑިއޯލާ ބުންޏެވެ.

ބޯންމައުތު އަތުން މޮޅުވެ ސިޓީ ދެ ވަނައިގައި އޮތީ މިހާތަނަށް ކުޅެފައިވާ 10 މެޗުން 19 ޕޮއިންޓާ އެކު އެވެ. ހަމަ އެ އަދަދަށް މެޗު ކުޅެގެން ހަތަރު ވަނައިގައި ބޯންމައުތު އޮތީ 18 ޕޮއިންޓާ އެކު އެވެ. އެއް ވަނައިގައި އާސެނަލް އަށް 25 ޕޮއިންޓު ލިބޭއިރު، ތިން ވަނައިގައި ލިވަޕޫލް އަށް ލިބެނީ 18 ޕޮއިންޓެވެ.