އިލެކްޝަންސް ގެ ރައީސް ޒާހިދު ރައީސް މުއިއްޒު އާ ސިއްރުން ބައްދަލު ކުރެއްވީ ހޭލުންތެރިކުރުމުގެ ޕްރޮގްރާމަކަށް ބޭނުންވާ ވަސީލަތް ހޯދުމަށް ކަމަށް ޒާހިދު ވިދާޅުވެއްޖެ
އިލެކްޝަންސް ކޮމިޝަން (އީސީ) ގެ ރައީސް މުހައްމަދު ޒާހިދު އާއި ރައީސް މުހައްމަދު މުއިއްޒު ސިއްރުން ބައްދަލުކުރެވީ ރައްޔިތުން ވޯޓު ގެ ކަންކަމާއި ޑިމޮކްރެޓިކް ވެއްޓަށް ހޭލުންތެރިކަން އިތުރުކުރުމަށް ރާވާފައިވާ ކަންކަން ރައީސް މުއިއްޒު އާއި ހިއްސާކޮށް އެކަމަށް ބޭނުންވާ ވަސީލަތްތައް ހޯދުމާގުޅޭ މަޝްވަރާތައް ކުރުމަަށް ކަމަށް ޒާހިދު ވިދާޅުވި.
ރައީސް މުހައްމަދު މުއިއްޒު އިލެކްޝަންސް ކޮމިޝަންގެ ރައީސް މުހައްމަދު ޒާހިދު އަށް މަގާމުގެ ފަތްކޮޅު އަރުވަނީ
އިލެކްޝަންސް ކޮމިޝަން (އީސީ) ގެ ރައީސް މުހައްމަދު ޒާހިދު ރައީސް މުއިއްޒު އާ ސިއްރުން ބައްދަލު ކުރެއްވީ އެ ކޮމިޝަނުން ކުރިއަށް ގެންދަން ރާވާފައިވާ ހޭލުންތެރި ކުރުމުގެ ޕްރޮގްރާމަކަށް ބޭނުންވާ ވަސީލަތްތައް ހޯދުމަށް ކަމަށް ޒާހިދު ވިދާޅުވެއްޖެ އެވެ.
މައުލޫމާތު ލިބިފައިވާ ގޮތުން މި ބައްދަލުވުން ކުރިއަށްދިޔައީ މިދިޔަ އަންގާރަ ދުވަހު ރައީސް އޮފީހުގަ އެވެ. ބައްދަލުވުމަށް އީސީ ގެ ފަރާތުން ބައިވެރިވީ ޒާހިދު އެކަންޏެވެ.
އަންގާރަ ދުވަހު ޒާހިދު ރައީސް މުއިއްޒު އާ އެކު ވަކިން ބޭއްވި މި ބައްދަލުވުމުގެ އެއްވެސް މައުލޫމަތެއް އިލެކްޝަންސް ކޮމިޝަނުން ވެސް އަދި ރައީސް އޮފީހުން ވެސް އިސްވެ ހިއްސާ ކޮށްފައެއް ނުވެއެވެ. އާއްމު ގޮތެއްގައި ރައީސް މުއިއްޒު އެކިއެކި ފަރާތްތަކާ އެކު ބާއްވާ ބައްދަލުވުންތައް ފުޅާ ދާއިރާ އެއްގައި ރައީސް އޮފީހުގެ ވެބްސައިޓް މެދުވެރިކޮށް އަދި ސޯޝަލް މީޑިއާ ގެ ޒަރީއާ އިން ޕްރޮމޯޓު ކުރެ އެވެ.
މި ބައްދަލުވުމާ ގުޅޭގޮތުން ރާއްޖެ އެމްވީ އިން ސުވާލުކުރުމުން ޒާހިދު ވިދާޅުވީ، ރައީސް މުއިއްޒު އާ ވަކިން ބައްދަލު ކުރެއްވީ ރައްޔިތުން ވޯޓު ގެ ކަންކަމާއި ޑިމޮކްރެޓިކް ވެއްޓަށް ހޭލުންތެރިކަން އިތުރުކުރުމަށް ރާވާފައިވާ ކަންކަން ރައީސް މުއިއްޒު އާއި ހިއްސާކޮށް އެކަމަށް ބޭނުންވާ ވަސީލަތްތައް ހޯދުމާގުޅޭ މަޝްވަރާތައް ކުރުމަަށް ކަމަށެވެ.
މިނިވަން މުސްތަގިއްލު ކޮމިޝަނެއް ގެ ގޮތުގައި ހިންގަންޖެހޭ އީސީ އަށް ބޭނުންވާ ވަސީލަތްތަކަކީ ރައްޔިތުންގެ މަޖިލީހުން ފާސް ކުރާ ބަޖެޓުގެ ތެރެއިން ހޯދާ ވަސީލަތްތަކެއްގެ ގޮތުގައި އޮންނަނީ ކަނޑައެޅިފައެވެ. އެކަމުގައި ރައީސް އޮފީހުން ފޯރުކޮށްދޭން ޖެހޭ އެހީތެރިކަމެއް ގާނޫނުން ސާފު ނުވާކަން ފާހަގަ ކުރެވެއެވެ.
ކޮމިޝަންގެ އެހެން މެމްބަރުން ބައްދަލުވުމުގައި ބައިވެރި ނުވީ ކީއްވެތޯ އާއި އެ ބައްދަލުވުމުގެ މައުލޫމާތު ހާމަ ނުކުރެއްވީ ކީއްވެތޯ ދެންނެވުން، ވަރަށް ހިތްހަމަ ނުޖެހި ހުންނަވާ ރުންކުރުކޮށް ޒާހިދު ވިދާޅުވީ އެއީ ކޮމިޝަނުގެ މެމްބަރުންގެ މެދުގައި ވާހަކަ ދައްކައިގެން އެގޮތަށް އެއްބަސް ވުމުން ކަމަށެވެ. އަދި އޭގެ މައްސަލަ އެއް އޮތް ކަމަށް ދެކެވަޑައި ނުގަންނަވާ ކަމަށް ޒާހިދު ވިދާޅުވި އެވެ.
އަޅުގަނޑުމެން އެންމެން ވާހަކަ ދައްކާފާ އެގޮތައް ނިންމައިގެން ދިޔައީ. އޭގަ މައްސަލައެއް އެބަ އޮތްތޯ؟. އޭގަ މައްސަލަ އަކީ ކޮބާތޯ؟ ކޮމިޝަން ގެ އަމިއްލަ ނިންމުމެއް ނޫންތޯ އެއީ. ތިކަހަލަ ވާހަކަ ދެން ދެއްކުން ރަނގަޅެއް ނޫން އިނގޭތޯ. އަޅުގަނޑުމެން އަމިއްލަ އަށް ކޮމިޝަނުން ނިންމި ނިންމުމެއްގެ ތެރެއިން މިކަން ކުރިޔަށް ގެންދިޔައީއިލެކްޝަންސް ކޮމިޝަން ގެ ރައީސް މުހައްމަދު ޒާހިދު
މި ބައްދަލުވުމުގެ ވާހަކަ އީސީ ގެ ފަރާތުން ހިއްސާ ނުކުރީ ކީއްވެތޯ ސުވާލުކުރުމުން ޒާހިދު ވިދާޅުވީ، އިލެކްޝަންސް ގެ ފަރާތުން ބާއްވާ ކޮންމެ ބައްދަލުވުމެއްގެ މައުލޫމާތު ހިއްސާނުކުރާ ކަމުގަ އެވެ.
އީސީގެ ރައީސް ކަމަށް ޒާހިދު، ރައީސް މުއިއްޒު އައްޔަންކުރެއްވީ ޖެނުއަރީ 26، ގަ އެވެ. އެ މަގާމަށް އައްޔަންކުރަން މުއިއްޒު، ޒާހިދުގެ ނަން ފޮނުވުމުން ރައްޔިތުންގެ މަޖިލީހުން އޭނާ ގެ ނަން ފާސްކުރީ ވެރިކަންކުރާ ޕީއެންސީގެ މެންބަރުންގެ ފުރިހަމަ ތާއީދާ އެކު އެވެ. ޒާހިދަކީ އިލެކްޝަންސް ކޮމިޝަންގެ ރައީސް ރައީސުލްޖުމްހޫރިއްޔާ އައްޔަނު ކުރައްވާ ގޮތައް ގާނޫނަށް ގެނައި ބަދަލާ އެކު ފުރަތަމަ އައްޔަނު ކުރެއްވި އެ ކޮމިޝަނުގެ ރައީސް އެވެ.
މުއިއްޒު އީސީގެ ރައީސް އާއި ބައްދަލުކުރައްވާފައި މިވަނީ މި ސަރުކާރުން ކުރިމަތިލާ ދެވަނަ ބޮޑު އިންތިހާބު ކަމަށްވާ ލޯކަލް ކައުންސިލް އިންތިހާބު ކުޑަތަންވެފައި ވަނިކޮށެވެ.
