މިސަރުކާރުން ކަނޑިތީމުގައި ފެށި އެއްވެސް މަޝްރޫއުއެއް ކުރިއަކަށް ނުދޭ: ކައުންސިލް ރައީސް އަހުސަން
ކަނޑިތީމު ކައުންސިލްގެ ރައީސް އަހުމަދު އަހުސަން ވިދާޅުވީ މިސަރުކާރުން ރަށުގައި ގިނަ މަޝްރޫއުތަކެއް ފަށާފައި ވިޔަސް ބިން ސާފުކުރުމަށްފަހު އިތުރު އަމަލީ މަސައްކަތެއް ކުރިއަށް ނުދާކަމަށެވެ. ކުރީސަރުކާރުން ފަށާފައިހުރި މަލްޓިޕާޕަސް ހޯލާއި ސިއްހީ މަރުކަޒުގެ މަސައްކަތް ވެސް ހުއްޓިފައިވާކަން ފާހަގަކުރައްވައި އެވާހަކަ ރައީސް މުއިއްޒުއާ ހިއްސާކުރި ކަމަށް ވިދާޅުވި އެވެ. ނޮވެމްބަރު 14 ގައި ހަވާލުކުރި ވޭސްޓް މެނޭޖްމަންޓް ސެންޓަރާއި ފުޓްސަލް ދަނޑުގެ މަސައްކަތުގެ އަޕްޑޭޓް ލިބިފައި ނުވާކަން ފާހަގަކުރެއްވި އެވެ.
ކަނޑިތީމު ކައުންސިލް ގެ ރައީސް އަހުމަދު އަހުސަން
ށ. ކަނޑިތީމުގައި މިސަރުކާރުން ގިނަ މަޝްރޫއުތަކެއް ފެށި ކަމަށާއި އެހެން ނަމަވެސް އެއްވެސް މަސައްކަތެއް އެކަށީގެންވާ ގޮތެއްގައި ކުރިއަށްދާތަން ނުފެންނަ ކަމަށް ކައުންސިލް ގެ ރައީސް އަހުމަދު އަހުސަން ވިދާޅުވެއްޖެ އެވެ.
ރާއްޖެ ޓީވީ ފަށާއިރު ޕްރޮގްރާމުގައި ވާހަކަ ދައްކަވަމުން އަހުސަން ވިދާޅުވީ، ކަނޑިތީމުގެ ތަރައްގީއަށް މިސަރުކާރުން ގިނަ މަޝްރޫއުތަކެއް ފަށާފައިވާ ކަމަށާއި އެހެން ނަމަވެސް މަޝްރޫއުއަށް ބޭނުންވާ ބިން ސާފު ކުރުން ނޫން އިތުރު މަސައްކަތެއް އެކަށީގެންވާ ގޮތެއްގައި ކުރިއަށް ނުދާ ކަމަށެވެ.
އަހުސަން ވިދާޅުވީ ކުރީ ސަރުކާރުން ފަށާފައި ހުރި ދެ މަޝްރޫއުގެ ތެރެއިން މަލްޓި ޕާޕަސް ހޯލުގެ މަސައްކަތް ވަރަށް ބާރަށް ކުރީ ސަރުކާރުގައި ކުރިއަށް ގޮސް މިހާރު ޝީޓު އެޅުމަށް ތައްޔާރު ކޮށްފައިވާ ކަމަށެވެ. އެހެން ނަމަވެސް އެ ތަނުގެ ޝީޓު އެޅުމަށް ތައްޔާރު ކޮށްފައި ހުންނަތާ ދުވަސްތަކެއް ވެއްޖެ ކަމަށް އަހުސަން ވިދާޅުވި އެވެ. އޭގެ އިތުރުން ސިއްހީ މަރުކަޒުގެ ފައުންޑޭޝަން ގެ މަސައްކަތް ހުއްޓިފައިވާކަން ފާހަގަ ކޮށް އަހުސަން ވިދާޅުވީ ސިއްހީ މަރުކަޒުގެ ފައުންޑޭޝަން މަސައްކަތް ނިމިފައި ހުންނަތާ ދުވަސްތަކެއް ވެއްޖެ ކަމަށެވެ. އަދި މިހާރު އެމަސައްކަތް ކުރާ ކުންފުނިން އެ މަސައްކަތް އެހެން ކުންފުންޏަކަށް ދޭން އުޅޭ ކަހަލަ ވާހަކަތަކެއް އަޑު އިވިފައިވާ ކަމަށާއި ރައީސް މުޢިއްޒު އެންމެ ފަހުން ކަނޑިތީމަށް ކުރި ދަތުރުގައި އެވާހަކަ ހިއްސާ ކުރި ކަމަށް އަހުސަން ވިދާޅުވި އެވެ.
މިސަރުކާރުން ބިންގާ އަޅާފަ މިހާރު އަމަލީ މަސައްކަތް ފަށާފަ ހުރި މިބުނާ މަސައްކަތް ތަކަކީ ޕޮލިސް ޕޯސްޓުގެ އާއިމާރާތުގެ މަސައްކަތް.. ބިން ސާފު ކޮށްފަ އޮތީ ދެން އިތުރު މަސައްކަތެއް އަދި ކުރިއަކަށް ނުދޭ، ދެން ދެވަނަ ކަމަކަށް ފިޓްނެސް ރިކްރިއޭޝަން ސެންޓަރު ގެ މަސައްކަތް ވެސް ބިން ސާފު ކޮށްފަ ސައިޓު ތައްޔާރު ކޮށްފަ އޮތީ ދެން އަދިއެއް އަމަލީ މަސައްކަތެއް ފަށައެއް ނުގަނެވެ، ދެން އޭގެ އިތުރުން ރޯޑް ކޯޕަރޭޝަން އާ މަގުތައް ހެދުން ހަވާލުކޮށްފަ، އޭގަވެސް މުވައްޒަފުން ނެގުމުގެ މަސައްކަތް ކުރިއަށްދާ ހަބަރު ކޮންމެސް ވަރަކަށް ލިބިފައިނީ ، އޭގެ އިތުރުން ފަޅުގެ މަސައްކަތް ވެސް އެމްޓީސީސީ އާއި ހަވާލުކޮށްފަ އޮތީ. ފަޅުގެ މަސައްކަތުގެ ތިން މީހަކު މިކޮޅުގަ އުޅޭތާ ދުވަސްތަކެއް ވެއްޖެ އެހެން ނަމަވެސް އެއްވެސް މަސައްކަތޔެއް ކުރިއަކަށް ނުދޭ.ކަނޑިތީމު ކައުންސިލް ގެ ރައީސް އަހުމަދު އަހުސަން
އޭގެ އިތުރުން އަހުސަން ވިދާޅުވީ ނޮވެމްބަރު 14 ގައި އެއްފަހަރާ ގިނަ ޕްރޮޖެކްޓް ތަކެއް ކުންފުނިތަކާ ހަވާލުކުރި އިރު ކަނޑިތީމުގެ ވޭސްޓް މެނޭޖްމަންޓް ސެންޓަރު ކުންފުންޏަކާ ހަވާލުކޮށްފައި ވާކަމަށާއި އަދި ރަށުގެ ކުރީގެ ފުޓްސަލް ދަނޑު ވެސް ކުންފުންޏަކާ ހަވާލުކޮށްފައި ވާކަމަށެވެ. އަދި އެ ދެ މަސައްކަތުގެ އެއްވެސް އަޕްޑޭޓެއް މިހާތަނަށް ނުލިބޭ ކަމަށާއި މަސައްކަތް ހަވާލުކުރިކަން ހަބަރުން އެނގުން ކަމަށް އަހުސަން ވިދާޅުވި އެވެ.
އަހުސަން ވިދާޅުވީ ރަށުގައި ހިންގާ އެއްވެސް މަސައްކަތަކަށް ކައުންސިލް އިން އެއްބާރުލުން ނުދީގެން ކުރިއަށް ނުގޮސް ނޯންނާނެ ކަމަށާއި ކައުންސިލް އިން ކޮށްދޭން ޖެހޭ ހުރިހާ ކަމެއް ސަރުކާރުން އެދުނު ގޮތަށް ކޮށްދީފައި ވާނެ ކަމަށެވެ.
