އެފްޑީސީ ފްލެޓް ތަކަށް ރައީސް މުއިއްޒު ފުރަތަމަ އެންގެވި ގޮތަށް ދެއްކި ޑިޕޮސިޓް ފައިސާ ކުލިން އުނި ކުރަނީ

ފަހި ދިރިއުޅުން ކޯޕަރޭޝަން (އެފްޑީސީ)ގެ  ދަށުން މިދިޔަ ސަރުކާރުން އެޅި ގެދޮރުވެރިޔާ ފްލެޓްތަކަށް، މި ސަރުކާރުން ނަގަން ފެށި ޑިޕޮސިޓް ފައިސާ މިހާރު ދައްކައިފައިވާނަމަ، ޑިޕޮސިޓުން ކުޑަވި ބައި ކުލިން ކެނޑޭ ގޮތަށް ނިންމައިފި އެވެ.

ހައުސިން މިނިސްޓްރީން ހުކުރު ދުވަހުގެ ރޭ ބުނީ ޑިޕޮސިޓް ކުޑަކުރުމުގެ ސަބަބުން، ކުރިން އެ ދައްކައި ނިންމައިފައި ވާނަމަ، އެ ފައިސާ އިން ކުޑަވި އަދަދު އުނިކުރާނީ ދެން ދައްކަންޖެހޭ މަސްތަކުގެ ކުލިން ކަމަށެވެ.

މި ފްލެޓް ތަކުގެ ކުލީގެ ގޮތުގައި މި ސަރުކާރުން ނިންމީ، ދެ ކޮޓަރީގެ އެޕާޓްމަންޓަކުން ނަގާ ކުލި 7،000 ރުފިޔާއަށް ބޮޑު ކުރުމަށާއި، ތިން ކޮޓަރީގެ އެޕާޓްމަންޓަށް ނަގާ ކުލި 9،000 ރުފިޔާއަށް ބޮޑު ކުރުމަށެވެ. ނަމަވެސް ނިމިދިޔަ އެމްޑީޕީ ގެ ސަރުކާރުން ނިންމާފައިވަނީ ދެ ކޮޓަރީގެ އެޕާޓްމަންޓަކުން 5،000 ރުފިޔާ ނެގުމަށާއި، ތިން ކޮޓަރީގެ އެޕާޓްމަންޓަކުން މަހު ކުލީގެ ގޮތުގައި 7،000 ރުފިޔާ ނެގުމަށެވެ. އަދި އެމްޑީޕީ ސަރުކާރުން ނިންމާފައިވަނީ މި ފްލެޓް ތަކުން ސެކިއުރިޓީ ޑިޕޮސިޓް ގެ ގޮތުގައި އެއްވެސް ފައިސާ އެއް ރައްޔިތުން ގެ އަތުން ނުނެގުމަށެވެ. 

އެމްޑީޕީ ސަރުކާރުން މި އަގުތައް 15 ނޮވެމްބަރު 2023 ގައި އާންމު ކޮށް އިއުލާނު ކޮށްފައިވަނިކޮށް، ރައީސް މުއިއްޒު ވަނީ ފްލެޓް ތަކުގެ ކުލި ބޮޑުކޮށް ، 3 ކޮޓަރީގެ އެޕާޓްމެންޓަކުން ޑިޕޮސިޓް ގެ ގޮތުގައި 25،000 ރުފިޔާ އަދި 2 ކޮޓަރީގެ އެޕާޓްމެންޓަކުން 15،000 ރުފިޔާ ގެ ޑިޕޮސިޓެއް ނަގާ ގޮތަށް ހަމަޖައްސާފަ އެވެ. 

ނަމަވެސް މިކަމާ ގުޅިގެން އެ ފްލެޓް ލިބުނު މީހުންގެ ޝަކުވާ އާއި ކަންބޮޑުވުންތައް ހިއްސާކުރަމުން އަންނަތާ ގިނަ ދުވަސްތަކެއް ފަހުން ރައީސް މުއިއްޒު ނިންމެވީ ތިން ކޮޓަރީގެ އެޕާޓްމަންޓް ތަކަށް މެއިންޓެނެންސް ފީ އާއި އެކު ދައްކަން ޖެހޭ މަހު ކުލި 10،500 ރުފިޔާ 10،000 ރުފިޔާއަށް ކުޑަ ކޮށް، އެޑްވާންސް ގެ ގޮތުގައި ދައްކަންޖެހޭ 25،000 ރުފިޔާ 8،000 ރުފިޔާއަށް ކުޑަ ކުރުމަށެވެ. އަދި  ދެ ކޮޓަރީގެ އެޕާޓްމަންޓް ތަކަށް މެއިންޓެނެންސް ފީ އާއެކު  ދައްކަން ޖެހޭ މަހުކުލި 8،000 ރުފިޔާއިން 7،000 ރުފިޔާއަށް ކުޑަކޮށް، އެޑްވާންސް ގެ ގޮތުގައި ދައްކަން ޖެހޭ އަދަދު 15،000 ރުފިޔާ އިން އެއް މަހުގެ ކުލި ކަމަށްވާ 6،000 ރުފިޔާއަށް ކުޑަ ކުރުމަށެވެ. 

ރައީސް މުއިއްޒު ގެ ސަރުކާރަށް ދެ އަހަރު ވީ އިރު، އެއްވެސް ހައުސިން މަޝްރޫއެއް ގެ މަސައްކަތް އެކަށީގެންވާ ގޮތަކަށް ކުރިޔަށް ނުދާތީ ގިނަ ބައެއްގެ ފާޑުކިޔުންތައް އަންނަނީ ކުރިމަތި ވަމުންނެވެ. ހައުސިން މަޝްރޫއުތަކާ ގުޅޭ ގޮތުން ރައީސް މުއިއްޒު އެކި ފަހަރު އެކި ގޮތަށް ވާހަކަ ދައްކަވާ، ބޮޑެތި އިތުރުފުޅު ހައްދަވަމުން ދާކަމަށް ގިނަ ބަޔަކު ފާހަގަކުރެ އެވެ. ރައީސް މުއިއްޒު ބާއްވަމުންދާ ރައްޔިތުންގެ ބައްދަލުވުންތަކުން އެކަނިވެސް، މިކަން ވަރަށް ސާފުކޮށް ފެނެ އެވެ.