މި އަހަރުގެ އޮގަސްޓު މަހު ރައީސް މުއިއްޒު ވިދާޅުވީ މި މަސައްކަތުގެ އަމަލީ މަސައްކަތް އޮގަސްޓް މަހުން ފެށިގެން ކުރިއަށް އޮތް ތިން މަހެއްހާ ދުވަހުގެ ތެރޭގައި ފެށިގެން ދާނެ ކަމަށް، ނަމަވެސް އެގެ ފަހުން މިހާރު ހަތަރު މަސް ވާން ކައިރިވެފައިވާ އިރު މި މަސައްކަތުގެ އަމަލީ މަސައްކަތް ފެށިފައެއް ނުވޭ. ކުމުންދޫ ކައުންސިލް ގެ ރައީސް އަމީން އަހުމަދު ވިދާޅުވީ މަލްޓި ޕަރޕަސް ހޯލު އަޅަން ނިންމާފައިވާ ސަރަހައްދުގައި އަދި ޖަހާފައިވަނީ ފެންސެއް އެކަނި ކަމަށް.
ހދ. ކުމުންދޫ ސްކޫލު ގެ މަލްޓި ޕަރޕަސް ހޯލު އަޅަން ނިންމާފައިވާ ސަރަހައްދު
ހދ. ކުމުންދޫ ސްކޫލުގައި މި ސަރުކާރުން އަޅައިދޭން ބުނި މަލްޓި ޕަރޕަސް ހޯލުގެ މަސައްކަތް އަދިވެސް ނުފެށޭ ކަމަށް އެ ރަށު ކައުންސިލްގެ ރައީސް އަމީން އަހުމަދު ވިދާޅުވެއްޖެ އެވެ.
މި އަހަރުގެ އޮގަސްޓު މަހު ރައީސް މުއިއްޒު ވިދާޅުވީ މި މަސައްކަތުގެ އަމަލީ މަސައްކަތް އޮގަސްޓް މަހުން ފެށިގެން ކުރިއަށް އޮތް ތިން މަހެއްހާ ދުވަހުގެ ތެރޭގައި ފެށިގެން ދާނެ ކަމަށެވެ. ނަމަވެސް އެގެ ފަހުން މިހާރު ހަތަރު މަސް ވާން ކައިރިވެފައިވާ އިރު މި މަސައްކަތުގެ އަމަލީ މަސައްކަތް ފެށިފައެއް ނުވެ އެވެ.
ކުމުންދޫ ސްކޫލްގައި އިމާރާތް ކުރަން ނިންމާފައިވާ މަލްޓިޕަރޕަސް ހޯލުގެ މަސައްކަތާއި ގުޅޭގޮތުން ރާއްޖެ އެމްވީ އަށް މައުލޫމާތު ދެއްވަމުން އަމީން ވިދާޅުވީ، މަލްޓި ޕަރޕަސް ހޯލު އަޅަން ނިންމާފައިވާ ސަރަހައްދުގައި އަދި ޖަހާފައިވަނީ ފެންސެއް އެކަނި ކަމަށެވެ. އެ ސަރަހައްދު ގައި ހުރި ބޮޑު ނިކަ ގަސް ނެގުމުގެ މަސައްކަތް ވެސް އަދި ނުހިނގާ ކަމަށް އޭނާ ވިދާޅުވި އެވެ.
މަލްޓި ޕާރޕަސް ހޯލަކީ ކުމުންދޫ ސްކޫލަށް ވަރަށް މުހިންމު އިމާރާތެއް ކަން ފާހަގަ ކުރައްވާ ކުމުންދޫ ކައުންސިލްގެ ރައީސް ވިދާޅުވީ، މި މަސައްކަތް އަވަހަށް ފެށިގެން ދިޔުމަކީ ކުމުންދޫ ރައްޔިތުންގެ ވަރަށް ބޮޑު އުއްމީދެއް ކަމަށެވެ.
ރައީސް މުއިއްޒުގެ ވެރިކަމުގެ ފުރަތަމަ ދެ އަހަރު ފާއިތުވެގެން ގޮސްފައިވާ އިރު، ކުމުންދޫ ގައި ތަރައްގީ ގެ އެއްވެސް މަޝްރޫއެއް އެކަށީގެންވާ ގޮތަށް ނުހިނގާ ކަން އެ ރަށު ރައްޔިތުން ފާހަގަ ކުރެ އެވެ. އަދި ނިމިދިޔަ އެމްޑީޕީ ގެ ސަރުކާރުން އެ ރަށުގައި ފަށާފައިވާ މަޝްރޫއު ތައް ވެސް މިހާރު މަޑުޖެހިފައިވާ ކަމަށް ރައްޔިތުން ވަނީ ފާހަގަ ކޮށްފަ އެވެ.
ރައީސް ސޯލިހުގެ ވެރިކަމުގައި ހދ. ކުމުންދޫ ގެ ތަރައްގީ އަށް މުހިންމު ގިނަ މަޝްރޫއުތަކެއް ހިންގާފައިވެ އެވެ. އޭގެ ތެރޭގައި އެ ރަށު ފެނާ ނަރުދަމާ ގާއިމް ކުރުން، ކުމުންދޫ ބަނދަރު ޒަމާނީ ފެންވަރަށް ތަރައްގީ ކުރުން، ފުޓްސަލް އަދި ފުޓުބޯޅަ ދަނޑެއް އެޅުމުގެ މަސައްކަތް ހިމެނެ އެވެ. މީގެ އިތުރުން އެމްޑީޕީ ވެރިކަމުގައި ކުމުންދޫ ގައި ވަނީ އައުޓްޑޯ ޖިމް އެއް ވެސް އަޅާފަ އެވެ.
އަތޮޅުތަކުގެ ރަށްރަށުގައި އަސާސީ ޚިދުމަތްތައް ޤާއިމް ކޮށް، ރައްޔިތުންގެ ދިރިއުޅުމުގެ ފެންވަރު މަތިކުރުމަށްޓަކައި އެމްޑީޕީ ސަރުކާރުން ވަނީ، ރަށްރަށުގައި އުމްރާނީ ތަރައްގީގެ ވަރަށް ގިނަ މަޝްރޫޢުތައް ހިންގާފަ އެވެ.
