ބޮޑު ކަންނެލީގެ މަސްވެރިން ކުރަމުން ގެންދާ މުޒާހަރާގެ ތެރެއިން ހައްޔަރުކުރި މެންބަރު މައުރޫފް އާއި އިތުރު މީހުންގެ ބަންދުގެ މުއްދަތު އިތުރު ކުރުމަށް ކްރިމިނަލް ކޯޓަށް ހުކުރު ދުވަހު ހާޒިރު ކޮށްފައިވާތީ މަސްވެރިންނާއި އެމްޑީޕީ ޕީޖީ ގުރޫޕް އިން އެސަރަހައްދުގައި އިހުތިޖާޖު ކޮށްފައިވެ އެވެ. މަސްވެރިން ވަނީ މަސްވެރިކަމުގެ ވަޒީރު ޝިޔާމް އިސްތިއުފާ ދެއްވުމަށް ގޮވާލައި، މަސްވެރިންގެ ހައްގު ނުލިބި އުޅޭ ކަމަށް ބުނެފައެވެ. މަސްވެރިން ބުނީ އެމީހުންގެ ޑިމާންޑުތަކަށް އިޖާބަ ނުދޭހާ ހިނދަކު މި އިހުތިޖާޖުތައް ނުހުއްޓާނެ ކަމަށާއި ހައްޔަރުކޮށްފައިވާ މީހުން ވަގުތުން ވަގުތުން ދޫކޮށްލަން ޖެހޭ ކަމަށެވެ
މަސްވެރިކަމާއި ބެހޭ ވަޒީރު މަސްވެރިންނާއި ބައްދަލުކުރުން - ސަރުކާރުންވި ވައުދުތައް ނުފުއްދޭނެކަމަށް ވިދާޅުވި
މަސްވެރިކަމާއި ބެހޭ ވަޒީރު ޝިޔާމް އިސްތިއުފާ އަށް މަސްވެރިން ގޮވައިލައިފި އެވެ.
ބޮޑު ކަންނެލީގެ މަސްވެރިން ކުރަމުން ގެންދާ މުޒާހަރާގެ ތެރެއިން ހައްޔަރުކުރި ރައްޔިތުންގެ މަޖިލީހުގެ ކެންދޫ ދާއިރާގެ މެންބަރު މައުރޫފް އާއި އިތުރު މީހުންގެ ބަންދުގެ މުއްދަތު އިތުރު ކުރުމަށް ކްރިމިނަލް ކޯޓަށް ހުކުރު ދުވަހުގެ މެންދުރު ވަނީ ހާޒިރު ކޮށްފަ އެވެ. އެކަމާއި ގުޅިގެން މަސްވެރިންނާއި އެމްޑީޕީގެ ޕީޖީ ގުރޫޕް އިން ވަނީ އެސަރަހައްދުގައި އެމީހުން މިނިވަން ކުރުމަށް ގޮވާލައި އިހުތިޖާޖު ކޮށްފަ އެވެ.
މަސްވެރިން ކުރާ އިހުތިޖާޖުގެ ތެރެއިން މަސްވެރިން ވަނީ މަސްވެރިކަމާއި ބެހޭ ވަޒީރު ޝިޔާމް އަކީ ފިނޑި ބޭފުޅެއްކަމަށް ބުނެ އިސްތިއުފާ އަށް ވެސް ގޮވާލައިފަ އެވެ.
މިނިސްޓަރު ޝިޔާމް އަށް މި އަންގާލަނީ އަޅުގަނޑުމެންނަކީ ދިވެހި މަސްވެރިންނޭ އިރުއިރުކޮޅަ ކަލޭމެން ނޫސްބަޔާން ނެރެފައި 900 މިލިއަނޭ ބުނާއިރު ކަލޭމެން ލަދު ގަނޭހޭ. އަހަރެމެންގެ ހައްގު އަހަރެމެންނަށް ނުލިބި އަހަރެމެން މީ މަސްވެރިންނޭ. އެހެންވީމަ ކަލޭ އަށް ވަގުތުކޮޅެއް ނުދެވުނޭ ކަލޭ ތިއޮތީއެ . އަހަރެމެން ހަނދާން އެބަހުއްޓޭ ފޮނަދޫއަށް ގޮއްސަ ފުލައިޓް ޗާޓަރ ކޮށްގެން ކޫއްޑޫ އަށް ދިޔަ ހަނދާން އަހަރެމެން ހަނދާން އެބަހުއްޓޭ. އަހަރެމެންވެސް މީ ދިވެހި ރައްޔިތުން. ދާންވީހެ ބުނެބަލާށެ ގުޅާފަ ރ އަތޮޅު ދުވާފަރަށް ދާން . އަޅުގަނޑުމެން މިތިބީ ނައްޓާލަން ތައްޔާރަށް . އޭނާ ބުނޭ މިހާރުވެސް ހަމަ ބުނާއިރަށް ނައްޓާލާނަން . ހުރިހާ ދޯންޏެއް މިވަގުތުން ވަގުތައް ނައްޓާލާނަން . އޭނާ އަށް ވަގުތެއް ނެތިއްޔާ އަހަރެމެން މިތިބީ ދާގޮތައް ...މަސްވެރިންގެ އިހުތިޖާޖުގައި ޝުއޫރު ފާޅުކުރި އޮޑިވެރިއެއް
މީގެ އިތުރުން އިހުތިޖާޖުގެ ތެރެއިން ޝުއޫޜު ފާޅުކުރި ކެޔޮޅަކު ބުނީ، މަސްވެރިންގެ ޑިމާންޑް ތަކަށް އިޖާބަ ނުދޭހާ ހިނދަކު މި އިހުތިޖާޖު ތައް ނުހުއްޓާނެ ކަމަށާއި އަދި ސުލްހަވެރި އިހުތިޖާޖުގެ ތެރެއިން ހައްޔަރު ކުރި މީހުން ވަގުތުުން ވަގުތުން ދޫކޮށްލަން ޖެހޭ ކަމަށެވެ. އޭނާ ބުނީ މި އިހުތިޖާޖުތައް 3 މަސްވެގެން ދިޔަސް ނުުހުއްޓާނެ ކަމަށާއި ހައްޔަރުގައި ތިބި ތިން މީހުންގެ ހައްގުގައި ކިތަންމެ ދުވަހަކު އިހުތިޖާޖު ކުރަން ޖެހުނަސް ނުހުއްޓާނެ ކަމަށެވެ.
މި މުޒާހަރާގެ ބައިވެރިން މާލެ ބޭރުގައި މުޒާހަރާ ކުރަން ފެށުމުން، ބުރާސްފަތި ދުވަހު ފުލުހުން ވަނީ އެ މުޒާހަރާތަކުގައި ބިދޭސީން ބައިވެރިވަމުން އަންނަ ކަމަށް ބުނެ އޮޑިތަކަށް އަރައި، މީހުން ހައްޔަރުކޮށް، ތިން އޮޑި އެއްވެސް ފުލުހުންގެ ބެލުމުގެ ދަށަށް ގެންގޮސްފަ އެވެ.
ބޮޑު ކަންނެލި މަސްވެރިންގެ ޑިމާންޑުތަކަކީ، ސަރުކާރުން ކަންނެލި ގަންނަން ފެށުމާއި ކަންނެލީގެ އަގު 80ރ. އާއި 100ރ. އާ ދެމެދު ހިފެހެއްޓުމާއި ބޭސް ރޭޓުގައި ތެލާއި އައިސް ލިބޭނެ ގޮތް ހެދުމެވެ.
