ޝަމްއާން ބަންދުން ދޫ ނުކުރަން ނިންމައިފި
ބިދޭސީ އަކު ދޫކޮށްލުމަށް ފަހު އެ މީހާގެ އަތުން ފަސް ލައްކަ ރުފިޔާ އަތުލައި ދޫކޮށްލި ކަމަށް ތުހުމަތުކޮށް މާޗް މަހު ކުރީގެ އިމިގްރޭޝަން ކޮންޓްރޯލަރު ޝަމްއާން ވަހީދު މަގާމުން ވަކިކޮށް ހައްޔަރު ކޮށްފައި ވާއިރު، ބުރާސްފަތި ދުވަހު ކްރިމިނަލް ކޯޓުން ނިންމީ ބަންދުން މިވަގުތު ދޫނުކުރެވޭނެ ކަމަށް.
ކުރީގެ އިމިގްރޭޝަން ކޮންޓްރޯލަރު މުހައްމަދު ޝަމްއާން ވަހީދު ޝަރީއަތުގެ މަޖިލީހުގައި
ކުރީ ގެ އިމިގްރޭޝަން ކޮންޓްރޯލަރު މުހައްމަދު ޝަމްއާން ވަހީދުގެ މައްޗަށް ދައުލަތުން އުފުލާފައިވާ ދައުވާ އާއި ގުޅިގެން ޝަރީއަތް ނިމެންދެން ބަންދުކޮށްފައި ހުރި ކުރީގެ އިމިގްރޭޝަން ކޮންޓްރޯލަރު މުހައްމަދު ޝަމްއާން ވަހީދު ބަންދުން ދޫ ނުކުރުމަށް ނިންމައިފި އެވެ.
ޝަމްއާން ބަންދުކޮށްފައިވަނީ އިމިގްރޭޝަންގެ ބެލުމުގެ ދަށަށް ގެންދިޔަ ބިދޭސީ އެއް ގެ މައްސަލާގައި އިމިގްރޭޝަންގެ މުވައްޒަފުންތަކާ ބައިވެރިވެގެން، ބިދޭސީ މީހާގެ އަތުން 500،000 އަށް ވުރެ ގިނަ ރުފިޔާ އަތުލުމަށް ފަހު އެ މީހާ އިމިގްރޭޝަން ގެ ބަންދުން ދޫކޮށްލި ކަމަށް ތުހުމަތުކުރާ މައްސަލާގަ އެވެ. މި މައްސަލާގައި ޝަމްއާން ގެ މައްޗަށް ދައުލަތުން ގިނަ ދައުވާތަކެއް ވަނީ އުފުލައިފަ އެވެ. އޭނާ މި މައްސަލައިގައި ފުރަތަމަ ހައްޔަރު ކުރި ފަހުން މިހާތަނަށް ވެސް އޭނާ ހުރީ ބަންދުގަ އެވެ.
ޝަމްއާން ގެ ފަރާތުން އޭނާ ގެ ބަންދު މުރާޖައާ ކޮށްދިނުމަށް ވަނީ އެދިފަ އެވެ. އެހެންނަމަވެސް ބުރާސްފަތި ދުވަހު ބޭއްވި އަޑުއެހުމުގައި ކޯޓުން ނިންމާފައި ވަނީ މިވަގުތު ޝައްމާން ބަންދުން ދޫކުރެވެން ނެތް ކަމަށެވެ. ހަމައެއާއި އެކު ހެކިބަސް ނެގުމުގެ މަރުހަލާ ނިމުމުން ޝަމްއާން ދޫކޮށްލުމަށް އިއުތިރާޒެއް ނެތް ކަމަށް ދައުލަތުން ވަނީ ހާމަކޮށްފަ އެވެ.
އެ މައްސަލާގައި ޝަމްއާންގެ މައްޗަށް މަނީ ލޯންޑްރިންގެ ދައުވާ އާއި ރިޝްވަތު ހިފުމުގެ ދައުވާގެ އިތުރުން ފޭރުމުގެ ދައުވާ ކުރާއިރު، އެ މައްސަލާގައި މިހާރު ކުރިއަށް ދަނީ ހެކިބަސް ނެގުމުގެ މަރުހަލާ އެވެ. އަދި މީގެ ކުރިން ބައެއް ހެކިންގެ ހެކިބަސް ވަނީ ނަގައިފަ އެވެ.
އެ މައްސަލާގައި ޝަމްއާންގެ އިިތުރުން އިތުރު ބަޔަކަށް ވެސް ދައުވާކުރި އެވެ. އޭގެ ތެރެއިން އިމިގްރޭޝަން ގެ އެއް މުވައްޒަފަކަށް ކުރި ދައުވާ އަށް އޭނާ އިއުތިރާފުވެ، ދައުލަތާއެކު ހެދި އިއުތިރާފު އެއްބަސްވުމުގެ ދަށުން އެ މުވައްޒަފުގެ މައްސަލަ ކުރިން ވަނީ ނިންމައިފަ އެވެ.
