ހުޅުމާލޭ އިންޓަރނޭޝަނަލް ޓަރމިނަލްގައި ހުރި ކޮންޓެއިނަރެއްގައި ސިނގިރޭޓް ވައްކަންކުރި މައްސަލައިގައި 11 މީހެއްގެ މައްޗަށް ޕްރޮސިކިއުޓަރ ޖެނެރަލްގެ އޮފީހުން ކްރިމިނަލް ކޯޓަށް ދައުވާކޮށްފައިވޭ. އެޕްރީލް 26 ގައި ސިއްރުން ރާއްޖެއަށް އެތެރެކުރަން އުޅުނު ސިނގިރޭޓް ކަސްޓަމްސްގެ ބެލުމުގެ ދަށަށް ގެންދިޔައިރު ފުލުހުން މައްސަލަ ޕްރޮސިކިއުޓަރ ޖެނެރަލްގެ އޮފީހަށް ހުށަހެޅީ ޑިސެންބަރު 3 ގައި. ދައުވާ ކުރާ މީހުންގެ މައްޗަށް ވައްކަންކުރުމާއި ވައްކަންކުރުމަށް ރޭވުމާއި ވައްކަންކުރުމުގައި ބައިވެރިވުމުގެ ދައުވާތައް ކޮށްފައިވޭ.
ސިނގިރެޓު ވައްކަމުގެ މައްސަލައިގައި ހައްޔަރުކުރި ބައެއް މީހުން
ހުޅުމާލޭ އިންޓަރނޭޝަނަލް ޓަރމިނަލްގައި ހުރި ކޮންޓެއިނަރެއް ގައި ރައްކާކޮށްފައި ހުރި ގިނަ އަދަދެއްގެ ސިނގިރޭޓް ވައްކަންކުރި މައްސަލައިގައި 10 މީހެއްގެ މައްޗަށް ދައުވާކުރުމަށް ޕްރޮސިކިއުޓަރ ޖެނެރަލްގެ އޮފީހުން ކްރިމިނަލް ކޯޓަށް ހުށަހަޅައިފި އެވެ.
ޕްރޮސެކިއުޓަރ ޖެނެރަލްގެ އޮފީސް (ޕީޖީ) އިން ބުނީ މި އަހަރުގެ އެޕްރީލް މަހުގެ 26 ވަނަ ދުވަހު ދިވެހިރާއްޖެއަށް ސިއްރުން އެތެރެކުރަން އުޅުނު ސިނގިރޭޓް ކަސްޓަމްސްގެ ބެލުމުގެ ދަށަށް ގެންދިޔަ މި މައްސަލައިގައި ފުލުހުން ޕްރޮސިކިއުޓަރ ޖެނެރަލްގެ އޮފީހަށް ހުށަހެޅީ ޑިސެންބަރު މަހުގެ 3 ވަނަ ދުވަހު އެވެ. މައްސަލާގައި ލިބިފައިވާ ހެކި ޤަރީނާއަށް ރިޢާޔަތްކޮށް ޑިސެންބަރު މަހުގެ 15 ވަނަ ދުވަހު ކްރިމިނަލް ކޯޓަށް ދައުވާތައް ހުށަހަޅާފައިވެ އެވެ.
ދައުވާކުރި މީހުންގެ ތެރޭގައި ބ. އޭދަފުށީ، ދިގަލީގެ މުޙައްމަދު ވަޙީދާއި މއ. އެވަރގްލޯރީގެ އަޙްމަދު ޢާރިފާއި ހ. ނިއުހެޕިނަސްގެ މުޢާޛު ޢަލީ ހިމެނެ އެވެ. މި ތިން ބޭފުޅުންގެ މައްޗަށް ވައްކަންކުރުމަށް ރޭވުމާއި ވައްކަންކުރުމުގައި ބައިވެރިވުމުގެ ދައުވާ ކޮށްފައިވެއެވެ.
ހދ. ވައިކަރަދޫ، މެދުރީގެ ޒިވާރު އިސްމާޢީލާއި ހދ. ވައިކަރަދޫ، ނޫރަލީގެ އަޙްމަދު ޝަހީމާއި ހ. ރުމޭނިޔާގެ އަޙްމަދު ފިރުސާންގެ މައްޗަށް ވައްކަންކުރުމާއި ވައްކަންކުރުމަށް ރޭވުމުގެ ދައުވާ ކޮށްފައިވެއެވެ.
ސ. ހިތަދޫ، ޗާނދަނީގެ ޙުސައިން ސާމިޙާއި ނ. މިލަދޫ، ކެނެރީގެ އާދަމް ވަޙީދުގެ މައްޗަށް ވައްކަންކުރުމުގެ ދައުވާ ކޮށްފައިވެ އެވެ. އަދި ކ. ތުލުސްދޫ، ލިންކްގެ ޙަސަން ޢަބްދުއްރަޙްމާންގެ މައްޗަށް ވައްކަންކުރުމުގައި ބައިވެރިވުމުގެ ދައުވާ ކޮށްފައިވެ އެވެ.
ބަނގުލަދޭޝްގެ މުޙައްމަދު އަލަމިން މިއާގެ މައްޗަށް ވެސް ވައްކަންކުރުމުގައި ބައިވެރިވުމުގެ ދައުވާ ކޮށްފައިވެ އެވެ.
މި މައްސަލާގައި ތުހުމަތުކުރެވުނު ދަފްތަރު ނަންބަރު ރސ 1355، މުޙައްމަދު ޝަރީފުގެ މައްޗަށް ޖިނާއީ ކުށެއްގެ ދައުވާއެއް ކޮށް ކުށް ސާބިތުކުރެވޭ މިންވަރަށް ހެކި ޤަރީނާ ލިބިފައިވާކަމަށް ނުފެންނާތީ އޭނާ ގެ ބައި ފުލުހުންގެ ޚިދުމަތަށް އަނބުރާ ފޮނުވާލާފައިވާނެކަމަށް ޕްރޮސިކިއުޓަރ ޖެނެރަލްގެ އޮފީހުން ބުނެ އެވެ.
ވައްކަންކުރުމުގައި ބައިވެރިވުމުގެ ދައުވާ ކޮށްފައިވާ މީހުން މި ކުށުގެ ޢަމަލު އިންތިޒާމުކުރުމުގައި އިސްކޮށް ހަރަކާތްތެރިވެފައިވާތީ އެ މީހުންގެ މައްޗަށް ކަނޑައަޅައިދިނުމަށް އެދިފައިވަނީ އަސްލު ކުށްކުރި މީހުންނާ އެއް ދަރަޖައެއްގެ އަދަބެއް ކަމަށް ޕްރޮސިކިއުޓަރ ޖެނެރަލްގެ އޮފީހުން ބުނެ އެވެ.
މި ދައުވާތައް ސާބިތުވާ ޙާލަތުގައި ކުށުގެ ޢަމަލުގެ ޒާތާއި ބާވަތާއި ޙައްސާސް ކަމަށް ރިޢާޔަތްކޮށް ކަނޑައެޅެން އޮތް އެންމެ މަތީ އަދަބެއް ކަނޑައަޅައިދިނުމަށް ޕްރޮސިކިއުޓަރ ޖެނެރަލްގެ އޮފީހުން ކޯޓުގައި އެދޭނެ ކަމަށް ބުނެފައިވެ އެވެ.
ދިވެހިރާއްޖޭގެ ޤާނޫނުލްޢުޤޫބާތުގެ 211 ވަނަ މާއްދާގެ ދަށުން އެހެން މީހެއްގެ މުދަލެއް ގެ މައްޗަށް ހުއްދަނޫން ގޮތެއް ގައި ބާރު ހިންގުމާއި އެ ޤާނޫނުގެ 82 ވަނަ މާއްދާގެ ދަށުން ވައްކަންކުރުމަށް ރޭވުމާއި 30 ވަނަ މާއްދާގެ ދަށުން ވައްކަންކުރުމުގައި ބައިވެރިވުމުގެ ދައުވާތައް މި މައްސަލާގައި ކޮށްފައިވެ އެވެ.
