ދިވެހި ގައުމީ ހޭންޑްބޯލް ޓީމު އުމްރާވުމަށް މީޤާތު ހައްޖު އެންޑް އުމްރާ ގްރޫޕުން އެހީތެރިވެ ދީފި

ދިވެހި ގައުމީ ހޭންޑްބޯލް އަންހެން އަދި ފިރިހެން ޓީމު އުމްރާވުމަށް މީޤާތު ގްރޫޕުން އެހީތެރިކަން ފޯރުކޮށްދީފި އެވެ.

ސައުދީ އަރަބިއާގެ ރިޔާޟު ގައި ބޭއްވި އިސްލާމިކް ސޮލިޑޭރިޓީ ގޭމްސް ގައި ބައިވެރިވުމަށް ފަހު، މި 2 ޓީމު ޖިއްދާ އަށް ދަތުރުކުރީ ނޮވެމްބަރ 22 ވަނަ ދުވަހުއެވެ. އެ ޓީމުތަކަށް މަރުހަބާ ކިޔުމަށް މީޤާތު ހައްޖު އެންޑް އުމްރާ ގްރޫޕުގެ އިސްވެރިން ވަނީ ޖިއްދާ އެއަރޕޯޓަށް ގޮސްފައެވެ.

ޓީމުތައް ތިބުމަށް ހާއްސަކޮށްފައިވާ ހޮޓަލުން ވެސް މީގާތު ގުރޫޕުން މަރުހަބާ ކިޔައި، އުމްރާގެ މަތިވެރި އަޅުކަން އަދާކުރުމަށް، ގުރޫޕުގެ އޮފިޝަލުން ވަނީ ޓީމުގެ މެމްބަރުންނަށް އެހީތެރިވެ ދީފަ އެވެ.

މައުލޫމާތު ލިބިފައިވާ ގޮތުގައި، ޓީމުގެ މެމްބަރުން ހިރާ މިއުޒިއަމް އަށާއި އަރަފާތު ބިން ސަރަހައްދަށް ޒިޔާރަތްކޮށް ގުރޫޕުން ވަނީ އިސްލާމީ ތާރީޚާ ބެހޭ މައުލޫމާތު ފޯރުކޮށްދީފައި ވެއެވެ.

އަދި މަދީނާގެ ކަދުރު ބާޒާރަކަށް ޒިޔާރާތް ކުރުމުގެ އިތުރުން އެ ސިޓީގެ ތާރީޚީ އެކި ތަންތަން ދައްކާލައި، ތާރީޚީ މައުލޫމާތު ވެސް ވަނީ ދީފައެވެ. އެގޮތުން ޤުބާ މިސްކިތަށް ޒިޔާރަތްކުރިއެވެ. އަދި ޢުހުދުގެ މައިދާނަށް ޒިޔާރަތްކޮށް، އެ ހަނގުރާމަ ހިނގާދިޔަ ގޮތާއި، އެކަމުން ލިބިގަންނަންވީ އިބްރަތްތަކަށް އެ ގުރޫޕް ގެ ފަރާތުން ވަނީ ޓީމަށް މައުލޫމާތު ދީފަ އެވެ.

ހޭންޑްބޯލް ޓީމުން ވަނީ އިސްލާމީ ތާރީޚީ ތަންތަނަށް ޒިޔާރަތް ކޮށް މައުލޫމާތު ހޯދާފައި

ކުޅުންތެރިންނާއި އޮފިޝަލުންނާއެކު ގާތްގަޑަކަށް 46 މީހުންގެ މި ދަތުރާއި ގުޅިގެން ދިވެހި ގައުމީ ހޭންޑްބޯލް ޓީމުގެ ފަރާތުން ބުނީ މިއީ ވަރަށް ފުރިހަމަ ދަތުރެއް ކަމަށާއި ދީނީގޮތުންނާއި މައްކާ އަދި މަދީނާ އާ ބެހޭގޮތުން ވެސް މިހާތަނަށް އެނގިފައިނުވާ އެތައް މައުލޫމާތުތަކެއް ލިބުނު ކަމަށެވެ.

"އަސްލު މިއީ ވަރަށް ފުރިހަމަ ދަތުރެއް. އެންމެ ދެ ދުވަހުން ނޭނގޭނެ އެތައް މައުލޫމާތުތަކެއް ލިބިއްޖެ. ދީނީ ގޮތުން ވެސް. މައްކާ އަދި މަދީނާ އާ ގުޅޭ ގޮތުން ވެސް. މީޤާތު ގްރޫޕުން މިކަން އިންތިޒާމު ކޮށްދީފައި ވަނީ ވަރަށް ރަނގަޅަށް. ވަރަށް ބިޒީކޮށް ޝެޑިއުލް އޮތީ. އެކަމަކު ވެސް އެއްވެސް ކަމަކަށް ދަތިވިޔަ ނުދީ ފުރިހަމަކޮށްދިނީ. އެކަމަށްޓަކައި ވަރަށް ބޮޑަށް ހިތްހަމަޖެހޭ. އަދި ވަރަށްބޮޑަށް ޝުކުރިއްޔާ." ގައުމީ ހޭންޑްބޯލް ޓީމުގެ ކުޅުންތެރިން ބުންޏެވެ.

މި ދަތުރާ ގުޅިގެން މީޤާތު ހައްޖު އެންޑް އުމްރާ ގްރޫޕުގެ މެނޭޖިންގ ޑިރެކްޓަރ އަހްމަދު އާޒިމް ވިދާޅުވީ، އެ ގްރޫޕޫގެ ފަރާތުން ބެލީ އެކުދިންގެ ޝެޑިއުލް އާ އެއްގޮތަށް ކަންކަން ކޮށްދެވޭތޯ ކަމަށެވެ. އަދި އެއްވެސް ވަރަކަށް ފުށުއެރުމެއް ނައިސް، އެކުދިން ބޭނުންވި ކަންކަން ﷲގެ ރަޙުމަތްފުޅުން ކޮށްދެވުމުން އުފާކުރާ ކަމަށެވެ.

ދިވެހި ގައުމީ ހޭންޑްބޯލް އަންހެން އަދި ފިރިހެން ޓީމު މާލެ ދިއުމަށް މިހާރު ވަނީ ދަތުރުފަށާފައެވެ. އެ ޓީމު މާލެ އަންނާނީ އަންގާރަ ދުވަހު އެވެ.

މީޤާތު ހައްޖު އެންޑް ޢުމްރާ ގްރޫޕް ދިވެހިރާއްޖޭގެ އިސްލާމިކް މިނިސްޓްރީ ގައި ރަޖިސްޓަރީކޮށްފައި ވަނީ 6 ޖުލައި 2023 ގައެވެ. މި ގްރޫޕުން އަންނަނީ ކޮންމެ އަހަރެއްގެ ވެސް އެކި މަސްތަކަށް ބަހާލައިގެން އުމްރާ އަށް މީހުން ގެންދަމުންނެވެ.