ސައުދީ އަރަބިއްޔާ އިން ބައިވަރު އެފް-35 ފައިޓަރ ޖެޓް ގަންނަން ބޭނުން ކަމަށް ޓްރަމްޕް ވިދާޅުވެއްޖެ
ޓްރަމްޕް ސައުދީ އަރަބިއްޔާ އަށް އެފް-35 ފައިޓާ ޖެޓްތައް ވިއްކުމަށް ވިސްނަވަމުން ގެންދަވާއިރު، އަންނަ ހަފްތާގައި ސައުދީ ވަލީއަހުދާ ބައްދަލުކުރައްވައި އިގްތިސާދީ އަދި ދިފާޢީ ބޮޑެތި އެއްބަސްވުންތަކުގައި ސޮއިކުރެވޭނެ ކަމަށް ލަފާކުރެވޭ.
އެމެރިކާގެ ރައީސް ޑޮނަލްޑް ޓްރަމްޕް އެއާފޯސް ވަންގައި މީޑިއާ އާ ވާހަކަ ދައްކަވަނީ.
ލޮކްހީޑް މާޓިން އިން އުފައްދާ އެފް-35 ސްޓެލްތު ފައިޓާ ޖެޓްތަކެއް ސައުދީ އަރަބިއްޔާއަށް ވިއްކުމަށް ވިސްނަމުންދާ ކަމަށް ހުކުރު ދުވަހު އެމެރިކާގެ ރައީސް ޑޮނަލްޑް ޓްރަމްޕް ވިދާޅުވެއްޖެ އެވެ.
"އެމީހުން ވަރަށް ގިނަ ޖެޓްތައް ގަންނަން ބޭނުން" ޓްރަމްޕް އެއާފޯސް ވަންގައި ނޫސްވެރިންނަށް ވިދާޅުވިއެވެ.
"އަޅުގަނޑު އެކަން ބަލަމުން މިދަނީ. އެމީހުން އަޅުގަނޑުގެ ކިބައިން އެކަން ބަލައިދިނުމަށް ވަނީ އެދިފައި. އެމީހުން ވަރަށް ގިނަ ޖެޓު ގަންނަން ބޭނުން،" ޓްރަމްޕް ވިދާޅުވި އެވެ.
ޓްރަމްޕް އަންނަ ހަފްތާގައި ސައުދީ ވަލީއަހުދު މުހައްމަދު ބިން ސަލްމާން އާ ވައިޓް ހައުސް ގައި ބައްދަލުކުރެއްވުމުގެ އިންތިޒާމުތައް ދަނީ ކުރަމުންނެވެ. ވަލީއަހުދުގެ ދަތުރުފުޅު ގައި އިގްތިސާދީ އަދި ދިފާޢީ އެއްބަސްވުންތަކުގައި ސޮއި ކުރައްވާނެ ކަމަށް ލަފާ ކުރެވެ އެވެ.
ޓްރަމްޕް ތަކުރާރުކޮށް ވިދާޅުވީ ސައުދީން އިޒްރޭލާ ގުޅުން ނޯމަލައިޒް ކުރާނެ ކަމަށް އުއްމީދުކުރައްވާ ކަމަށެވެ. ސައުދީން ބުނަމުން އައިސްފައި ވަނީ ފަލަސްތީނަށް މިނިވަންކަން ލިބޭނެ ރޯޑް މެޕެއް ނެތި އިޒްރޭލާ ގުޅުން ނޯމަލައިޒް ނުކުރާނެ ކަމަށެވެ.
