ކުރިއަށް އޮތް މެޗު ތަކުގައި ފެންނާނީ ތަފާތު ބާސެލޯނާއެއް ކަމަށް ބުނެ، އެ ޓީމަށް އިރުޝާދު ދެމުން އަންނަ ހަންސީ ފްލިކް ސަޕޯޓަރުންނަށް މެސެޖެއް ދީފި އެވެ.

ފްލިކް މިހެން ބުނެފައި ވަނީ ޔުއެފާ ޗެމްޕިއަންސް ލީގުގައި ޗެލްސީއާ ދެކޮޅަށް ކުޅުނު މެޗުން ބާސެލޯނާ ބަލިވި މެޗަށް ފަހު އެވެ. ޗެލްސީގެ އަމިއްލަ ދަނޑުގައި އެ ޓީމާ ދެކޮޅަށް ކުޅުނު މެޗުން ބާސެލޯނާ ބަލިވެފައިވާއިރު، މި ފަހަކަށް އައިސް އެ ޓީމަށް ނަތީޖާ ނުނެރެވޭ ކަމުގެ ކަންބޮޑުވުން ބޮޑުވެފައިވެ އެވެ.

ޗެލްސީ މެޗަށް ފަހު ނޫސްވެރިންނާ ވާހަކަ ދައްކަމުން ފްލިކް ބުނެފައި ވަނީ، ވަރަށް އަވަހަށް ކުރިއަށް އޮތް ތަނުގައި ތަފާތު ބާސެލޯނާއެއް ފެންނާނެ ކަމަށާއި، އެކަމުގެ ޔަޤީންކަން އޭނާ ދޭން ބޭނުންވާ ކަމަށެވެ. އެގޮތުން ފްލިކް ބުނީ ފަރިތަ ކުރުން ތަކުގައި ބާސެލޯނާ އިން ފެންނަ ކަންކަން އޭނާ އަށް އިނގޭ ކަމަށާއި، ފާއިތުވި ހަ ހަފުތާއާ އަޅާ ބަލާއިރު މިހާރު ވެސް ކަންކަން ބަދަލުވެފައިވާ ކަމަށެވެ.

އެހެންކަމުން އޭނާ ބުނީ ބާސެލޯނާއާ މެދު އަދި ވެސް ބޮޑު އުންމީދެއްގައި ކަމަށާއި، ބާސެލޯނާ އަށް ކުރިއަށް ދެވޭނެ ކަމުގެ ޔަޤީންކަން އޮތް ކަމަށް ފްލިކް ވަނީ ބުނެފަ އެވެ. އެކަން ފާހަގަކޮށް ފްލިކް ބުނީ ޗެލްސީއާ ދެކޮޅަށް ކުޅުނު މެޗު ވެސް ބާސެލޯނާ އިން ފެށީ ވަރަށް ރަނގަޅަށް ކަމަށާއި، އެ ޓީމަށް ލަނޑު ޖަހަން ވެސް ފުރުސަތު ލިބުނު ކަމަށެވެ. އެހެން ނަމަވެސް، ބައި ކޮޅަށް ފުރަތަމަ ލަނޑު ވަނުމާއި، ދެން އެއާ ވިދިގެން ދެއްކި ރަތް ކާޑުގެ ސަބަބުން މުޅި މެޗުގެ އޮއިވަރު ބަދަލު ވެގެން ދިޔަ ކަމަށް ފްލިކް ވަނީ ބުނެފަ އެވެ.

އެކަން ފާހަގަކޮށް ފްލިކް ބުނީ، އެއް ކުޅުންތެރިޔަކު މަދުކޮށް ކުޅެން ޖެހުނުއިރު، މިހާރު އޮތް ޗެލްސީ ކައިރިން ފަހަތުން އަރައި މޮޅުވުމަކީ އުނދަގޫ ކަމެއް ކަމަށެވެ. އެހެންކަމުން ޗެލްސީ އަތުން ލިބުނު ހިތްދަތި ބަލި ބާސެލޯނާ އިން ޤަބޫލު ކުރަން ޖެހޭ ކަމަށާއި، އެއަށް ފަހު އައު ހިތްވަރަކާ އެކު ކުރިއަށް ދާން މަސައްކަތް ކުރަން ޖެހޭ ކަމުގައި ފްލިކް ބުންޏެވެ.

އިތުރަށް ވާހަކަ ދައްކަމުން ފްލިކް ބުނީ ކުޅުމާ ދުރުގައި ތިބި ބައެއް ކުޅުންތެރިން އެނބުރި އައިސް ޓީމާ ގުޅެމުން އަންނަ ކަމަށާއި، ފަރިތަ ކުރުން ތަކުގެ ފެންވަރު ވެސް މިހާރު ވަރަށް ބޮޑަށް ރަނގަޅު ވަމުން އަންނަ ކަމަށެވެ. އެކަމާ މެދު ރަނގަޅު އިޙުސާސެއް ކުރެވޭކަން ފާހަގަކޮށް ފްލިކް ބުނީ، އޭނާ ވެސް ބޭނުން ވަނީ ބާސެލޯނާ އިން އިތުރު ބަދަލު ތަކެއް ފެންނަން ކަމަށެވެ.

ހަމަ އެހެންމެ ޗެލްސީ އަކީ އިނގިރޭސި ޕްރިމިއާ ލީގު ތާވަލްގެ ދެ ވަނައިގައި އޮތް ޓީމު ކަމަށާއި، ޗެމްޕިއަންސް ލީގުގައި އެ ކަހަލަ ޓީމަކާ ދެކޮޅަށް ކުޅޭއިރު ވަރަށް ގިނަ ކަންކަމަށް ވިސްނަން ޖެހޭނެ ކަމަށް ފްލިކް ބުންޏެވެ. އެހެންކަމުން ބޯޅަ ކޮންޓްރޯލް ކޮށްގެން، ވަރުގަދަ ކުޅުމެއް ދައްކަން ޖެހޭނެ ކަމަށް ފްލިކް ވަނީ ބުނެފަ އެވެ.

ޗެލްސީ އަތުން ބާސެލޯނާ ބަލިވެފައިވާއިރު، މި ސީޒަންގެ ޗެމްޕިއަންސް ލީގުގައި އެ ޓީމު ކުޅެފައިވާ ފަސް މެޗުގެ ތެރެއިން މޮޅުވެފައި ވަނީ ދެ މެޗުންނެވެ. އަނެއް ދެ މެޗުން ބަލިވެފައިވާއިރު، އެއް މެޗުން ވަނީ އެއްވަރުވެފަ އެވެ. ފަސް މެޗުން މިހާތަނަށް ލިބުނު ހަތް ޕޮއިންޓާ އެކު ބާސެލޯނާ އޮތީ ވެސް 15 ވަަނައިގަ އެވެ.