އަލަވޭސް ބަލިކޮށް ބާސެލޯނާ އެއް ވަނަ އަށް

ސްޕެނިޝް ލީގުގައި ޑިޕޯޓިވޯ އަލަވޭސްއާ ދެކޮޅަށް ކުޅުނު މެޗުން މޮޅުވެ، އެންމެ ފަހުގެ ޗެމްޕިއަން ބާސެލޯނާ އިން ލީގު ތާވަލްގެ އެއް ވަަނަަ އަށް ޖެހިލައިފި އެވެ.

ބާސެލޯނާގެ އަމިއްލަ ދަނޑުގައި ކުޅުނު މެޗު އެ ޓީމުން ކާމިޔާބު ކުރީ 3-1 އިންނެވެ. އެއީ މެޗުގައި އަލަވޭސް އިން ލަނޑު ޖަހައި ކުރި ހޯދާފައި ވަނިކޮށް، ފަހަތުން އަރައި ތިން ލަނޑު ޖަހައިގެންނެވެ.

މެޗު ފަށައިގެން ފުރަތަމަ މިނެޓުގައި އަލަވޭސް އިން ވަނީ ބާސެލޯނާ ކޮޅަށް ލަނޑު ޖަހައި ލީޑު ނަގައިފަ އެވެ. އެ ލަނޑު އެ ޓީމަށް ޖަހައިދިނީ ޕަބްލޯ އިބާނެޒް އެވެ. އެއީ ވިކްޓޯ ޕަރާޑާ ތަނަވަސްކޮށްދިން ފުރުސަތެއްގައި އޭނާ ޖެހި ލަނޑެކެވެ.

ނަމަވެސް އޭގެ ހަތް މިނެޓު ފަހުން ބާސެލޯނާ އިން ވަނީ ލަނޑު ޖަހައި ނަތީޖާ ހަމަހަމަ ކޮށްފަ އެވެ. ޕޮލެންޑުގެ ފޯވާޑު ރޮބާޓް ލެވަންޑޯސްކީ ތަނަވަސްކޮށްދިން ފުރުސަތެއްގައި ބާސެލޯނާ އަށް ނަތީޖާ ހަމަހަމަ ކޮށްދިނީ ލަމީން ޔަމާލް އެވެ.

މެޗުގައި ބާސެލޯނާާ އިން ލީޑު ނެގީ 28 ވަނަ މިނެޓުގައި ޑެނީ އޮލްމޯ ޖެހި ލަނޑުންނެވެ. އެ ލަނޑު ޖަހަން އޮލްމޯ އަށް ފުރުސަތު ތަނަވަސްކޮށްދިނީ ރަފީނިއާ އެވެ. މެޗުގެ ފުރިހަމަ ވަގުތު ހަަމަވެ އިތުރަށް ދެއްކި ވަގުތުގައި އޮލްމޯ ވަނީ ބާސެލޯނާގެ ތިން ވަނަ ލަނޑެއް ވެސް ޖަހައިފަ އެވެ. އެ ލަނޑު ޖަހަން އޭނާ އަށް ފުރުސަތު ތަނަވަސްކޮށްދިނީ ޔަމާލް އެވެ.

މޮޅާ އެކު ބާސެލޯނާ އެއް ވަނަ އަށް ޖެހިލާފައި ވަނީ މިހާތަނަށް ކުޅެފައިވާ 14 މެޗުން 34 ޕޮއިންޓާ އެކު އެވެ. ބާސެލޯނާ އަށް ވުރެ އެއް މެޗު މަދުން ކުޅެގެން ދެ ވަނައިގައި ރެއާލް މެޑްރިޑަށް ލިބެނީ 32 ޕޮއިންޓެވެ. ލީގުގައި ޖިރޯނާއާ ދެކޮޅަށް ކުޅޭ މެޗުން މޮޅުވެ އަލުން އެއް ވަނަ އަށް ޖެހިލުމުގެ ފުރުސަތު ރެއާލް އަށް އޮންނާނެ އެވެ.