12 އަށް ވުރެ ގިނަ ޕްރޮޖެކްޓް ހިންގާނެ ކަމަށް ބުނި ފޯކައިދޫ ގައި 2 އަހަރު ވީއިރު މި ސަރުކާރަށް ބައިންދާލެވުނީ އޭޓީއެމް އެއް އެކަނި!
މި ސަރުކާރުން ވެސް ފޯކައިދޫ އަށް ގިނަ ވައުދުތަކެއް ވެފައިވާ ކަން ފާހަގަކުރައްވާ އާސިފް ވިދާޅުވީ ނަމަވެސް ސަރުކާރަށް ދެ އަހަރު ވެގެން ދިޔަ އިރު ގާއިމް ކުރެވުނީ އޭޓީއެމް އެއް އެކަނި ކަމަށް. ނަމަވެސް ނިމުނު އޮކްޓޫބަރު މަހު އެ ރަށަށް ވަޑައިގެން ވެސް ކުރިން ވެ ވަޑައިގެންނެވި ގިނަ ވައުދުތަކުގެ ވާހަކަ ތަކުރާރު ކުރެއްވި އިރު ގިނަ އަދަދެއްގެ ބިންގާ ވެސް އަޅާފައިވާ ކަން އާސިފް ފާހަގަ ކުރެއްވި.
ށ. ފޯކައިދޫ ކައުންސިލް ގެ ރައީސް އަހުމަދު އާސިފް
އަތޮޅު ތެރޭގެ ތަރައްގީ އަށް ގިނަ މަޝްރޫއުތަކެއް މި ސަރުކާރުން ކުރާނެ ކަމަށް އެގޮތުން 12 އަށް ވުރެ ގިނަ މަޝްރޫއު ށ. ފޯކައިދޫ ގައި އެކަނިވެސް ކުރިއަށް ދާނެ ކަމަށް ބުނި މި ސަރުކާރަށް ދެ އަހަރު ވެގެން ދިޔައިރު އަދި ބެހެއްޓުނީ އޭޓީއެމް އެއް އެކަނި ކަމަށް އެ ރަށު ކައުންސިލް ގެ ރައީސް އަހުމަދު އާސިފް ވިދާޅުވެއްޖެ އެވެ.
ރާއްޖެޓީވީ ގެ 'ފަށާއިރު' ޕްރޮގްރާމް ގައި ވާހަކަދައްކަވަމުން އާސިފް ވިދާޅުވީ ފޯކައިދޫ ގެ ބޮޑެތި އަދި މުހިއްމު ގިނަ މަޝްރޫއުތަކެއް ނިމިދިއަ ރައީސް އިބްރާހިމް މުހައްމަދު ޞާލިހުގެ ސަރުކާރުން ނިންމާ، ޚިދުމަތް ދޭން ފެށި ކަމަށެވެ. އެގޮތުން ޖުމްލަ 19 ޕްރޮޖެކްޓު ނިންމާ، ޚިދުމަތް ދޭން ފަށާފައިވާ ކަމަށް އާސިފް ވިދާޅުވި އެވެ.
އޭގެ ތެރޭގައި ފެނާއި ނަރުދަމާގެ މަޝްރޫއު އާއި، ބަނދަރު ހެދުމާއި، އިންޖީނުގެ އަޕްގްރޭޑް ކުރުމާއި، 4 ފަންގިފިލާގެ ސްކޫލް އިމާރާތާއި މަލްޓި ޕަރޕަސް ހޯލާއި، ކޮމިއުނިޓީ ސެންޓަރާ، ހެލްތު ސެންޓަރު އެކްސްޓެންޝަން މަސައްކަތާއި އެމްބިއުލާން ހޯދުމުގެ އިތުރުން އިން ޑޯ އަދި އައުޓް ޑޯ ޖިމް ހިމެނޭއިރު ފުޓު ބޯޅަ ދަނޑަކީ ވެސް ރައީސް ޞާލިހުގެ ސަރުކާރުން ނިންމާ، ޚިދުމަތް ދެމުންދާ މަޝްރޫއުތައް ކަމަށް އާސިފް ވިދާޅުވި އެވެ.
މި ސަރުކާރުން ވެސް ފޯކައިދޫ އަށް ގިނަ ވައުދުތަކެއް ވެފައިވާ ކަން ފާހަގަކުރައްވާ އާސިފް ވިދާޅުވީ ނަމަވެސް ސަރުކާރަށް ދެ އަހަރު ވެގެން ދިޔަ އިރު ގާއިމް ކުރެވުނީ އޭޓީއެމް އެއް އެކަނި ކަމަށެވެ. ނަމަވެސް ނިމުނު އޮކްޓޫބަރު މަހު އެ ރަށަށް ވަޑައިގެން ވެސް ކުރިން ވެ ވަޑައިގެންނެވި ގިނަ ވައުދުތަކުގެ ވާހަކަ ތަކުރާރު ކުރެއްވި އިރު ގިނަ އަދަދެއްގެ ބިންގާ ވެސް އަޅާފައިވާ ކަން އާސިފް ފާހަގަ ކުރެއްވި އެވެ.
އާސިފް ވިދާޅުވީ މިއިން އެއްވެސް މަޝްރޫއުއެއްގެ މަސައްކަތް އަދިވެސް ނުފަށާ ކަމަށެވެ.
މި ރަށަށް ވަޑައިގެން ދަތުރުފުޅުގަ ބިންގާ އަޅުއްވައިދެއްވި ވޭސްޓް މެނޭޖްމަންޓު ސެންޓަރާ އިސްލާމިކް ސެންޓަރާ ޕޮލިސް ސްޓޭޝަން އާ. ދެން ރައްޔިތުންގެ ބައްދަލުވުމުގަ މަގު ހެދުމުގެ މަޝްރޫއުގަ ސޮއި ކުރެއްވި. އެއީ އޮކްޓޫބަރު 15 ގަ މިއަހަރު. ބޮޑެތި މަގުތައް. ޝޯ ޕްރޮޓެކްޓަން، ގިރާ ސަރަހައްދު ހިމާޔަތް ކުރަން. ރައީސް ވިދާޅުވީ ޓޫރިސްޓުންނަށް ޚާއްސަ ބީޗަކާ، ލޯކަލް ބީޗަކާ ދެ ބީޗު ހަދާނެ ކަމަށް. ދެން ހައުސިންގ ޕްރޮޖެކްޓެއް ވެސް އިއުލާނު ކުރެއްވި. ގައުމީ ފެންވަރުގަ. އޭގެ ތެރޭގަ މި ރަށް ވެސް ހިމެނުން. 150 ހައުސިންގ ޔުނިޓް. އޭގެ އިތުރުން ސިއްހީ މަރުކަޒު އަޕްގްރޭޑް ކުރުމާއި އެތަނަށް ފިޒިޝަން އެއް ހޯދުމާއި އެކަހަލަ މަސައްކަތްތަކެއްގެ ވާހަކަ ރައީސް ވިދާޅުވެ ދެއްވި. ދެން ފުޓްސަލް ދަނޑަކާ ހޭންޑް ބޯޅަ ކޯޓެއް. އޭރު ރައީސް ވިދާޅުވީ އެއް މަސް ދުވަހުގެ ތެރޭގަ އަމަލީ މަސައްކަތް ފަށާނެ ކަމަށް. އޮކްޓޫބަރު މަހު ވިދާޅުވީ. އަދި މިހާތަނަށް އެއްވެސް މަސައްކަތެއް ނުހިނގާ.ށ. ފޯކައިދޫ ކައުންސިލް ގެ ރައީސް އަހުމަދު އާސިފް
ޚާއްސަކޮށް މަގު ނެޓް ބޯޅަ ދަނޑާއި ފުޓްސަލް ދަނޑުގެ އަމަލީ މަސައްކަތް ނޮވެމްބަރު މަހު ފަށާނެ ކަމަށް ވިދާޅުވީ ރައްޔިތުންގެ ކުރިމަތީގައި ކަމުން އެކަމަށް ރަށުގެ ރައްޔިތުންގެ ތިބީ ވަރަށް ބޮޑަށް އުއްމީދު ކޮށްގެން ކަމަށް އޭނާ ވިދާޅުވި އެވެ.
ނަމަވެސް އަހަރު ނިމެން ކުޑަ ދުވަސްކޮޅަކަށް ވެފައިވާއިރު ވެސް އަދިވެސް އެއްވެސް މަޝްރޫއެއްގެ އެއްވެސް މަސައްކަތެއް ކުރެވިފައި ނުވުމަކީ ގިނަ ބަޔަކު ކަންބޮޑުވުން ފާޅު ކުރާ ކަމެއް ކަމަށް އާސިފް ވިދާޅުވި އެވެ. އާސިފް ވިދާޅުވީ މި ސަރުކާރާ މެދު ވެސް ރައްޔިތުންގެ ގިނަ އުއްމީދުތަކެއް ހުރި ކަމަށެވެ.
