ބިދޭސީ މަސައްކަތްތެރިންނަށް ޓާގެޓް ކޮށް ރައީސް މުއިއްޒު އެޅުއްވި ފިޔަޅާ މެދު ހައްގުތަކަށް މަސައްކަތް ކުރާ ޖަމްއިއްޔާ ތަކުން ކަންބޮޑުވުން ފާޅު ކޮށްފި

 ރޭގަނޑު 12:00 އިން ހެނދުނު 6:00 އާ ދެމެދު ބޭރުގައި އުޅޭ ބިދޭސީން ހުއްޓުވައި ސުވާލުކޮށް ތަހުގީގު ކުރުމަށް ރައީސް މުހައްމަދު މުއިއްޒު އެންގެވުމާ ގުޅިގެން ދިވެހި ފުލުހުންގެ ޚިދުމަތުން އެކަމާ ގުޅިގެން ކުރި އިއުލާނާ ގުޅިގެން ޓްރާންސްޕޭރަންސީ މޯލްޑިވްސް އާއި ހައްގުތަކަށް މަސައްކަތް ކުރާ އިތުރު ޖަމްއިއްޔާ ތަކުން ވަރަށް ކަންބޮޑުވުން ފާޅުކޮށްފި އެވެ. 

އެ ޖަމްއިއްޔާތަކުން ނެރުނު ބަޔާނުގައި ބުނެފައިވަނީ ސަރުކާރުން އެޅި މި ފިޔަވަޅަކީ، ތަފާތުކުރުމުގެ ސިފަ ހިމެނޭ، އަދި ގާނޫނުއަސާސީ އާއި އިންސާނީ ހައްގުތަކާ ގުޅޭ ކަންބޮޑުވުންތައް އުފެދޭ ފިޔަވަޅެއް ކަމަށެވެ.

Advertisement

ކަނޑައެޅިގެން ވަކި ބަޔަކަށް އަމާޒު ކޮށް އެޅި މި ފިޔަވަޅަކީ އެއްތަނުން އަނެއްތަނަށް ގޮސް އައިސް އުޅުމުގެ މިނިވަންކަމަށް ހުރަސް އެޅުމުގެ އިތުރުން ގާނޫނުއަސާސީ އިންނާއި ބައިނަލްއަގުވާމީ އިންސާނީ ހައްގުތަކުގެ މިންގަނޑުތަކުން ކަށަވަރު ކޮށްދޭ ހައްގުތަކަށް އަރައިގަތުމެއް ކަމުގައެވެ. މިކަމުން ބިދޭސީންނާ މެދު ނަފްރަތު އުފެދި އަދި ބިދޭސީންނާއި އާންމުންގެ ހިތްތަކުގައި  ބިރުވެރިކަން އުފައްދައި، ގާނޫނުގެ ވެރިކަމަށް ބޮޑު ނުރައްކަލެއް ކުރިމަތިކުރުވާ ކަމެއް ކަމަށް ބަޔާނުގައިވެ އެވެ.

ދިވެހިރާއްޖޭގެ ގާނޫނުއަސާސީން، ގާނޫނުގެ ކުރިމަތީގައި އެންމެންނަކީ ހަމަހަމަ ބައެއް ކަން ކަށަވަރު ކޮށްދޭ ކަމަށާއި، ތަފާތުކުރުން ސާފުކޮށް މަނާކުރާ ކަމަށް ބަޔާނުގައިވެ އެވެ. ވަކި ބަޔަކަށް ތުހުމަތު ކޮށްގެން އަޅާ މިފަދަ ފިޔަވަޅެއްގެ ސަބަބުން ގާނޫނުން ކަށަވަރުކޮށްދޭ ހަމަހަމަ ކަން ގެއްލޭ ކަމަށާއި ގާނޫނުން ލިބިދޭ ހިމާޔާތް ނިކަމެތިވެގެންދާ ކަމަށްވެސް ބުނެފައިވެ އެވެ.

އާންމު ސަލާމަތާ ގުޅޭ ކަންބޮޑުވުންތައް ހައްލު ކުރަންވާނީ ގާނޫނީ ހެކިތަކަށް ބިނާކޮށް، އަދި އެކަންކަމަށް އަޅާ ހާއްސަ ފިޔަވަޅުތަކުން ކަމަށް ވެސް ބަޔާނުގައިވެއެވެ. 

ސަރުކާރުން ބިދޭސީ މަސައްކަތްތެރިންނަށް އަމާޒު ކޮށްގެން އަޅަމުން ގެންދާ ފިޔަވަޅު ތަކުގެ ސަބަބުން އެމީހުންނާ މެދު ނަފްރަތު އުފުދި، އެކަހެރިވެ، އަދި ބިރުވެރިކަން އިތުރުވެ، ބިދޭސީންގެ ނާޖާއިޒު ބޭނުން ހިފުމަށް މަގު ފަހިވެ، އަދި ފުރައްސާރަ އަށް އެމީހުން ހުށަހެޅިގެންދާނެ ކަމަށް ވެސް ބަޔާނުގައިވެ އެވެ. 

ބަޔާނުގައި އިތުރަށް ބުނެފައިވަނީ ބިދޭސީ މަސައްކަތްތެރިންނަކީ ސަލާމަތައް ހުރި ނުރައްކަލެއްގެ ގޮތުގައި ފްރޭމް ކޮށްގެން ނުވާނެ ކަމަށެވެ. ދައުލަތުގެ ދަށުގައި ތިބި އެންމެންގެ ހައްގުތަކާއި ކަރާމާތް ރައްކާތެރިކުރުމަކީ ދައުލަތުގެ ޒިންމާއެއް ކަމަށް ވެސް ބުނެފައިވެއެވެ. 

ދިވެހިރާއްޖޭގައި ދިރިއުޅޭ އަދި މަސައްކަތްކުރާ އެންމެންނަށް ގާނޫނު އަސާސީ އިންނާއި އިންސާނީ ހައްގުތަކުގެ މިންގަނޑުތަކުން ކަށަވަރުކޮށްދޭ ހައްގުތައް ފުރިހަމަ އަށް ދެމެހެއްޓުމަށް ބަޔާން ނެރެފައިވާ ހުރިހާ ޖަމްއިއްޔާތަކުން ސަރުކާރަށް ވަނީ ގޮވާލާފަ އެވެ.

ސަރުކާރުން މި އެޅި ފިޔަވަޅުތަކުގެ ގާނޫނީ ހައިސިއްޔަތު ބަލައި، ބައިނަލްއަގުވާމީ އިންސާނީ ހައްގުތަކުގެ ޒިންމާތަކާ އެއްގޮތްކަން ކަށަވަރު ކޮށް، ތަފާތު ނުކުރުމާއި އިންސާނީ ހައްގުތައް ރައްކައުތެރިކުރެވޭ ކަން ޔަގީން ކުރުމަށް ކުރަން ޖެހޭ މަސައްކަތް ކުރުމަށް ދިވެހިރާއްޖޭގެ ހިއުމަން ރައިޓްސް ކޮމިޝަން (އެޗްއާރްސީއެމް) އާއި އެޓާނީ ޖެނެރަލްގެ އޮފީހަށް ޖަމްއިއްޔާ ތަކުން ގޮވާލާފައިވެއެވެ.