މުޢިއްޒު ވެރިކަމަށް ގެންނަން މަސައްކަތް ކުރި މީހަކު: "ޑޮލަރު ގެ އަގު 21 ފަހަނަ އަޅާ ދަނީ، 64 ބިލިއަން ރުފިޔާ ޗާޕްކޮށް ބާޒާރަށް ނެރެފި"
ރައީސް މުއިއްޒު ހުޅުމާލެ ދެވަނަ ފިޔަވަހީގެ ރައްޔިތުންނާ ބައްދަލުކުރެއްވި ބައްދަލުވުމުގައި ރައްޔިތަކު ޑޮލަރުގެ އަގު އަރަމުންދާތީ ކަންބޮޑުވުން ފާޅުކޮށްފި އެވެ. 64 ބިލިއަން ރުފިޔާ ޗާޕުކޮށް ބާޒާރަށް ނެރުމުން އެ ފައިސާ ހުސްވާއިރު ޑޮލަރުގެ އަގު އިތުރަށް އަރާނެ ކަމަށް އޭނާ ބުންޏެވެ. މީގެ އިތުރުން ރާއްޖެ ބަލި ބަލިމީހުންނަށް ޑޮކްޓަރަށް ދެއްކުމުގައި ދަތިތަކާއި ބޭސް ނުލިބޭ ކަމަށް ވެސް ރައްޔިތަކު ފާހަގަކުރި އެވެ. އޭނާ ބުނީ މުއިއްޒު ވެރިކަމަށް ގެންނަން ވަރަށް މަސައްކަތް ކުރި ކަމަށާއި މިހާރު އެކަން ހަނދާން ނެތިއްޖެ ކަމަށް.
ހުޅުމާލެ ދެވަނަ ފިޔަވަހި ރައްޔިތުންނާ ބައްދަލު ކުރެއްވުމަށް ބުރާސްފަތި ދުވަހުގެ ރޭ ބޭއްވި ބައްދަލުވުމުގައި ހުޅުމާލެ ދެވަނަ ފިޔަވަހީގައި ދިރިއުޅޭ ރައްޔިތެއް
ރައްޔިތު މީހާ އަށް ލިބޭ މަދު މުސާރަ ކޮޅުން ދެކޮޅު ނުޖެހިގެން ދާއިރު ޑޮލަރެއްގެ އަގު 21 ރުފިޔާ އިން ފަހަނަ އަޅާ ދިއުމުން ހުޅުމާލެ ދެވަނަ ފިޔަވަހީ ގައި ދިރިއުޅޭ ރައްޔިތަކު ކަންބޮޑުވުން ފާޅުކޮށްފި އެވެ.
ލޯކަލް ކައުންސިލު އިންތިޚާބު ބޯމަތިވަމުން އަންނަނިކޮށް، ރައީސް ޑރ. މުހައްމަދު މުއިއްޒު ވަކިވަކި އަވަށްތަކުގެ ރައްޔިތުންނާ އެކު ބާއްވަވާ ބައްދަލުވުމުންތަކުގެ ތެރެއިން ހުޅުމާލެ ދެވަނަ ފިޔަވަހި ރައްޔިތުންނާ ބައްދަލު ކުރެއްވުމަށް ބުރާސްފަތި ދުވަހުގެ ރޭ ބޭއްވި ބައްދަލުވުމުގައި ހުޅުމާލެ ދެވަނަ ފިޔަވަހީ ގައި ދިރިއުޅޭ ރައްޔިތަކު ޑޮލަރުގެ އަގު މިހާރު ހުރި ރޭޓަކީ ކަންބޮޑުވާ ރޭޓެއްކަން ފާހަގަ ކޮށްފަ އެވެ. އަދި ޗާޕު ކުރި 65 ބިލިއަން ރުފިޔާ ހުސްވެގެން ދާއިރު ޑޮލަރެއްގެ ރޭޓު އަރައިގެން ދާނެ ވަރަކާ މެދު އޭނާ ވަނީ ސުވާލު އުފައްދާފަ އެވެ.
ދިވެހި ރާއްޖޭގައި ޔޫއެސް ޑޮލަރުގެ އަގު އަރައިގެން ގޮސް ވިއްސާ އެކާވިހާއި ދޭތެރޭގައި މިދެނީ، މަނިކުފާނު 64 ބިލިއަނެއްހާ ރުފިޔާ ޗާޕުކޮށް ބާޒާރަށް ނެރެ ބަޖެޓުގައި ވެސް ޖަހައިފި. ސުވާލަކީ މި 65 ބިލިއަން ރުފިޔާ ހުސްވެގެން ދާއިރު ޑޮލަރެއްގެ ރޭޓު އަރައިގެން ދާނީ ކިހާވަރަކަށް ތޯއޭ؟. މިހާރުވެސް ރައްޔިތު މީހާ މިދަނީ ލިބޭ މުސާރަ ކޮޅުން ދެކޮޅު ނުޖެހިގެން މުސާރަކޮޅު ހިފައިގެން ގެއަށް ވަންނައިރު އިންނަނީ ދަރަންޏަށް ނަގާފަ ހުރި ދިމަ ދިމާލަށް ދައްކާ ހަލާސްކުރަން ވެފަ.ހުޅުމާލެ ދެވަނަ ފިޔަވަހީގެ ރައްޔިތެއް
އޭގެ އިތުރުން އޭނާ ބުނީ، ރާއްޖެ ބަލީގެ ޑޮކްޓަރަކަށް ދެއްކުމަށް މަސައްކަތް ކުރާތާ 7 މަސް ވެއްޖެ ކަމަށާއި މިއަދާ ހަމަ އަށް ވެސް އެޕޮއިންޓްމަންޓް އެއް ނުލިބޭ ކަމަށެވެ. އަދި ރާއްޖެ ބަލީގެ ބަލިތަކަށް ހާއްސަވެފައި ހުރީ އެންމެ ޑޮކްޓަރެއް ކަމަށާއި އަދި އެކަމަށް ބޭހެއް ހޯދަން ބެލިޔަސް ބޭސް ވެސް ނުލިބޭ ކަމަށް އޭނާ ބުންޏެވެ.
އޭނާ ބުނީ އޭނާ އަކީ މުޢިއްޒު ވެރިކަމަށް ގެންނަށް ވަރަށް މަސައްކަތް ކުރި މީހެއް ކަމަށާއި ނަމަވެސް ވެރިކަމަށް ހޮވުމުން އެކަން ހަނދާން ނެތިއްޖެ ކަމަށެވެ. އަދި އެ ދާއިރާ ގެ މެންބަރު ގެ ފޯނަށް އެތައް ފަހަރަކު ގުޅުމުން ވެސް ފޯނަށް ޖަވާބު ނުދޭ ކަމަށާއި މެންބަރު އުޅުއްވަނީ ދާއިރާ ރައްޔިތުންނާއި ފިއްލަވައިގެން ކަމަށް އޭނާ ބުންޏެވެ.
