ޑެމަރޭޖް ނާރާ ވަގުތު، 80 ގަޑިއިރުން 124 ގަޑިއިރަށް ބަދަލުކޮށް، ރޯދަ މަހުގެ ކުރިން ވިޔަފާރިވެރިންނަށް ނުދީ ހުރި ހުރިހާ ފައިސާ އެއް ދޭނެ ކަމަށް ރައީސް މުއިއްޒު ވިދާޅުވެއްޖެ
ރައީސް މުއިއްޒު ވިޔަފާރިވެރިންނާ ބައްދަލުކުރައްވައި، މާލޭ ވިޔަފާރި ބަނދަރުން މުދާ ކްލިއަރ ކުރުމުގެ ޚިދުމަތް 18 ގަޑިއިރުން 24 ގަޑިއިރަށް ބަދަލުކޮށްދެއްވާނެކަމަށް ވިދާޅުވިއެވެ. ޑެމަރޭޖް ނާރާ ވަގުތު 80 ގަޑިއިރުން 124 ގަޑިއިރަށް އިތުރުކުރުމާއި، ސަރުކާރުން ދޭން ހުރި ފައިސާ ރަމަޟާން ކުރިން ދޫކުރުމުގެ ޔަޤީންކަން ދެއްވިއެވެ. ހުޅުމާލެއިން ކުޑަ އަގެއްގައި ބިން ކުއްޔަށް ދިނުމާއި ކޯޓާފީއަށް ލުއިގޮތެއް ހަމަޖެއްސުމަށްވެސް ވިދާޅުވިއެވެ.
ރައީސް މުއިއްޒު ކުދި އަދި މެދުފަންތީގެ ވިޔަފާރިވެރިންނާ އެކު ސޯޝަލް ސެންޓަރުގައި ބޭއްވެވި ބައްދަލުކުރެއްވުމުގެ ތެރެއިން - 17 ޑިސެމްބަރު 2025
ރާއްޖެ އަށް މުދާ އެތެރެކުރުމުގެ މަރުހަލާގައި ހޭދަވާ ޑެމަރޭޖް ނާރާ ވަގުތު، 80 ގަޑިއިރުން 124 ގަޑިއިރަށް ބަދަލުކުރުމަށް ނިންމަވާފައިވާކަމަށާއި ރޯދަ މަހުގެ ކުރިން ވިޔަފާރިތަކަށް ދޭން ހުރި ފައިސާ ދީ ނިންމާނެ ކަމަށް ރައީސް މުހައްމަދު މުއިއްޒު ވިދާޅުވެއްޖެ އެވެ.
ލޯކަލް ކައުންސިލު އިންތިޚާބު ބޯމަތިވެފައި ވަނިކޮށް ވިޔަފާރިވެރިންނާ ބައްދަލު ކުރައްވާ މުއިއްޒު ވިދާޅުވީ، މުދާ ކްލިއަރ ކުރުމުގެ ޚިދުމަތް 24 ގަޑިއިރަށް ބަދަލުކޮށްދެއްވައި، ދިވެހި ވިޔަފާރިވެރިންނަށް ސަރުކާރުގެ ފުރިހަމަ އެއްބާރުލުން ލިބޭނެކަން ކަށަވަރު ކޮށްދެއްވާ ކަމަށެވެ.
ކުދި އަދި މެދުފަންތީގެ ވިޔަފާރިންނާއެކު ބުދަ ދުވަހުގެ ރޭ ސޯޝަލް ސެންޓަރުގައި ބޭއްވި ބައްދަލުވުމުގައި ވިޔަފާރިވެރިން ވަނީ ވިޔަފާރިތަކާއި ގުޅިގެން ސަރުކާރުން އަމަލު ކުރަމުންދާ ގޮތުން ކުރިމަތިވަމުންދާ އެކި ދަތިތަކާއި ހުރަސްތަކާއި ހުރި ކަންބޮޑުވުންތައް ހާމަ ކޮށްފަ އެވެ.
އެގޮތުން ޖުމުލަ ގޮތެއްގައި އެންމެ ގިނަ ވިޔަފާރިވެރިން ހުށަހެޅި ކަންބޮޑުވުންތަކުގެ ތެރޭގައި ސަރުކާރުން ލިބެންޖެހޭ ފައިސާ ލިބުން ލަސްވުމާއި، ފައިސާ ލަސްވުމުގެ ސަބަބުން ޓެކްސް ދެއްކުމުގައި ފަސޭހަ އިންތިޒާމެއް ހަމަޖައްސައި ދިނުމާއި، ވިޔަފާރިވެރިންނަށް ފަސޭހައިން މުދާ ބަހައްޓާނެ ތަންތަން ކުއްޔަށް ލިބޭނެގޮތް ސަރުކާރުން ހަމަޖެއްސުމާއި، މާލޭ ވިޔަފާރި ބަނދަރުން މުދާ ކްލިއަރ ކުރުމުގައި ފަސޭހަ އިންތިޒާމް ހަމަޖައްސައި ދިނުން ފަދަ ކަންކަން ހިމެނެއެވެ.
ސަރުކާރަށް 2 އަހަރު ފުރުނު ފަހުން ބޭއްވި މި ބައްދަލުވުމުގައި ވިޔަފާރިވެރިންގެ ހުރި ކަންބޮޑުވުންތަކާ ގުޅިގެން ރައީސް މުއިއްޒު ވަނީ ވަގުތުން ވަގުތަށް ބައެއް ކަންކަން ހަމަޖައްސަވާނެ ކަމަށް ވިދާޅުވެފަ އެވެ.
އެގޮތުން ވައިގެ މަގުން އަދި ކަނޑުމަގުން އެތެރެކުރާ މުދާ ކްލިއަރ ކުރުމުގައި ހުރި ދަތިތައް ހައްލުކޮށްދެއްވުމުގެ ގޮތުން، މާލޭ ވިޔަފާރި ބަނދަރުން މުދާ ކްލިއަރ ކުރުމަށް މިހާރު އޮންނަ ވަގުތު 18 ގަޑިއިރުން 24 ގަޑިއިރަށް ހަމަޖައްސަވައިދެއްވާނެކަން އިއުލާނު ކުރެއްވިއެވެ. އަދި މާލޭ ވިޔަފާރި ބަނދަރުން، އަމިއްލަ ފަރާތްތަކުގެ ވެހިކަލް ވައްދައިގެން މުދާ ކްލިއަރ ކުރެވޭނެ އިންތިޒާމް ހަމަޖެއްސައިދެއްވާނެ ކަމަށް ވެސް ވިދާޅުވިއެވެ. މީގެ އިތުރުން ކުރިން ރުފިޔާއިން ދައްކަންޖެހޭ ބައެއް ފީތަކަށް ވެސް ގެނެވެން އޮތް ހައްލު ހޯއްދަވައިދެއްވާނެ ކަމުގެ ޔަޤީންކަން ދެއްވާ ކަަމަށް ވެސް ވިދާޅުވި އެވެ.
ވިޔަފާރި ތަކަށް ސަރުކާރުން ދޭން ހުރި ފައިސާ ދީ ޚަލާސް ކޮށްދެއްވާނެ ކަމަށް ކުރިން އެތައް ސުންގަޑި އެއް ދެއްވި ރައީސް މުއިއްޒު ވިދާޅުވީ، ރަމަޟާން މަހުގެ ކުރިން ހުރިހާ ފައިސާއެއް ދައްކާ ނިންމަވާނެ ކަމުގެ ޔަޤީންކަން ދެއްވާ ކަމަށެވެ.
ވެއަރހައުސް އާއި އެކި ބޭނުންތަކަށް ކުއްޔަށް ތަންތަން ނުލިބޭ މައްސަލަ އަށް އިޝާރާތްކުރައްވާ ވިދާޅުވީ ހުޅުމާލެއިން ކުޑަ އަގެއްގައި ވިޔަފާރިވެރިންނަށް ބިން ކުއްޔަށް ނެގޭނެ އިންތިޒާމް ހަމަޖައްސަވާނެ ކަމަށެވެ.
ބިދޭސީން ގެނައުމަށް ކޯޓާ ފީގެ ގޮތުގައި ސަރުކާރަށް ދައްކަންޖެހޭ ފައިސާ އާއި ގުޅޭގޮތުން ވިޔަފާރިވެރިން ހުށަހެޅި ކަންބޮޑުވުމާ ގުޅޭގޮތުން ވިދާޅުވީ ކޯޓާ ފީއަށް ދެއްވެން އޮތް އެންމެ ލުއިގޮތެއް ހަމަޖައްސަވައިދެއްވާނެ ކަމަށެވެ.
ސަރުކާރު ހޮސްޕިޓަލަކުން ޑޮކްޓަރު ދޭ ލިޔުމަކުން ނޫނީ އާސަންދަ މެދުވެރިކޮށް އައިނު ނުހެއްދޭގޮތަށް އޮންނަ އޮތުމަށް ވިޔަފާރިވެރިޔަކު ހުށަހެޅުއްވި ޚިޔާލަށް އިޝާރާތްކުރައްވާ ރައީސް ވަނީ އެކަމަށް ވެސް ރަނގަޅު ޙައްލެއް ހޯއްދަވައިދެއްވާނެކަމުގެ ޔަޤީންކަން ދެއްވާ ކަމަށެވެ. އެހެން ނަމަވެސް އެ ހައްލަކީ ކޮބައިކަމެއް ވިދާޅެއް ނުވެއެވެ.
