ރައީސް މުއިއްޒު ވިދާޅުވީ ހިޔާ ފުލެޓުތަކުން 200،000 ރުފިޔާގެ ޑިސްކައުންޓެއް ދިނުމުގެ ވާހަކަ އެޗްޑީސީގައި ދަންނަވާފައިވާނެ ކަމަށް. ގެދޮރުވެރިޔާ ސްކީމުގެ ފުލެޓުތަކުގެ އަގުތައް ބޮޑުކުރި ނަމަވެސް ރައީސް ވަނީ 3 ކޮޓަރީގެ ފުލެޓުން 500 ރުފިޔާ މަހު ކުލިން އުނިކޮށް އެޑްވާންސް 8000 ރުފިޔާއަށް ދަށްކުރައްވާނެ ކަމަށް ވިދާޅުވެފައި. 2 ކޮޓަރީގެ ފުލެޓުގެ މަހު ކުލިން 1000 ރުފިޔާ އަދި އެޑްވާންސް 7000 ރުފިޔާއަށް ކުޑަކޮށްދެއްވާނެ ކަމަށް ރައީސް ވިދާޅުވި.
ރައީސް ޑރ. މުހައްމަދު މުއިއްޒު ހުޅުމާލެ ފޭސް 2 ގެ ރައްޔިތުންނާއި ބައްދަލުކުރައްވާ ވާހަކަފުޅުދައްކަވަނީ
ރައީސް ޑރ. މުހައްމަދު މުއިއްޒުގެ ސަރުކާރުން ބޮޑު ކުރި ގެދޮރުވެރިޔާ ސްކީމުގެ ކުއްޔާއި ނަގަން ނިންމި އެޑްވާންސް އަށް ބަދަލު ގެނެސް، ގެދޮރުވެރިޔާ ފުލެޓުތަކުގެ 3 ކޮޓަރީގެ ފުލެޓަކުން 500 ރުފިޔާ މަހު ކުލިން އުނިކޮށް އެޑްވާންސް 8000 ރުފިޔާއަށް ދަށްކޮށް، 2 ކޮޓަރީގެ ފުލެޓުގެ މަހު ކުލިން 1000 ރުފިޔާ އަދި އެޑްވާންސް 7000 ރުފިޔާ އަށް ކުޑަކޮށްދެއްވާނެ ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެ އެވެ.
ހުޅުމާލެ 2 ވަނަ ފިޔަވަހީ ގައި ދިރިއުޅޭ ރައްޔިތުންނާއެކު ބޭއްވެވި ބައްދަލު ކުރެއްވުމު ގައި ރައީސް ވިދާޅުވީ ހިޔާ ފުލެޓްތަކުން 200،000 ރުފިޔާގެ ޑިސްކައުންޓެއް ދިނުމުގެ ވާހަކަ ދައްކަވާފައިވާނެ ކަމަށާއި، އެކަން އެމަނިކުފާނު ދެންނެވި ގޮތަށް ކުރުމަށްޓަކައި އެޗްޑީސީ ގައި ދަންނަވާފައިވާނެ ކަމަށެވެ. އެހެންކަމުން ހިޔާފުލެޓުތަކުގެ އެގްރީމެންޓް ބަދަލުވެގެންދާ އިރު ރައްޔިތުންގެ ހުރި ކަންބޮޑުވުންތަކަކީ އެމަނިކުފާނު ބައްލަވާނެ ކަންތައްތައް ކަމަށް ރައީސް ވިދާޅުވިއެވެ.
ރައީސް ވިދާޅުވީ 200،000 ރުފިޔާ އެމަނިކުފާނު ދެންނެވި ގޮތަށް އެކަން އުނިކުރުމަށް ކުރެވެން ހުރި ކަންކަން ކޮށްދެއްވާނެ ކަމަށެވެ. ރައީސް ވިދާޅުވީ ފައިސާ ނުދެއްކި ބެކްލޮގަށް ބޮޑު އަދަދެއް އަރާފައި އޮތުމުން އެކަންވެސް ހަވާލުކޮށްފައިވާ ކަމަށާއި، އެކަމުގެ މައުލޫމާތު ލިބުމުން ކުރިއަށް ދެވޭނެ ގޮތަކީ ކޮބައިތޯ ބައްލަވާނެ ކަމަށެވެ.
ޔަގީނުން ވެސް 200،000 ރުފިޔާގެ ކަންތައްތަކަކީ އަޅުގަނޑު ދެންނެވި ގޮތަށް ހައްލުވާނެ ކަމެއް. ދެން އޭގެ އިތުރަށް ވެސް ވަރަށް ގިނަ ކަންތައްތަކެއް ފާހަގަކުރައްވައިފި. ކުލީގެ ކަންތަކުގައި ވެސް އަޅުގަނޑު ވަރަށް ސީރިއަސް ކަމާ އެކީގައި ބަލައި ދޭނަން. އެއީ މަހުން މަހަށް ދައްކަން ޖެހޭ ވަރު، ކޮންމެ މަހަކު ވެސް އަޅުގަނޑު ވައުދުވެފައިވާ ވަރަށް ދެއްކޭނެ ގޮތަށް އެގްރީމެންޓް ބަދަލުކޮށްދޭނަން. މިހާރު ތިވިދާޅުވާހެން ވަކި ވަރަކަށް ދިޔާމަ ބޮޑުވާ ގޮތަށް އޮތީ. އެހެންވީމާ އެ ސިސްޓަމެއް ކަމަކު ނުދޭ. އެހެންވީމާ އަޅުގަނޑު ބަލައި ދޭނަން ރައްޔިތުން އެދުނު ގޮތަށް މަހުން މަހަށް ދައްކަންޖެހޭ ވަރުވެސް ޓޯޓަލް އަގުގެ މައްސަލަ ވެސް ހައްލުކޮށްދިނުމަށް.ރައީސް ޑރ. މުހައްމަދު މުއިއްޒު
ރައީސް ވިދާޅުވީ ބީއެމްއެލް އިން ނަގާފައިވާ ލޯނުތަކަށް ލުޔެއް ލިބިފައިވާ ކަމަށާއި، މޯލްޑިވްސް އިސްލާމިކް ބޭންކާއި ވާހަކަ ދައްކައިގެން އޮންނަ އުސޫލުތަކުގެ ތެރެއިން ގެނެވޭނެ ހައްލުތަކަށް މަސައްކަތް ކުރައްވާނެ ކަމަށެވެ.
މީގެ އިތުރުން ގެދޮރުވެރިޔާ ސްކީމުގެ ދަށުން ފަހި ދިރިއުޅުން ކޯޕަރޭޝަނުން އިމާރާތް ކުރި 4000 ފުލެޓް ހަވާލު ކުރެވެމުންދާ ކަމަށާއި، ކުރިއަށް އޮތް ކުޑަ ދުވަސްކޮޅެއްގެ ތެރޭގައި ހުރިހާ ފުލެޓެއްގެ ހުރިހާ ކަމެއް ނިމި ފުލެޓް ލިބުނު ފަރާތްތަކަށް ފުލެޓް ހަވާލުކުރެވިގެންދާނެ ކަމަށެވެ.
ރައީށް ވަނީ ގެދޮރުވެރިޔާ ފުލެޓުގެ 3 ކޮޓަރީގެ އަގަށް އަންނަ ބަދަލުތައް މި ބައްދަލުވުމުގައި ހިއްސާ ކުރައްވާފަ އެވެ.
ދެން އެތަނުގެ އެއްކަމަކީ އެޑްވާންސް ޕޭމަންޓެއް ދައްކަންޖެހޭ ވާހަކަ. 3 ކޮޓަރީގެ އެޕާޓްމަންޓް ލިބުނު މީހުން 25،000 ރުފިޔާ ދަައްކަން ޖެހޭ ވާހަކަ ނޫނީ އެގޮތަށް އޮތީ އަދި 2 ކޮޓަރީގެ އެޕާޓްމަންޓް ލިބުނު ފަރާތްތަކަށް 15،000 ރުފިޔާ މިއޮތީ ދައްކަން. ދެން މިހުރިހާ ކަމަކަށް ލުއިތަކެއް ގެނެސްދޭން އަޅުގަނޑު ވާނީ ނިންމާފައި. އޭގެ ތެރެއިން އެއްކަމަކީ 3 ކޮޓަރި ލިބިފައިވާ ފަރާތްތަކަށް މަހުން މަހަށް އޮންނަ އަގާއި މެއިންޓަނަންސް އާ އެކު މިއޮތީ ޓޯޓަލް އަދަކަށް މި އޮންނަނީ 10،500. އެ އަދަދު 10،000 ރުފިޔާ އަށް ކުޑަކޮށް އަދި އެޑްވާންސް 25،000 ރުފިޔާ 8000 ރުފިޔާ އަށް ކުޑަކުރެވިގެންދާނެ.ރައީސް ޑރ. މުހައްމަދު މުއިއްޒު
ރައީސް ވަނީ ގެދޮރުވެރިޔާ ފުލެޓުގެ 2 ކޮޓަރީގެ އެޕާޓްމަންޓުގެ އަގަށް އަދި ދައްކަންޖެހޭ މިންވަރަށް އައި ބަދަލުތައް ވެސް ހިއްސާ ކުރައްވާފަ އެވެ.
7000 ރުފިޔާ ދައްކަން މި އޮންނަނީ 2 ކޮޓަރީގެ ފަރާތްތަކަށް. އެ އަދަދު ކުޑަކުރެވިގެން މިދަނީ 6000 ރުފިޔާ އަށް. ޓޯޓަލް މިހާރު ދައްކަންޖެހޭ އަދަދުން 1000 ރުފިޔާ ކުޑަވެގެންދާނެ. އެއާ އެއްގޮތަށް އެޑްވާންސް ޕޭމަންޓަށް ދައްކާ އަދަދު ވެސް 1 މަހުގެ ކުއްޔަށް ނުވަތަ 1 މަހު ދައްކަން ޖެހޭ ވަރަށް ކުޑަވެފައި އޮންނާނީ. އެގޮތަށް އެފްޑީސީގެ ފަރާތުން އެ ފުލެޓް ލިބޭ ފަރާތްތަކާ އެކު އާކޮށް ރިވައިސް ކުރާނެ.ރައީސް ޑރ. މުހައްމަދު މުއިއްޒު
ރައީސް ވިދާޅުވީ ހިޔާ ފުލެޓުގެ އަގު 200،000 ރުފިޔާ ކުޑަކުރެވި ކޮންމެ މަހަކު ދައްކަން ޖެހޭ އަދަދު ކުޑަވެގެން ދިޔާމަ ބޮޑު ލުޔެއް ވާނެ ކަމަށެވެ. ރައީސް ވިދާޅުވީ ވިނަރެސް ފުލެޓް ގަތް ފަރާތްތަކަށް ވެސް ލުއި ދެއްވާފައިވާ ކަމަށާއި، އަދި ލޯނު ނެގި ފަރާތްތަކަށް ލުއި ދިނުމަށް އެކަމަށް ވެސް ހައްލެއް ގެނެސްދިނުމަށް މަސައްކަތް ކުރަމުން އަންނަ ކަމަށެވެ.
ގެދޮރުވެރިޔާ ސްކީމުން ދޫކުރާ ފްލެޓުތަކުގެ ކުލި ބޮޑު ކޮށް، އެޑްވާންސް ފައިސާ ނެގުމަށް ނިންމި ރައީސް ޑރ. މުހައްމަދު މުއިއްޒުގެ ސަރުކާރުންނެވެ. ނިމިދިޔަ އެމްޑީޕީގެ ސަރުކާރުން ފްލެޓުގެ މެއިންޓަނެންސް ފީއާއެކު 2 ކޮޓަރީގެ ފްލެޓެއްގެ ކުއްޔަށް އޮތީ 5000 ރުފިޔާ އަދި 3 ކޮޓަރިއަށް އޮތީ 7،000 ރުފިޔާ ދައްކަން ޖެހޭ ގޮތަށެވެ.
ނަމަވެސް ދައުލަތުން ހިންގާ މިފަދަ ބޯހިިޔާވަހިކަމުގެ މަޝްރޫއުތައް، ހިންގަން ޖެހޭނީ ވީހާ ވެސް ބަޖެޓަށް ބުރަ ނުވާ ގޮތަށް، ދެމެހެއްޓެނިވި ގޮތަށް ކަމުގައިވާތީވެ މި ސަރުކާރުން އަގުތަކަށް ބަދަލު ގެނެ އެވެ.
އެގޮތުން މި ސަރުކާރުން ގެނައި ބަދަލުގައި ހިމެނެނީ 2 ކޮޓަރީގެ އެޕާޓްމަންޓަކަށް ކުއްޔަށް 7,000 ރުފިޔާ އަދި މެއިންޓެނަންސް ފީގެ ގޮތުގައި 1,000 ރުފިޔާ އެކު ޖުމްލަ 8,000 ރުފިޔާ އެވެ. އަދި އެޑްވާންސް އަށް 15،000 ރުފިޔާ އެވެ. 3 ކޮޓަރީގެ އެޕާޓްމަންޓަކަށް 9,000 ރުފިޔާ މެއިންޓެނަންސް ފީގެ ގޮތުގައި 1,500 ރުފިޔާ އެކު ޖުމްލަ 10,500 ރުފިޔާ އެވެ. އަދި އެޑްވާންސް އަށް 25،000 ރުފިޔާ އެވެ.
