ރައީސް މުއިއްޒުގެ އިރުޝާދުގެ މަތިން ދިވެހި ފުލުހުން ބުދަ ދުވަހުގެ ރޭ ޚާއްސަ އޮޕަރޭޝަނެއް ފަށައިފި. މި އޮޕަރޭޝަންގެ ދަށުން ކޮންމެ ރެއަކު މެންދުރުފަހު 12 އިން ހެނދުނު 6 އާ ދެމެދު މަގުމަތީގައި އުޅޭ ބިދޭސީން ހުއްޓުވައި މައުލޫމާތު ސާފުކުރުމަށާއި ޤަވާއިދާ ޚިލާފަށް ދިރިއުޅޭ މީހުން އިމިގްރޭޝަނާ ހަވާލުކުރުމަށް ހަމަޖެހިފައިވޭ. ސަރުކާރުން ބުނަނީ މިއީ ރައްޔިތުންގެ ރައްކާތެރިކަން ކަށަވަރުކުރުމަށް އަޅާ ފިޔަވަޅެއް ކަމަށް، ނަމަވެސް ބައެއް ފަރާތްތަކުން ބުނަނީ މިއީ ނަސްލީ ތަފާތު ކުރުން ކަމުގައި.
މީގެކުރިން މާލޭގައި ހިންގި ހާއްސަ އޮޕަރޭޝަނެއްގައި ފުލުހުން ހަރަކާތްތެރިވަނީ
ދަންވަރު މަގުމަތީގައި އުޅޭ ބިދޭސީންނާ ސުވާލުކޮށް، އެމީހުން ކުރާ ކަންކަން ބަލައި ގާނޫނީ ގޮތުން ފިޔަވަޅު އަޅަންޖެހޭ ކަންކަމުގައި ފިޔަވަޅު އެޅުމަށް ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު އެންގެވުމާއި ގުޅިގެން، ދިވެހި ފުލުހުން ޚާއްސަ އޮޕަރޭޝަނެއް ބުދަ ދުވަހުގެ ރޭ ފަށައިފި ކަމަށް ފުލުހުން ބުނެފި އެވެ.
ދިވެހި ފުލުހުންގެ ޚިދުމަތުން ބުދަ ދުވަހުގެ ރޭ ބުނީ، ބުދަ ދުވަހުގެ ރެއިން ފެށިގެން ކޮންމެ ރެއަކު 00:00 އިން ހެނދުނު 06:00 އަށް މަގުމަތީގައި އުޅޭ ބިދޭސީން ބަލައިފާސްކުރުމުގެ މަސައްކަތް ކުރިއަށް ގެންދާނެ ކަމަށެވެ. މި މަސައްކަތް މާލެ އާއި ހުޅުމާލޭގެ އިތުރުން ރާއްޖޭގެ މީހުން ދިރިއުޅޭ ހުރިހާ ރަށެއްގައި ވެސް ކުރިއަށް ގެންދެވޭނެ ކަމަށް ފުލުހުން ބުންޏެވެ.
މަސައްކަތުގެ ދަށުން ދަންވަރު ގެ ވަގުތުތަކުގައި ބޭނުމެއްނެތި ބޭރުގައި އުޅޭ ބިދޭސީން ހުއްޓުވައި މައުލޫމާތު ސާފުކުރުމަށް ހަމަޖެހިފައިވާ ކަމަށް ފުލުހުން ބުންޏެވެ. ޚާއްސަކޮށް މާލެއާ ހުޅުމާލޭގެ އާންމު ތަންތަނުގައި ނިދާ ބިދޭސީން ގެ ހާލަތު ބަލައި އެ މީހުން ރާއްޖޭގައި ދިރިއުޅެނީ ޤަވާއިދާ އެއްގޮތަށްތޯ ބެލުމުގެ މަސައްކަތް ކުރިއަށް ގެންދާނެ ކަމަށް ފުލުހުން ބުންޏެވެ.
މިގޮތަށް ބިދޭސީން ބަލައިފާސްކުރުމުގެ ތެރެއިން ފާހަގަ ކުރެވޭ ކަންކަމާއި ގުޅޭގޮތުން އަޅަން ޖެހޭ ފިޔަވަޅުތައް އެޅުމަށާއި ޤަވާއިދާ ޚިލާފަށް ދިރިއުޅޭ ބިދޭސީންނާއި މެދު ޤާނޫނާއި ޤަވާއިދުތަކާއި އެއްގޮތްވާ ގޮތުގެ މަތީން ފިޔަވަޅު އެޅުމަށް އެފަދަ މީހުން މޯލްޑިވްސް އިމިގްރޭޝަނާއި ހަވާލުކުރުމަށް ހަމަޖެހިފައިވާ ކަމަށް ވެސް ފުލުހުން ބުންޏެވެ.
ރައީސް މުއިއްޒު މާލޭ ރައްޔިތުންނާ ބައްދަލުކުރެއްވުމަށް ބާއްވަވާ ސިލްސިލާ ބައްދަލުވުންތަކުގައި މާލޭގައި ދަންވަރު ބިދޭސީން އުޅޭ ގޮތްގޮތުގެ ސަބަބުން އެކިކަހަލަ އުދަގޫތައް ކުރިމަތިވާކަމަށް ބައެއް މީހުން ފާހަގަކޮށްފައިވެ އެވެ. އެކަންކަމާ ގުޅިގެން އެކްސްގައި ކުރެއްވި ޕޯސްޓެއްގައި ރައީސް މުޢިއްޒު ވިދާޅުވީ، ރޭގަނޑު ދަންވަރު 12 އިން ފެށިގެން ހެނދުނު 6 އާ ދެމެދު އާންމު ތަންތަނާއި މަގުމަތީގައި އުޅޭ ބިދޭސީން ބުދަ ދުވަހުން ފެށިގެން ހުއްޓުވާ ސުވާލު ކުރުމަށް ފުލުހުންނާއި ކަމާ ބެހޭ އެހެން ފަރާތްތަކަށް އަންގާފައިވާ ކަމަށެވެ.
މި ފިޔަވަޅަކީ ރައްޔިތުންގެ ސަލާމަތާއި ރައްކާތެރިކަން ކަށަވަރުކުރުމަށް ސަރުކާރުން އަޅާ މުހިއްމު ފިޔަވަޅެއްގެ ގޮތުގައި ސަރުކާރުން ބުނި ނަމަވެސް މިއީ ނަސްލީ ތަފާތު ކުރުން ކަމަށާއި، ގާނޫނު އަސާސީ އާ ޚިލާފު ހަރަކާތެއް ކަމެއް ބުނެ ބައެއް ފަރާތްތަކުން މީސް މީޑީއާ ގައި ވަނީ ފާޑު ކިޔާފަ އެވެ.
