ފީފާ އިންޓަކޮންޓިނެންޓަލް ކަޕްގެ ޗެމްޕިއަންކަން ސްޕެއިންގެ ރެއާލް މެޑްރިޑުން ހޯދައިފި އެވެ.

ޤަތަރުގެ ވެރި ރަށް ދޯހާގައި ހުންނަ، ލުސައިލް ސްޓޭޑިއަމްގައި ބުދަ ދުވަހުގެ ރޭ ކުޅުނު ފައިނަލްގައި ރެއާލް ވާދަކޮށްފައި ވަނީ މެކްސިކޯގެ ޕަޗޫކާއާ ދެކޮޅަށެވެ. އެ މެޗުގައި ރެއާލް އިން މޮޅު ކުޅުމެއް ދެއްކިއިރު، އެ ޓީމުން މެޗު ކާމިޔާބު ކުރީ 3-0 އިންނެވެ. މެޗުގެ ފުރަތަމަ ހާފުގައި ރެއާލް އިން އެއް ލަނޑު ޖެހިއިރު، ދެ ވަނަ ހާފުގައި ވަނީ ދެ ލަނޑު ޖަހައިފަ އެވެ.

މެޗުގެ ފުރަތަމަ ހާފުގެ 37 ވަނަ މިނެޓުގައި ރެއާލަށް ލީޑު ނަގައިދިނީ ފްރާންސްގެ ކެޕްޓަން ކީލިއަން އެމްބާޕޭ އެވެ. އޭނާ އެ ލަނޑު ޖެހީ ބްރެޒިލްގެ ވިނީޝިއުސް ޖޫނިއާ ތަނަވަސްކޮށްދިން ފުރުސަތެއްގަ އެވެ. މެޗުގެ ދެ ވަނަ ހާފު ފަށައިގެން އަށް ވަނަ މިނެޓުގައި ރެއާލްގެ ދެ ވަނަ ލަނޑު ޖަހައި ލީޑު ފުޅާ ކޮށްދިނީ ރޮޑްރީގޯ އެވެ. އެ ލަނޑު އޭނާ ޖެހީ އެމްބާޕޭ ތަނަވަސްކޮށްދިން ފުރުސަތެއްގަ އެވެ. މެޗުގައި ރެއާލްގެ ތިން ވަނަ ލަނޑަކީ، 84 ވަނަ މިނެޓުގައި ލިބުނު ޕެނަލްޓީ ކާމިޔާބުކޮށް، ވިނީޝިއުސް ޖެހި ލަނޑެކެވެ.

ފީފާ އިން ދުނިޔޭގެ ބައްރުތަކުގެ ޗެމްޕިއަނުންގެ މެދުގައި ކުޅޭ މި މުބާރާތް ކުރިއަށް ގެންދިޔަ މިއީ ފުރަތަމަ އަހަރެވެ. އެގޮތުން ހަ ބަައްރެއްގެ ޗެމްޕިއަނުން ވަނީ މުބާރާތުގައި ވާދަކޮށްފަ އެވެ. ރެއާލް އަކީ އިންޓަކޮންޓިނެންޓަލް ކަޕްގެ ޗެމްޕިއަންކަން ހޯދި ފުރަތަމަ ކުލަބެވެ. މިއަހަރުގެ މުބާރާތުގެ އެންމެ މޮޅު ކުޅުންތެރިޔަކަށް ހޮވުނީ ރެއާލްގެ ވިނީޝިއުސް އެވެ.