ފުލުހުން ބުނީ މައުރޫފު އަމިއްލައަށް އެދި ޑޮކްޓަރަށް ދެއްކި ކަމަށާއި އެއީ ބަންދުގައި ހުރުމާ ގުޅޭ ކަމެއް ނޫން ކަމަށް. ނަމަވެސް ވަކީލު ނިޝާން ބުނީ މައުރޫފު މުޒާހަރާ އަށް ދިޔައިރު ސިއްހީ މައްސަލަ އެއް ނެތް ކަމަށާއި އެއީ ހައްޔަރުކުރުމުގައި ލިބުނު އަނިޔާއެއް ކަމަށް.
ކެންދޫ ދާއިރާގެ މެންބަރު މައުރޫފް ޒާކިރު ފުލުހުންގެ ބެލުމުގެ ދަށަށް ގެންދަނީ
ކެންދޫ ދާއިރާގެ މެންބަރު މައުރޫފު ޒާކިރު އަށް އަނިޔާވީ ފުލުހުން އޭނާ ހައްޔަރު ކުރުމުގެ ތެރޭގައި ދޯނީގެ ސިޑިން ދާމާފައި ގަދަކަމުން ބޭލުމުގެ ތެރޭގައި ކަމަށާއި، މުޒާހަރާ އަށް ދިޔަ އިރު ވެސް މައުރޫފު އަކީ ސިއްހަތު ސަލާމަތުން ގަދަކޮށް ހުރި މީހެއް ކަމަށް ގާނޫނު ވަކީލު މުހައްމަދު ނިޝާން އިބްރާހިމް ވިދާޅުވެއްޖެ އެވެ.
މައުރޫފު ގެ ވަކީލު ނިޝާން މިފަދައިން ވިދާޅުވީ މަޢުރޫފް ޒާކިރު ފުލުހުން ގެ ބަންދު ގައި ހުއްޓާ އަނިޔާވެ އޮޕަރޭޝަނެއް ކުރަން ޖެހިފައިވާ ކަމަށް ބުނެ ނޫސްތަކުގައި ރިޕޯޓް ކޮށްފައިވާތީ ނެރުނު ނޫސްބަޔާނަށް ރައްދު ދެއްވަމުންނެވެ.
ފުލުހުން ނެރުނު ބަޔާނުގައި ބުނީ 2025 ޑިސެމްބަރ 11 ވަނަ ދުވަހުގެ މެންދުރު 12:24 ގައި ފުލުހުންގެ ބެލުމުގެ ދަށަށް ގެނެސް ބަންދުގައި ހުއްޓާ ރައްޔިތުންގެ މަޖިލީހުގެ ކެންދޫ ދާއިރާގެ މެންބަރު މަޢުރޫފް ޒާކިރު ޑޮކްޓަރަށް ދެއްކުމަށް ހޮސްޕިޓަލަށް ގެންގޮސްފައިވަނީ، ޑޮކްޓަރަށް ދެއްކުމަށް އަމިއްލައަށް އެދިވަޑައިގަތުމުން، ކަސްޓޯޑިއަލްގައި އެވަގުތު އިންނެވި ޑޮކްޓަރު ބެއްލެވުމަށްފަހު ޑޮކްޓަރު ގެ ލަފަޔާއެކު، ފުލުހުންގެ ކަސްޓޯޑިއަލް ބަންދުގައި ތިބޭ މީހުން ޑޮކްޓަރަށް ދެއްކުމުގައި އަމަލުކުރާ އުސޫލުގެ މަތިންނެވެ.
ޑޮކްޓަރަށް ދައްކަން މައުރޫފް އެދިވަޑައިގެންފައި ވަނީ، ފުލުހުންގެ ބެލުމުގެ ދަށަށް ގެނައުމުގައި ނުވަތަ ފުލުހުންގެ ބަންދުގައި ހުންނަވަނިކޮށް ދިމާވިކަމަކާ ގުޅިގެން ނޫންކަމަށް ފުލުހުން ވަނީ ބުނެފަ އެވެ. ފުލުހުން ބުނީ މައުރޫފް ބަންދުން ދޫކޮށްލާފައިވާ ކަމަށެވެ.
ނަމަވެސް މައުރޫފު ގެ ވަކީލު ނިޝާން ވިދާޅުވީ، 10 ވަނަ ދުވަހު އަދި 11 ވަނަ ދުވަހު ވެސް ބޮޑު ކަންނެލި މަސްވެރިންގެ ޔޫނިއަންގެ މުޒާހަރާއަށް ދިޔަ އިރު މައުރޫފު ހުންނެވީ ގަދަވެ ސަލާމަތުން ކަމަށާއި، ސިއްހީ އެއްވެސް މައްސަލައެއް ދިމާ ނުވާ ކަމަށެވެ. އަދި މައުރޫފު އަށް އަނިޔާވީ ދޯނީގެ މަތީގައި އޭނާ ހުއްޓާ ފުލުހުން އޭނާ ހައްޔަރުކޮށް، ގަދަކަމުން ސިޑިން ދާމާ ކޫއްތާ ބާލަން އުޅުމުގެ ތެރޭގައި ބުރަކަށި ފިތިގެން އެތެރެހައްޓަށް ގެއްލުން ވެގެން ކަމަށެވެ.
ނިޝާން ވިދާޅުވީ ފުލުހުން އޭނާ ހައްޔަރު ކުރުމުގެ ތެރޭގައި ލިބުނު އަނިޔާއަށް ކެތް ނުވެގެން އެންމެ ފަހުން އެމަރޖެންސީ ގައި އައިޖީއެމްއެޗް އަށް ގެނެސް އޭނާ ގެ ކުއްލި ސަރޖަރީ އެއް ހަދަން ޖެހި ސަރޖަރީ ކުރި ކަމަށާއި، ސިއްހަތު ސަލާމަތުން ހުރި މީހަކު ފުލުހުންގެ ބެލުމުގެ ދަށަށް ގެންދިޔަ މީހަކު އޮޕަރޭޝަނެއް ކުރަންޖެހޭ ސަބަބެއް ނެތް ކަމަށެވެ.
ނިޝާން ވިދާޅުވީ މައުރޫފު މުޒާހަރާ އަށް ދިޔައީ ވެސް އޭނާއާއެކު ކޮފީއެއްގައި އިނދެފައި ކަމަށެވެ. އަދި އޭނާ ގެ ހާލު އެއްވެސް ވަރަކަށް ގޯސް ނޫން ކަމަށާއި، އެހެންކަމުން ފުލުހުން ބަޔާނެއް ނެރިގެން ހަދަނީ ދޮގު ކަމަށް ނިޝާން ވިދާޅުވި އެވެ.
ފުލުހުންގެ ބަޔާނުގައި އިތުރަށް ބުނެފައިވަނީ ފުލުހުންގެ ބެލުމުގެ ދަށަށް ގެނެވޭ ފަރާތްތަކާ މެދު އަމަލުކުރުމުގަޔާއި އެފަރާތްތަކުގެ ހައްގުތައް ރައްކާތެރިކުރުމުގައި، ގާނޫނާއި ގަވާއިދުތަކާއި އިންސާނީ ހައްގުތަކުގެ އުސޫލުތަކާ އެއްގޮތަށް ހަރުދަނާ މިންގަނޑުތަކެއް ދިވެހި ފުލުހުންގެ ޚިދުމަތުން ހިފަހައްޓަމުންދާ ކަމަށެވެ. އެގޮތުން ފުލުހުންގެ ބަންދުގައި ތިބޭ ފަރާތްތަކުގެ ރައްކާތެރިކަމާއި، ދުޅަހެޔޮކަން ކަށަވަރުކުރުމަކީ ދިވެހި ފުލުހުންގެ ޚިދުމަތުން ބޮޑު ސަމާލުކަމެއްދޭ ކަމެއް ކަމަށް ބުނެފައިވެ އެވެ.
ފުލުހުންގެ ބަންދުގައި ތިބޭ ފަރާތްތަކުގެ ޒާތީ ކަންކަމާ ގުޅޭގޮތުން މީޑިއާގެ ތަފާތު މަންސަތަކުގައި ސައްހަނޫން މައުލޫމާތު ޝާއިއުކުރުމަކީ އާންމުންގެ ހިތްތަކުގައި ކަންބޮޑުވުން އުފެދި، ރައްޔިތުންނަށް ރައްކާތެރިކަން ފޯރުކޮށްދިނުމަށް މަސައްކަތްކުރާ މުއައްސަސާތަކަށް އޮންނަ އިތުބާރު ހީނަރުވެގެންދާނެ ކަމެއް ކަމަށް ބުނެފައިވެ އެވެ. އެހެންކަމުން، ފުލުހުންގެ ޚިދުމަތާ ގުޅޭގޮތުން ހަގީގަތާ ހިލާފު މައުލޫމާތު ފެތުރުން އެ އިދާރާއިން ވަނީ ކުށްވެރިކޮށް މިފަދަ އަމަލުތަކުން ދުރުހެލިވުމަށް ހުރިހާ އިލްތިމާސްކޮށްފަ އެވެ.
