އައްޑޫ ހައި ސްކޫލްގައި ދަރިވަރަކާއި ޓީޗަރަކާއި ދެމެދު ހިނގި ހަމަނުޖެހުމުގެ މައްސަލައިގައި ޓީޗަރސް އެސޯސިއޭޝަނުން ބުނީ ޓީޗަރު މަސައްކަތްކުރީ ކްލާސްރޫމްގެ ސްކްރީނަށް ބޭއަދަބީ ވީޑިއޯ އެޅުވި ފޯނު ހޯދަން ކަމަށާއި މިއީ 30 ދަރިވަރުންގެ ހައްގުގައި ކުރި ކަމެއް ކަމަށް. ސްކޫލުގެ މެނޭޖްމެންޓް ފެއިލްވެފައިވާ ކަމަށާއި ދަރިވަރުން ޓީޗަރުންނަށް ބުލީކުރުމަކީ އާއްމު ކަމަކަށްވެފައި ވަނިކޮށް ފިޔަވަޅު ނޭޅޭ ކަމަށް އެސޯސިއޭޝަނުން ވަނީ ބުނެފަ.
އައްޑޫ ހައިސްކޫލުގެ ގްރޭޑް 12 ގެ ކްލާހެއްގައި ހިނގައިދިޔަ މާރާމާރީގެ ވީޑިއޯގެ ސްކްރީން އިމޭޖެއް
އައްޑޫ ހައި ސްކޫލުގައި ޓީޗަރަކާއި ދަރިވަރަކާއި ދެމެދު ހިނގި ހަމަ ނުޖެހުމުގެ މައްސަލައިގައި ޓީޗަރ މަސައްކަތް ކުރީ ދަރިވަރުންގެ ހައްގުގައި ކަމަށާއި މި ބާވަތުގެ ކަންކަމުގައި ޓީޗަރ ކަތިލުމަކީ ޤަބޫލުކުރެވޭ ކަމެއް ނޫން ކަމަށް ޓީޗަރސް އެސޯސިއޭޝަން އޮފް މޯލްޑިވްސް އިން ބުނެފި އެވެ.
އެ އެސޯސިއޭޝަނުން އެހެން ބުނީ ހޮނިހިރު ދުވަހު ނެރުނު ބަޔާނެއްގަ އެވެ.
އެ ބަޔާނުގައި ބުނެފައި ވަނީ ވަނީ އެ ދުވަހުގެ ހާދިސާ ހިނގަން މެދުވެރިވީ ދަރިވަރެއްގެ ފޯނު މެދުވެރިކޮށް ކްލާސްރޫމްގެ ސްކްރީނަށް ބޭއަދަބީ ވީޑިއޯ އެއް އެޅުވުމުން، އެ ފޯނު ހޯދަން ޓީޗަރ މަސައްކަތް ކުރުމުން ކަމަށް އެ އެސޯސިއޭޝަނުން ބެލި ބެލުމުން އެނގިފައިވާ ކަމަށެވެ. އެ އެސޯސިއޭޝަނުން ދެކޭ ގޮތުގައި އެއް ދަރިވަރެއްގެ ހައްގުތައް އޮންނަ ފަދައިން ކުލާހުގައި ތިބޭ 30 ދަރިވަރުންގެ ހައްގު ވެސް އޮންނަން ވާނެ ކަމަށް ބުނެފައި ވެ އެވެ. އެ ކުދިންގެ ހައްގުގައި ތެދުވާ ޓީޗަރ ފަޟީހަތްކޮށް ބަދުނާމުކުރުމަކީ ބަލައިގަންނަ ކަމެއް ނޫން ކަމަށް އެ އެސޯސިއޭޝަނުން ބުނެ އެވެ.
މީގެ އިތުރުން، ދަރިވަރުން ބެލެހެއްޓުމުގައި އައްޑޫ ހައި ސްކޫލްގެ މެނޭޖްމެންޓް ފެއިލްވެފައިވާ ކަަމަށް އެ އެސޯސިއޭޝަނުން ވަނީ ބުނެފަ އެވެ. މި މައްސަލަ ވަކި އަތަކަށް ޖެހުމެއް ނެތި ބަލާ، ލަސް ނުކޮށް ފިޔަވަޅު އަޅާދިނުމަށް އެ އެސޯސިއޭޝަނުން ވަނީ އެދިފަ އެވެ. އަދި މި ބާވަތުގެ ކަންކަން މީސްމީޑިއާގައި ހާމަކުރުމުގެ ކުރިން ހަގީގަތް ރަނގަޅަށް ބަލާ ޒިންމާދާރު ވުމަށް އެ އެސޯސިއޭޝަނުން ގޮވާލާފައިވެ އެވެ.
އެފަދަ މައްސަލަތައް ރަނގަޅަށް ނުބެލި ޓީޗަރަަށް އަދަބު ދިނުމުގެ ސަބަބުން ދަރިވަރުންގެ ފަރާތުން ދިމާވާ މި ފަދަ ކަންކަމަށް ފިޔަވަޅު ނޭޅި ދޫކޮށްލެވޭކަމަށް ވެސް އެ އެސޯސިއޭޝަނުން ބުނެ އެވެ. އެކަމުގެ ނަތީޖާ އަކީ ކިޔަވާދިނުމުގެ ދާާއިރާގައި މަސައްކަތް ކުރާ ޤާބިލް ޓީޗަރުން ފޫހިވެ ދާއިރާ ދޫކޮށް ދިއުން ކަމަށް ވެސް އެ ބަޔާނުގައި ވެ އެވެ. އެއީ އެތައް ކުދިންނެއްގެ ކިޔެވުމަށް އަސަރު ކުރާ ކަމެއް ކަމަށް އެ އެސޯސިއޭޝަނުން ދެކެ އެވެ.
ޓީޗަރުންނަށް އުނދަނގޫ ކުރުމާއި ޓީޗަރުންނަށް ބުލީ ކުރުމަކީ އައްޑޫ ހައިސްކޫލްގެ ބައެއް ދަރިވަރުން މީގެ ކުރިން ވެސް ކޮށްފައިވާ ކަމެއް ކަަމަށް އެ ބަޔާނުގައި ވެ އެވެ. އަދި އެ ސްކޫލްގައި އެކަން އާއްމު ވި ނަމަވެސް ފިޔަވަޅު ނޭޅޭ ކަމަށް ބުނެފައިވެ އެވެ.
ދަރިވަރުންނަށް ފިޔަވަޅު ނޭޅި ދިއުމުގެ އާޚިރު ނަތީޖާ އަކަށްވީ ޓީޗަރަކު ސްޓްރެސްވެ، އެހެން ދަރިވަރުންގެ ހައްގުގައި ކުރި ކަމަކުން ނުވަތަ ކުރެވުނު ކަމަކުން އެ ޓީޗަރަށް އަދަބު ލިބި ސޯޝަލް މީޑިއާގައި ފަޟީހަތް ވުން ކަމަށް އެ ބަޔާނުގައި ވެ އެވެ.
ކްލާސްރޫމަށް ފޯނު ގެންދިއުމަށް ހުއްދަ ދެވިފައި އޮތުމަކީ ދަރިވަރުންގެ ފަރާތުން ދިމާވާ މިފަދަ ކަންކަމަށް ފިޔަވަޅު ނޭޅޭކަން ހާމަވާ ހެއްކެއް ކަމަށް އެ ބަޔާނުގައިވެ އެވެ. އެ ހުއްދަ ދީފައި ވަނީ އުސޫލެއް ހެދުމަކާއި ނުލާ ކަމަށް އެ ބަޔާނުގައި ވަނީ ބުނެފަ އެވެ. ނަތީޖާ އަކީ ދަރިވަރުން ފޯނުގެ ބޭނުން ނަހަމަ ގޮތުގައި ކުރުން ކަމަށް ވެސް އެ އެސޯސިއޭޝަނުން ވަނީ ބުނެފަ އެވެ.
