ލޯކަލް ކައުންސިލް އިންތިހާބަށް ކުރިމަތިލި ކެންޑިޑޭޓުންގެ ކެންޑިޑެސީ ބާތިލްކުރި މައްސަލަ ހައި ކޯޓުން ބަލައިގެންފި އެވެ.

އެމްޑީޕީގެ ސެކެރެޓަރީ ޖެނަރަލް އަނަސް އަބްދުއްސައްތާރު ބުރާސްފަތި ދުވަހުގެ ރޭ "ރާއްޖެއެމްވީ"އަށް ވިދާޅުވީ އެމްޑީޕީގެ ފަރާތުން ހައިކޯޓަށް ހުށަހެޅި އެމައްސަލަ އެ ކޯޓުން ބަލައިގެންފައިވާ ކަމަށެވެ.

މި މަހުގެ 14 ވަނަ ދުވަހު ކައުންސިލް އިންތިހާބު ބާއްވަން ނިންމައި، 900 އަށް ވުރެ ގިނަ ކެންޑިޑޭޓުންގެ ކެންޑިޑެސީ ގަބޫލުކޮށްފައި ވަނިކޮށް، ކޯޓުންކުރި ހުކުމަކާ އެކު ދެ މަސްދުވަހަށް އިންތިހާބު ފަސް ކުރަން ޖެހުމުން އަންނަ އޭޕްރީލް މަހު އިންތިހާބު ބާއްވަން އިލެކްޝަންސް ކޮމިޝަނުން ވަނީ ނިންމައިފަ އެވެ. އަދި ކުރީގެ ކެންޑިޑެސީތައް ބާތިލްކޮށް، ކުރިން ކެންޑިޑެސީ ގަބޫލުކުރި ފަރާތްތަކުން އަލުން ހުށަހަޅަންޖެހޭ ގޮތަށް ވެސް ކޮމިޝަނުން ވަނީ ނިންމައިފަ އެވެ.

އެމްޑީޕީގެ ފަރާތުން ހައިކޯޓަށް ހުށަހެޅި މައްސަލާގައި ބުނެފަިއވަނީ، އިންތިޚާބުގައި ވާދަކުރުމަށް ހުށަހެޅި ކެންޑިޑޭޓުންގެ ކެންޑިޑެސީ ބާޠިލުކުރައްވާފައިވަނީ އިންތިޚާބުތަކާ ބެހޭ ޢާންމު ޤާނޫނުގެ 21 ވަނަ މާއްދާގެ (ނ) ހިލާފަށް ކަމަށެވެ. އަދި ސިވިލް ކޯޓުގެ ހުކުމާއިވެސް ހިލާފަށް ކަމަށެވެ.

އެހެންކަމުން އެމްޑީޕީން ހައިކޯޓުގައި އެދިފައިވަނީ، އިލްކެޝަންސް ކޮމިޝަންއިން ކެންޑިޑެސީ ޤަބޫލުކޮށްފައިވާ ކެންޑިޑޭޓުން އަލުން ކުރިމަތިލާންޖެހޭނޭ ކަމަށް ކޮމިޝަނުން ނިންމާފައިވާ ނިންމުން ބާޠިލުކަމުގައި ކަނޑައަޅުއްވައި ދެއްވުއްވުމަށެވެ. އޭގެއިތުރުން ކެނޑިޑޭޓުންގެ ކެނޑިޑެސީ ބާތިލްކުރުމަށް އިލެކްޝަންސް ކޮމިޝަނުން ނިންމާފައިވާ ނިންމުން، ކޯޓުން ހުކުމްކުރަންދެން މަޑުޖައްސާލުމަށް އިލެކްޝަންސް ކޮމިޝަންގެ މައްޗަށް އަންގައިދިނުމަށްވެސް އެމްޑީޕީގެ ފަރާތުން ހައިކޯޓުގައި އެދިފަވެއެވެ.