މާރާމާރީ ހިންގި ޓީޗަރު ސަސްޕެންޑުކޮށް މައްސަލަ ފުލުހަށް ހުށަހަޅައިފި
މިއީ އައްޑޫ ހައި ސްކޫލުގެ ގްރޭޑް 12 ގެ ކްލާހެއް ގައި ހިނގި ހަދިސާ އެއް، ޓީޗަރަކީ އިންޑިއާ އަށް ނިސްބަތްވާ ޓީޗަރެއް
އައްޑޫ ހައިސްކޫލުގެ ގްރޭޑް 12 ގެ ކްލާހެއްގައި ހިނގައިދިޔަ މާރާމާރީގެ ވީޑިއޯގެ ސްކްރީން އިމޭޖެއް
އައްޑޫ ހައި ސްކޫލުގައި ޓީޗަރަކާއި ދަރިވަރަކާއި މެދު ހިންގި މާރާމާރީއާ ގުޅިގެން އެޑިއުކޭޝަނުން ޓީޗަރު ސަސްޕެންޑްކޮށް އެ މައްސަލަ ފުލުހަށް ހުށަހަޅައިފި އެވެ.
މިކަން ހިނގާފައިވަނީ ބުދަ ދުވަހު ސްކޫލު ގަޑީގައި ކަމަށް މައުލޫމާތު ލިބިފައިވެ އެވެ. މި ވީޑިއޯ އިން ފެންނަ ގޮތުގައި ޓީޗަރު ކުއްޖާގެ ބުރަކަށި މައްޗަށް އަރާ އަނިޔާ ކުރަމުންދާ މަންޒަރު ފެނެ އެވެ. އަދި އެކުއްޖާ ވެސް ފަހުން ޓީޗަރަށް ހަމަލާ ދޭ މަންޒަރު ފެނެ އެވެ.
މި ހަދިސާ ހިނގަން މެދުވެރިވި ސަބަބެއް ކަމަށް، މަންޒަރު ދުށް ބައެއް ކުދިން ރާއްޖެއެމްވީ އަށް ބުނެފައި ވަނީ، ދަރިވަރު ފޯނުން އޯޑިއޯ އެއް ޕްލޭ ކުރުމުން އެކަމާއި، ބިދޭސީ ޓީޗަރު ހިތް ހަމަ ނުޖެހިގެން ފޯނު އަތުލުމަށް، ދަރިވަރު ގަޔަށް އަތްލައި މާރާމާރީ ހިންގާ ދަރިވަރު ބިން މައްޗަށް ވައްޓާލި ކަމަށެވެ. އެއަށް ފަހު ދަރިވަރު ފަހުން ތެދުވެ، ޓީޗަރު މޫނު މަތީގަ ޖަހައި، ޓީޗަރާއި ކުއްޖާ އާ ދެމެދު މާރާމާރީ ހިންގާ މަންޒަރު ފެނެ އެވެ.
މިއީ އައްޑޫ ހައި ސްކޫލުގެ ގްރޭޑް 12 ގެ ކްލާހެއް ގައި ހިނގި ހަދިސާ އެއް ކަމަށް ވަނީ މައުލޫމާތު ލިބިފަ އެވެ. ޓީޗަރަކީ އިންޑިއާ އަށް ނިސްބަތްވާ ޓީޗަރެކެވެ.
އެޑިއުކޭޝަން މިނިސްޓްރީ އިން އަދި ސްކޫލުން ވެސް މިހާތަނަށް މި މައްސަލައާއި ގުޅިގެން އެއްޗެއް ބުނެފައި ނުވާ އިރު، އެ ކުލާހުގައި ހިނގައިދިޔަ ކަންކަމުގެ އިތުރު ވީޑިއޯތައް ވެސް ދަނީ ދައުރުވަމުންނެވެ.
